Dios kinotsa Israel ma noyolpatla
4
ToTEKO ijkin kijtoua: “Israel, tla tikneki timokuepas, xmokuepa nejua notech. Tla tikinkauas on tetlajyelojkej ídolos niman tla xokaman tinechkauas, 2 kemaj uelis timotlajtolmakas nixpan ika tlen melauak, ikan melajkilistli niman yolmelajkilistli. Niman ijkuak timotlajtolmakas ikan notokatsin, on naciones nechyekteneuaskej niman nechueyitineuaskej."3 ToTEKO kimijlia on chanejkej Judá niman Jerusalén: “ Xmoyolyemanilikan kenon tlajli yejuan xkaman kintȏkaj ijkuak kixoponiaj; niman xok titȏkaj itsajlan on uitskojtin. 4 Chanejkej Judá niman Jerusalén, xmochiuilikan circuncisión ipan nemoyojlo niman xnechselikan ken nemoTEKO. Xchipauakan nemoyojlo niman nemotlamachilis para nennechtitiskej ika nenkitlamatij nopacto. Tlamo ika on tlen xkuajli nenkichiuaj, notlauel tlikuis ken itlaj tlimilinajli kauani niman xnemis akinon uelis kiseuis.
Ye uajlauij on yejuan kuajuijsokiskej Judá
5 '¡Xtemachistikan Jerusalén niman Judá! ¡Xtemachistikan ikan tlapitsaltin ipan nochi on país! Ijkin xkijtokan sanoyej chikauak: '¡Xmotlajsiuitikan! ¡Xmosentlalikan ipan on uejueyikalpanmej yejuan kuajli yeualtsaktokej!' 6 Xkontelketsakan nemobandera neka kampaka nokaua Jerusalén; ¡xtejtemokan kanon nenmomanauiskej. Maka xmoteltikan, pampa neka kampaka norte nikuajkis sen ueyi castigo niman tlaxoxotonilistli! 7 Sen rey yejuan ken sen temojti león youajkis kampa niyantikatka, on yejuan kinxoxotonia on naciones yeualajtikaj; ye uajkistiu ne kampa chanti para kuajxoxotonis mopaís. Mopaís nokauas ken xalpatlajkan pampa xokuitlaj onyas nion xok yakaj chantis. 8 Yejua ika, xmotlakentikan ikan nemoajmankatlaken. Xchokakan niman xtsajtsikan ipampa nemonekokol, pampa itlauel toTEKO kauantikaj niman xok techtlalkauiya. 9 ToTEKO ijkin kijtoua: 'Ijkuak yejkos on tonajli, on rey niman on tlayekankej mojkakuekuetlakaskej. On tiopixquej kipiyaskej sanoyej ueyi nemojtijli niman on tiotlajtojkej sanoyej nomojtiskej.'" 10 Kemaj nejua onikijto: "¡Ay noTEKO, sanoyej yotikinkajkayau on mokoneuan de Jerusalén! Otikimijlij tikinmakas yolseuilistli, niman aman yej ye kinmiktisnekij.”
11 Ipan on tonajli, nojliskej on chanejkej Jerusalén: “On ajakatl totonki yejuan ualeua neka xalpatlajkan ontlauiteki neka kampaka Jerusalén, on ajakatsintli xejua on yejuan kikuij para kixtilia itlajsojlo on trigo. 12 On ajakatl yejuan nejua nikuajtitlanis sanoyej kojtik niman ika nemechtlajtlakolmakas.”
Israel kiyejyeualouaj itlauelikniuan
13 Xkitakan, totlauelikniu yeualajtikaj ken itlaj moxtli. Icarretas de nouisokilistli uajnestiuij ken ajkomalakotl, icaballos más ijsikayauij xkenon kuaktin. ¡Ay de tejuamej, xuelis titomanauiskej! 14 Jerusalén, xchipaua moyojlo de on tlen xkuajli niman ijki timomakixtis. ¿Hasta kamanon tej, sanoyej timokuachalanis para sa tiknemilijtias on tlen xkuajli? 15 Desde Dan niman ipan on itlamimiluan Efraín yejkok tlajtojli yejuan techijlia ika nochiuas tlen xkuajli. 16 Xkinmixtlaloltikan on naciones iuan Jerusalén, ika ipan sen país yejuan uejka onkaj ualeuaskej motlauelikniuan yejuan uajtsajtsitiaskej ika kinuajuisokiskej iuejueyikalpanuan Judá. 17 Kiyejyeualoskej Jerusalén, ijkon ken kinyejuaualouaj on campos on yejuan kitlajpiyaj, pampa xokitlakaitakej toTEKO. Nejua moTEKO ijki nikijtoua. 18 “On ken timouika niman on tlen tikchiua yejua okichiu on tlen mopan nochiua. Moxompayejyeualis kichiua tikpiya motlajyouilis, niman yejua ika mitskokoua moyoltsin.”
