Israel kitlalkauiya toTEKO
2
ToTEKO onechnots, niman onechijlij: 2 "Xuiya niman xkinnotsa on chanejkej ipan on ueyikalpan Jerusalén; xkimijli chikauak para kuajli ma kakikan: '¡Ijkin kijtoua toTEKO! Nikelnamiki ika ijkuak tikonetl katka, xkaman tinechkauaya. Ijkuak otimitsnosiuatij, tinechnekiya niman otinechtokak ipan on xalpatlajkan, ipan on tlajli kampa xitlaj notôka. 3 Israel, san nejua notech yonotemakaka. Yejua achtoj nokoneu yejuan onikselij kenon achtoj tlakyotl. Tla yakaj kichiuiliaya itlaj xkuajli, nejua nicastigarouaya. Nikuajtitlanilia tlajtlamach tlen xkuajli. Nejua, moTEKO, ijki nikijtoua.'"4 Xkakikan itlajtol toTEKO nemejuamej inuejkakoneuan Jacob, nemejuamej yejuan infamilias Israel. 5 ToTEKO mechijlia: "¿Tlinon xkuajli onechnextilijkej on nemoachtojtajuan yejua ika onechtlalkauijkej? Yejuamej okinmauistilijkej dioses yejuan tontos. Yejua ika, yejuamej no onochijkej tontos. 6 Nion xokinemilijkej onechtejtemojkej, nejua yejuan onikinkixtij Egipto, nejua yejuan onikinyekan ne xalpatlajkan, ipan on tlajli uaki niman sanoyej atlauyoj, tlajli kampa xitlaj atl, niman kampa miyek peligro, tlajli kampa xakaj chanti, nion xakaj nojuitia. 7 Nejua onikinuajuikak kampa sanoyej tlatlaki, para okikuajkej on uêlik yejuan tlaki, niman on okseki kuajli tlajtlamach. Pero nemejuamej onenualajkej niman onenkijtlakokoj notlal; onenkichijkej para ma niktlajyelita in país, yejuan nejua noyaxka. 8 On tiopixkej xonechtejtemojkej; on temachtijkej ikan ley xonechixmatkej; on tlayekankej onechixnamikej, niman on tiotlajtojkej yej otiotlajtojkej ipampa on ídolo Baal niman okintokakej on ídolos yejuan xitlaj ika velerouaj.
Dios kitlajtlakolmaka Israel
9 'Yejua ika, nejua nemoTEKO nikijtoua: 'Nejua, peuas nemechteixpanuis san sekan inuan nemoxuiuan. 10 Xuiyan ipan on tlaluaktsitsimej yejuan onokej ikalakiyan tonaltsintli, niman xtlajtlachakan; yakaj xtitlanikan uejka hasta Quedar yejuan onkaj ikisayan tonaltsintli para kuajli ma kita tla no ijki yonochiu ompa ken yonochiu nikan. 11 Tla ijkon tichiuas, tikitas ika xonkaj okse nación yejuan yokimpatlak idioses, maski on xmelauak dioses. Pero nokoneuan yonechtlalkauijkej, nejua yejuan okinmakak tlakaitalistli ixpan oksekimej naciones, niman yej kintokaj ídolos yejuan tontos. 12 ¡Xmomojti tejua cielo, ipampa in tlen nochijtikaj! ¡Sanoyej xkuekuetlak ikan nemojtijli! Nejua, moTEKO, ijki nikijtoua. 13 Nokoneuan ome tlajtlakojli yokichijkej: onechtlalkauijkej nejua, akin nikinmaka atl yejuan kinmaka nemilistli, niman pampa sano yejuamej onochijchiuilijkej atlatekontin, on atlaltekontin tlapankej yejuan xuelij keuaj atl.
Tlinon ipan nochiuas Israel pampa okitlalkauij toTEKO
14 'Israel xnemi ken se esclavo pampa xijki otlakat. Yejua ika ¿Tline tej, okinuikakej ken esclavos? 15 ¿Tline itlaluelikniuan impan yauij ken itlaj leones, yejuan sanoyej chikauak nanalkaj? Yokixoxotonilijkej impaís; iminuejueyikalpauan yokintlatilijkej niman xok yakaj onokau ompa. 16 On tlakamej chanejkej Menfis niman Tafnes yejuamej omitskuatetlapankej. 17 Ijkon mopan yonochiu pampa otinechtlalkauij nejua, yejuan nimoTEKO Dios ijkuak timitsyekanaya ipan moojui. 18 Niman aman, ¿tlinon tiktlanis ika tiau Egipto para tikononis iau on río Nilo? ¿Tlinon tiktlanis ika tiau Asiria para tikononis iau on río Éufrates? 19 Moxompayeyeualis mitscastigaros; on ika otinechtlalkauij mitstlajtlakolmakas. Xnemili niman tikitas ika sanoyej xkuajli niman chichik ika otinechtlalkauij niman ika xotinechtlakaitak nejua, yejuan nimoTEKO Dios. Nejua moTEKO, akin nochi ueli nikchiua, ijki nikijtoua.
