Israel okitlalkauij toTEKO
3
ToTEKO kijtoua: "Tla yakaj tlakatl noxotonia iuan isiuau niman on siuatl, ijkuak yonoxotonij nonamiktia iuan okse tlakatl, on achtoj tlakatl xok uelis oksejpa iuan nemis on siuatl. ¡Xok uelis pampa on yeskia sen ueyi tlajtlakojli ipan in país! Pero tejua Israel, uej sa kechika miyekej tikimpiya motlatsokonteuan, ¡niman aman uej oksejpa tikneki tiualas nouan! Nejua moTEKO, ijki nikijtoua.2 'Xkominta on tlamimiltin yejuan kuapepeltikej, niman kuajli xkita: ¿kanaj onkaj on kampa xotimotekauilij ma mitspijpijnajtijkan? Ompa teuatikaj ken sen tlakatl árabe ipan on xalpatlajkan, ne itenko on ojtli tikinchaya on yejuan inuan tiauilnemis. Yotikijtlakoj sanoyej in país ikan moauilnemilis niman moxompayejyeualis. 3 Yejua ika, amantsin ijkuak seuakan niman atliuetskatlaj,a xkiaui. Timouika nomatstikaj ken sen auilnenkisiuatl. ¡Nion xtipinajkayoj, maski kipiyaya tline tipinauaskia! 4 Xkaua tej, san kemach, hasta tinechijliaya: 'NoTajtsin, tejua tinotlajsojtkaikniu desde ijkuak nichpochtli katka. 5 ¿Tlen nochipa tikualantias?, ¿xkaman tlamis motlauel?' Pero chika ijkon tinechijliaya, tikchiuaya tlen xkuajli nochi kech tiueliya."
To TEKO kichikajkanotsa Israel niman Judá para ma noyolkuepakan.
6 Ipan on tonaltin ijkuak rey katka Josías, toTEKO onechijli: "¿Yotikitak tlinon yokichiu in xtekak Israel? Oyaj niman ika onokau oauilnen nepa kampa tlakpak impan on tlamimiltin niman tlatsintlan de on kojtin yejuan sanoyej mayeualtikej. 7 Nejua nikuitiaya ika sankin ijkuak yokichiu nochi on tlen xkuajli, noyolpatlas niman uajlas notech, pero yejua xonokuep. Aman Judá on isiuikniu okitak nochi in. 8 Niman no okitak ika nejua onikau on xtekak Israel, niman ika iuan oninoxotonij pampa otlakapapatlak. Pero on xtekak Judá isiuaauilikniu Israel xonomojtij. Yej no oyaj niman no opeu auilnemi. 9 Niman yejua okisijkachiu nion xononemilij, niman ijkon nochi on país okitlakoj. Onechkajteu para oyaj okinmauistilito on dioses de temej niman de kojtin. 10 Niman sakin de nochi on tlen xkuajli okichiu, on xtekak Judá no ijki xonokuep notech ikan nochi iyojlo. Yej onechkajkayau. Nejua moTEKO, ijki nikijtoua."
11 Kemaj toTEKO onechijlij: "Maski Israel okipix tlajtlakojli, on xtekak Judá más okipix tlajtlakojli. 12 Yejua ika, xuiya neka norte, niman xmachisti Israel in tlajtojli: 'ToTEKO ijkin kijtoua: ¡Oksejpa xuajla notech, tejua xtekak Israel! Nejua kuajli timitsselis niman xnochipa nikualantias, pampa nejua sanoyej kuajli noyojlo. Nejua moTEKO ijki nikijtoua. 13 Nejua san nikneki xmokuiti ika otikchiu tlen xkuajli, niman ika xotiktlakamat moTEKO Dios; yej otimotlaloj otikintejtemoto on dioses yejuan xtikimixmati. Yejuamej otikintlajsojtlak ne tlatsintlan de on kojtin yejuan majmayeualtikej, niman ijkon xotikintlakamat notlanauatiluan. Nejua moTEKO, ijki nikijtoua.'”
14 ToTEKO mechnotsa: "Xmokuepakan notech, nokoneuan xompayejyeuamej, pampa nemejuamej nennoyaxkauan. Nikixtis se tlakatl ipan cada ueyikalpan niman nikixtis ome itech cada clan*, niman oksejpa nemechkuepas para Sión. 15 Nejua nemechtlalilis akinomej mechmandaroskej, on yejuan nechpaktiskej nejua, niman yejuamej mechmandaroskej ikan tlamachilistli niman ika tlamatkilistli. 16 Niman ijkuak nemejuamej yonenmiyekiyakej ipan on país, niman nenkipiyaskej miyekej nemokoneuan, xok yakaj kiteneuas on iyekcaja toTEKO kampa onkaj on pacto. Xok yakaj kitenuas nion xok yakaj kelnamikis, niman xok nonekis para okse kichijchiuaskej. Nejua nemoTEKO ijki nikijtoua. 17 Ijkuakon, Jerusalén kitokayotiskej itrono toTEKO. Nochimej on naciones ompa nosentlaliskej para nechueyiliskej, niman xok oksepa kichiuaskej on tlen inyoltechikaualis kimijlis. 18 Ijkuak yejkos on tonajli, Judá iuan nosentlalis Israel, niman san sekan uajnokuepaskej de on país de norte para uajlaskej ipan on tlajli yejuan onikinmakak ken herencia iminachtojtajuan.
Israel kinmauistilia oksekimej dioses
19 'Israel, nejua oniknek nimitsselis ken nokoneu niman nimitsmakas on tlajli yejuan nochimej keleuiskej, on país yejuan más kualtetsin ipan in tlaltikpaktli. Oniknek para tinechtokayotis 'notataj' niman ika xkaman tinechkauas. 20 Pero ken yakaj siuatl yejuan ixkoyejyeua iueuentsin niman iuan yau okse tlakatl, nemejuamej ijki onenixkoyejyejkej nouan. Nejua nemoTEKO, ijki nikijtoua.
21 'Nikaki ajmankatsajtsiua niman chokalo ipan on kuapepeltikej tlamimiltin. On ijkon kakistij yejuamej on israelitas yejuan chokaj niman tlajtlanij ma kimiknelikan pampa okitlalkauijkej on ojtli yejuan melajki niman onechelkajkej, nejua iminTEKO Dios. 22 Xuajlakan notech, nokoneuan xipanteitanij, niman nemechtlapojpoluilis nemoxipanteitalis."
On israelitas okitlakamatkej toTEKO
Nemejuamej kijtouaj: "Nikan tinemij, tiuajlauij motech, pampa tejua titoTEKO Dios.
23 Xitlaj ika techpaleuis tla tiaskej ipan on tlamimiltin noso tontsajtsiskej ipan on tepemej. Yej Israel kinextis temakixtilistli san itech toTEKO Dios. 24 Desde ijkuak tikokonej katkaj, on tepinajtijkej ídolos yejuan otikinmauistilijkej okichiu para otikpolojkej on tlen totajuan okiselijkaj. Yejuamej okiselijkaj borregos niman uakaxtin, niman no inkoneuan tlakamej niman siuamej. 25 Ma titoknelikan tej, ma tipinauakan, ma technokenti on tlen xkuajli otikchijkej, pampa desde tikokonej hasta aman, tejuamej niman toachtojtajuan yotitlajtlakojkej ixpan toTEKO Dios", niman xkaman otiktlakamatkej."