On amamoxtl Jeremías san onkaj ken borrador. Xe kita sen tlamatki yejuan kinta on tlajtolpatlalistin para kijtoua tla ye kuajli onokej noso ka.
1
In amamoxtli kijtoua on tlen okijtoj niman okichiu Jeremías. Yejua itata katka Hilquías. Yejua kisa itech sen familia de sen tiopixki yejuan chantiya ipan on kalpan itoka Anatot, ipan iueyitlalpan itribu Benjamín. 2 ToTEKO okinots Jeremías ijkuak Josías, ikoneu Amón, ye kipiyaya majtlaktli uan yeyi xipan ika tlamandarouaya Judá. 3 No ijki okinots ipan on tonaltin ijkuak Joacim, ikoneu Josías, rey katka ne Judá. Niman miyekpa más okinots hasta ijkuak Sedequías, yejuan no ikoneu katka Josías, otlamandaroj majtlaktli uan se xipan ken rey ne Judá. Ijkon tej, okinots keskipa ipan makuijli metstli de on xipan, ijkuak on chanejkej Jerusalén okinuikakej ken esclavos para Babilonia.ToTEKO okinots Jeremías
4 ToTEKO onechnots, niman ijkin onechijlij: 5 "Ijkuak monanaj xe mitstlakatiliaya, nejua yonimitstlapejpenijka. No ijki, ijkuak xe titlakatiya, nejua yonitstlalijka para titiotlajtojketl yes ipan on naciones."
6 Kemaj nejua onikijlij: "¡Ay noTEKO! ¡Nejua sanken nikonetl niman xniueli nitlajtlajtoua!"
7 Pero toTEKO onechijlij: “Maka xkijto semi tikonetl, pampa tejua tias kampa nejua nimitstitlanis, niman tikijtos on tlen nejua nimitsnauatis. 8 Maka yakaj tikmakasis, pampa nejua mouan ninemis para nimitsmanauis. Nejua moTEKO, ijki yonikijtoj nochiuas."
9 Kemaj toTEKO okitlalij ima ipan noten niman onechijlij: 10 "Nejua niktlalia notlajtol ipan mokamak. Aman nejua nimitsmaka tekiuajyotl para titiotlajtos impan on reinojyomej niman on naciones, para titlayopeuas niman titlaxoxotonis, para titlauiuitlas niman titlapejpelos. Niman no, titlakuektlalis niman titlachijchiuas."
11 Kemaj toTEKO onechijlij: “Jeremías, ¿tlino tikita?” Nejua oniknankilij: “Nikita sen imatsin almedrokojtli.”
12 ToTEKO onechijlij: “Melauak tlen tikijtoua. On kijtosneki ika nejua melauak, nikchiuas saniman on tlen yonikijtoj nochiuas."
13 ToTEKO onechnots ika okpa niman onechijlij: “¿Tlinon tikita aman?” Ijkin oniknankilij: “Nikita sen kontli. Niman on tlen onkaj ijtik sanoyej posontikaj. Niman on kontli ye uajtoyajtikaj de ne norte para nanika sur."
14 Kemaj toTEKO onechijlij: "On melauak pampa desde neka norte nikuajkis on temojtij castigo, yejuan nikuajkis impan in chanejkej nikan ipan in país Judá. 15 Nejua, moTEKO, nimitsijlia ika melauak nikinnotsas nochimej on reyes yejuan nemij norte. Yejuamej uajlaskej niman kitlaliskej imincampamentos ixpan itsakuijlouan Jerusalén, ixpan on tepanchinantin yejuan kiyeualtsakuaj, niman no imixpan nochimej on iuejueyikalpauan Judá. 16 In yejua castigo yejuan nikinmakas on xompayejyeuamej tlajtlakolejkej yejuan onechtlalkauijkej, yejuan okimpopochuijkej niman okinmauistilijkej on dioses yejuan xkinmixmatiyaj, niman sano yejuamej okinchijchijkej.
17 'Niman tejua, maka tikinmakajsis; xuiya niman xkimijli nochi tlinon yonimitsnauatij. Maka xkinmakasi, pampa tlamo nejua nikchiuas yej tejua imixpan tikuekuetlakas. 18 Aman tejua nimitstlalia ken sen ueyikalpan yejuan sanoyej kojtitikaj, ken itlaj pilar yejuan tlachijchijtli ikan tepostli, noso ken itlaj tepanchinantli yejuan tlachijchijtli ikan bronce. Ijkon noneki timochiuas, para tiuelis tikixnamikis nochi in país de Judá, pampa tikinmixanamikis on reyes, on uejueyitlayekankej, tiopixkej niman nochimej on chanejkej. 19 Yeuamej mitsixnamikiskej, pero xmitstlaniskej pampa nejua ompa ninemis mouan para timitsmanauis. Nejua, akin nimoTEKO, ijki yonikijtoj."