On ika makuijli ajmankatlajtojli – Inoueyitsajtsilis on tiotlajtojketl para Dios ma kinmikneli (5.1 – 22)
On intlajyouil on israelitas yejuan kimpiyayaj ken esclavos ne Babilonia
5
Xkelnamiki noTEKO, on tlen xkuajli topan yonochiu; xtechita niman xkita ken toka nauiltiaj.
2 Nochi on tlen toyaxka katka yotechkuilijkej,
niman aman on xchanejkej,
yejuamej chantij ipan tokaluan.
3 Tinemij kenon yejuan xok tikpiyaj totataj,
niman tonanuan onokajkej kaualtsitsimej.
4 On atl yejuan toyaxka,
aman yej tikouaj,
niman on kojtlatijli yejuan toyaxka
no tiktlaxtlauaj.
5 On totlauelikniuan nochipa techtlaueltotokatinemij.
Sanoyej yotechsiauitijkej niman xkaman techseuiyaj.
6 Titotemakaj ken esclavos intech on egipcios
niman intech on asirios para ma techmakakan tlen tikuaskej.
7 On touejkatajuan yejuan otlajtlakojkej omikkej,
niman aman titlajyouiyaj impampa intlajtlakoluan.
8 On yejuan achtoj esclavos katkaj,
aman yej yejuamej techmandarouaj,
niman xnemi akinon techmanauis de yejuamej.
9 Ijkuak tikistinemij ipan on xalpatlajkan
para tikontejtemouaj tlakuajli,
on tlakamej yejuan ompa nemij techmiktisnekij.
10 Tokuetlaxyo sanoyej totonki ken itlaj horno
ika tikpiyaj chikauak totonalistli yejuan tikpiyaj
pampa sanoyej tiapismikij.
11 Ipan in ueyikalpan Jerusalén
niman ipan nochimej on uejueyikalpanmej de Judá,
on totlauelikniuan okinchiualtijkej on tochanejkauan siuamej niman on ichpokakokonej
para iminuan ma notekakan.
12 On totlayekankauan okinajkopilojkej ika iminmauan,
niman on ueuentsitsimej xok okintlakaitakej.
13 On tlakamej yejuan más kojtikej katkaj,
okinchiualtijkej ma kuechokan trigo,
niman on telpokakokonej okintlajyouiltijkej
pampa okinkuajkuauiltijkej
niman okinkechpanoltijkej kojtli
yejuan sanoyej yetik para okisakakej.
14 Ipan iuejueyitsakuijlouan in ueyikalpan,
xok nemij on uejueyitlayekankej yejuan teyolkuitiaj;
on telpokamej niman ichpokamej xok nokuikatiaj.
15 Aman xok tikpiyaj paktli ipan toyojlo.
Xok titijtotiaj ikan paktli,
yej sanoyej titajmanaj.
On noyolkuepalistli
16 ¡Sanoyej titlajyouiyaj pampa tejuamej otitlajtlakojkej!
Yotikpolojkej toreino yejuan tikpiyayaj.
17 Yejua ika sanoyej titoyolkokouaj,
hasta xok kuajli titlachaj
pampa techtsakuilia tixayo ika tichokaj.
18 Ijkin topan nochiua
pampa ne Jerusalén sanoyej tlaxoxotontok,
niman aman ompa san ostotsitsimej chantij.
On noueyitsajtsilistli para Dios ma kiyenkuili Jerusalén niman on nación de Israel
19 Pero tejua noTEKO, nochipa titlamandaros;
¡nochipa tinemis ipan motrono!
20 ¿Tline sanken xtitechelnamiki?
¿Tline yotitechtlalkauij miyek tiempo?
21 ¡NoTEKO, xtechkauili oksejpa ma tiuiyan motech,
niman tejuamej tiaskej!
Xtechkauili oksejpa kuajli ma tinemikan
ikan miyek yolpakilistli ken achtoj tinemiyaj.
22 Tejuamej titlamachaj ika tejua kas uelis oksejpa titechselis
niman xtitechtlalkauis para nochipa.
¡Maka sanoyej más xkualantia touan!