Itlajtlakoluan Israel
20 'Yeuejkaui otinechtlalkauij; xok otiknek tinechtlakamatis. Otikijto: 'Xnikneki niktekipanos.' Nepa kampa más tlakpak ipan cada tlamimijli niman tlatsintlan de on kojtin yejuan mayeualtikej kampa tejua sa ika tenemiya tiauilnemiya. 21 Nejua onimitstôka ken itlaj uvakuamekatl yejuan más kuajli, ken itlaj on uvajkuamekatl yejuan kisa itech sen más kuajli xinachtli. ¡Sanoyej yotimixpolo, yejua ika xok timitsixmati! 22 Maski sanoyej kuajli timopajpakaskia ika nochi on xapoj kech tiknekis, motlajtlakoluan xuelis popoliuiskej nixpan. Nejua moTEKO, ijki nikijtoua. 23 ¿Kenijki ueli tikijtoua: ''Nejua nichopajkanemi niman no xnikinmauistilia on yejuan xmelauak dioses'? Xkita kenijki otimouikak ne ipan ixtlauatl. Xkixtlalo nochi on tlen yotikchiu tejua, ken itlaj on siuacamello yejuan xyejyetiya ijkuak notlatlaloua nochiuiyan para kitejtemoua se okichcamello. 24 Tinemi ken se tepesiuapoloko yejuan yonomat ipan tepetl tlajtsomiya niman tlajtlajnekui ika notokatikaj. Ijkuak notokatikaj, xakaj ueli kiteltia. Tla se okichpoloko kitejtemoua, yejua xsiaui. Nochipa kinextia ijkuak notokatikaj.
25 'Israel, maka xmotlalo ijkuak xtikpiya mokakuan, niman ijkon timokxikokoua, pampa tikintojtoka oksekimej dioses. Maka xchiua ma uaki moakokoj pampa timotlaloua niman tikintojtoka oksekimej dioses. Pero tejua yej otikijtoj: 'Ka, nejua xnikinkauas, pampa sanoyej nikinneki on dioses, niman ika onkaj inuan nias.
Israel kimelaua kiselis castigo
26 'Ijkon ken sen tlachteketl pinaua ijkuak kajsij, no ijki nopinajtis Israel. On chanejkej, on reyes, on tlayekankej, on tiopixkej niman on tiotlajtojkej nopipinatiskej, 27 pampa ijkin kijliaj sen ixneskayotl tlaxintli ipan kojtli: 'Tejua tinotajtsin,' niman no kijliaj on ídolo tlachijchijtli ipan tetl; 'Tejua titonantsin' Pero nejua uej, nechtlalkauiyaj niman xnechitasnekij. Pero ijkuak itlaj xkuajli impan nochiua, uej nechijliaj: ¡'Xuajla, xtechmanauiki!' 28 Judá, ¿kanon nemij on dioses yejuan otikinchijchiu? ¡Sanoyej miyek dioses tikimpiya no ichkich ken mouejueyikalpanuan tikimpiya! ¡Yejuamej tej, ma ualakan, niman kemaj tikitaskej tla uelij mitsmanauiyaj ijkuak titlajyouis! 29 ¿Tline tej, tlamach nennechixkomakaj, niman nemochimej onennechtlalkauijkej? Nejua nemoTEKO, ijki nikijtoua. 30 Sanenkaj onikincastigaroj nemokoneuan, pampa yeuamej xokinekej onoyolpatlakej. Sano nemejuamej onenkinmiktijkej on tiotlajtojkej ken se león kinmiktia niman kinkua yolkamej. 31 No ijki, nemejuamej yejuan aman nennemij, kuajli xkakikan tlinon kijtoua toTEKO. Israel, ¿tlen nenkitaj onemechtlajyouiltij kenon xalpatlajkan tetlajyouiltia? ¿noso kenon tlajli kampa tlayouatok? Ay nokoneuan, ¿tline ijkon nenkijtouaj: "Tejuamej tikchiuaskej on tlen tiknekij, niman xkaman titokuepaskej motech"? 32 ¿Uelis sen siuatl kelkauas kinotlalilis on tlen ika nokualnextis, noso itlaken ijkuak nonamiktis? ¡Melauak ika ka! Pero nokoneuan, uej kemaj yeuejkaui onechelkajkej.
33 '¡Sanoyej tikmati ken tiknextia on ojtli para tikinnextia on tlakamej yejuan iminuan tiauilnemi! ¡Nesi hasta ueliskia tikmachtiskia sen siuaauilnenki yejuan más yoixtonton! 34 Motlaken yoyejyesyouak ika inyeso on mayankej yejuan yolchipajkej, de on tlakamej yejuan xotikinnextilij nion se tlajtlakojli. Tejua xtikpiya tline tikmiktis yakaj tla xkalaki ipan mokal para mitstlachtekilis. \f + \fr 2.34 \fq Tejua xtikpiya tline tikmiktis yakaj tla xkalaki ipan mokal para mitstlachtekilis. \ft 35 Pero maski ijkon yotikchiu, tikijtoua: 'Nejua xitlaj tlajtlakojli nikpiya. Dios xok kualantikaj nouan.' Pero nejua moTEKO, nimitscastigaros pampa tikijtoua xtikpiya tlajtlakojli. 36 ¿Tline sanoyej tikisijkaneki tikimpapatlas on yejuan mitspaleuiskej? Egipto no mitskajkayauas niman xnejli mitspaleuis, no ijki ken xouel omitspaleuij Asiria. 37 Yejua ika, ijkuak tiuajmokuepas de Egipto, tiuajlas ikan miyek pinaualistli, pampa nejua xonikuelitak on yejuan intech otiktlalij nochi moyojlo. Niman nikmatstikaj ika xitlaj tiktlanis intech on naciones tla iminuan timouikas.”