Jeremías kinmiknelia ichanejkauan
19 ¡Hasta ninokoltotsoua pampa sanoyej ninokokoua! ¡Noyoltsin chikauak tejtekuini! ¡Xok noyolika ninemi, xok niueli ninemi kuajlotika! Ijkon nikmati pampa yonikak yokipitskej on tropeta yejuan kitemachistia on nouisokilistli. 20 Techijliaj ika miyek xkuajli topan uajnochijtias; nochi in país yokixoxotonijkej. No ijki san ijsikapan okixoxotonijkej nocampamentos, yokinxoxotonijkej notojtonkajkaluan 21 ¿Hasta kamanon, noneki para nikitas iminbandera notlauelikniuan ne tlakpak, niman nikakis kipitsaj on trompeta? 22 ToTEKO kijtoua:
—Nokoneuan sanoyej yoltechikajkej, xnechixmatij. Yejuamej xkipiyaj tlamachilistli nion tlamatkilistli. Sanoyej kimatij kenijki kichiua tlen xkuajli, pero xuelij kichiuaj tlen kuajli.
Jeremías kitas ken tlaxoxotonis
23 Nejua Jeremías onontlachix ipan tlaltikpaktli, onikitak nochi xoxotontok nesiya ken sen xalpatlajkan; onikontak cielo niman xonkatka tlauijli. 24 Onikomintak tepemej yejuan sanoyej kuekuetlakayaj, niman nochimej on tlamimiltin uiuixkayaj. 25 Niman nion se tlakatl xnemiya, niman on totomej nochimej yopolijkaj. 26 No onikitak on tlajli yejuan kuajli tlatlakitiaya, xokuitlaj onkatka, niman nochimej on ueueyikalpamej xoxotontoyaj. Nochi in okichiu itemojtijtlauel toTEKO. 27 ToTEKO kijtoua: “Nochi on tlaltikpak xoxotonis, pero xnochi tlamis nikxoxotonis. 28 Ipan in tlajli onyas sanoyej ueyi ajmantli, niman ipan on cielo sanoyej tlatlileuis. Ijki yonikijtoj, niman ijki nikchiuas. Ijki yoniksetlalij, niman xninoyolpatlas hasta nikchiuas." 29 Ipampa inchikajkatsajtsilis on tlakamej yejuan yejyetiuij niman intsajtsilis, on yejuan tlamotlaj ika tlaminaltin, on chanejkej ontlatlaksakej oniyanatoj ijtik on tlakoyoj, niman sekimej otlejkokej impan teostomej. Nochi on uejueyikalpanmej okinkajtejkej; ompa xok yakaj ochantik. 30 Niman tejua, ueyikalpan xoxotonki Jerusalén, ¿tline timotlakentia ika on patioj tlakentli chichiltik? ¿tline sanoyej miyek tikmotlalilia mokualnesyo yejuan de oro? ¿tlinon para tiktlileua iyeualkan mixtololojuan? Nochi on xitlaj ika mitspaleuis, pampa on yejuan iminuan tiauilnemiya xok mitsnekij, niman aman yej kinekij mitsmiktiskej. 31 Nikaki tsajtsi chikauak sen siuatl. Kakisti ken ijkuak yakaj siuatl kinemitijtikaj iachtojkonetsin. Pero ka. On yejuamej on chanejkej de Jerusalén yejuan tsijtsiknoua. Kakisti ken xok uelij nijyotiaj, niman kuiteuaj inmauan niman kijtouaj: "¡Ay, xtechpaleuikan pampa ye uajlajtokej on temiktianimej para techajmiktiskej!"