Itlajtlakol Jerusalén
5
ToTEKO kijtoua: "Xuiyan nouiyan ipan nochi ikalpanojuan Jerusalén, kuajli xkitakan, xtejtemokan ipan on plazas ¿Ueli nenkinextiaj yakaj tlakatl yejuan kichiua nochi tlen kuajli, yejuan kijtoua on tlen melauak? Tla nenkinextiaj, nejua niktlapojpoluis nochi on ueyikalpan Jerusalén. 2 Sekimej notlajtolpaleuiyaj itech Dios, pero xmelauak kichiuaj on tlen kijtouaj."3 NoTEKO, nesi ika tejua tikneki on mokoneuan melauak san tejua ma mitsneltokakan. Yejuamej otikincastigaro, pero yejuamej xokichiuilijkej cuenta. Otikintlaxoxotonilij, pero xokinekej omitskakej. Sanoyej yoltechikajkej ken itlaj tetl, niman yejua ika xokinekkej okitokakej on kuajli ojtli.
4 Nejua oniknemilij: "Manin, san on mayankej nouikaj ken tontos, pampa xkimatij tlinon kineki iminTEKO, xkimatij tlinon tlanauatia iminDios. 5 Yejua ika, aman nias intech on tlakamej yejuan uejueyixtokej niman nikinnotsas. Yejuamej uej kemaj, kimatiskej tlinon kineki iminTEKO, tlinon tlanauatia iminDios." Pero ka. Yej nochimej xipan okitakej Dios, yejuamej xokinekkej okitlakamatkej. 6 Yejua ika, on leones uakijsaskej ipan on kojyoj niman kinmiktiskej; on lobos yejuan nemij ipan on xalpatlajkan kinkojkotonaskej, niman on leopardos nisiu iminkalpanuan kinuijsokiskej. Ijkon nochiuas pampa yokichijkej sanoyej miyek tlajtlakojli niman sanoyej miyekpa yonechtlalkauijkej.
7 ToTEKO kijtoua: “¿Kenijki nemechtlapojpoluis nochi in? Mokoneuan onechtlalkauikej, niman notlajtolmakaj intech on dioses yejuan xmelauak dioses. Nejua onikinmakak miyek tlakuajli, pero yejuamej onechtlalkauijkej niman san sekan onotemakakej ipan auilnemitlistli. 8 Yejuamej ken itlaj caballojxinachtin yejuan tlatotokaj ijkuak kitaj sen yegua. No ijki kenon tlakakamej, ijkuak kitaj isiuau inisiuchanejkau sanoyej keleuiyaj. 9 ¿Xkitocaroua nikincastigaros yejua ika on? ¿Xkitocaroua nikintlakuepiltis ken yejuamej kinmelaua? 10 ¡Ma intlauelikniuan impan ma kalakikan niman ipan ma chojcholokan iminuvasyoj pero maka ma kixpolokan nochi! ¡Yej, san ma kinyopeuilikan inmajmauan, pampa aman inmajmauan xok noyaxka! 11 ¡On chanejkej ipan Israel iuan Judá yonechtlalkauikej! Nejua nemoTEKO ijki nikijtoua.”
Kitemachistiaj on castigo
12 On chanejkej ipan Israel niman Judá okinenekej toTEKO. Yejuamej yej okijtojkej: "Dios xmelauak nemi. Xitlaj topan nochiuas yejuan xkuajli; xtikpiyaskej nouisokilistli nion apistli." 13-14 Intlajtol on tiotlajtojkej ken itlaj ajakatl, pampa on tlen kijtouaj xejua itlajtol toTEKO.
Pero aman xkakikan tlinon onechijli toTEKO, on Dios yejuan nochi ueli kichiua: "Pampa yejuamej ijkon okijtojkej, in yejua impan nochiuas: Nejua nikchiuas para notlajtol nochiuas mokamak ken itlaj tlitl, niman on tlakamej yejuamej nochiuaskej ken on kojtli, niman on tlitl kintlatis."
15 Kemaj, toTEKO okijtou: "Israel, nikchiuas para ma mitsuijsokikij on tlakamej yejuan uejka ualeuaj, tlakamej yejuan kojtikej niman youejkau nemij. Tejua xtikixmati intlajtol, nion xtikajsikamatis tlinon kijtoskej. 16 Nochimej yejuamej sanoyej uelij tlauijsokij niman xmokej; iminteposuan melauak temiktiaj. 17 Yejuamej kikuaskej on tlen okitlakitij nemocampos niman nemotlakual. Yejuamej kinmiktiskej mokoneuan tlakamej niman siuamej. Yejuamej kinmiktiskej nomoborregos niman nemouakaxuan. Niman no, kinxoxotoniskej nemouvasyo niman nemohigojkojtin. Ika iminteposuan kinxoxotoniskej on uejueyikalpanmej yejuan kuajli yeualtsaktokej kampa tejua tiktlaliaya moyojlo."
18 ToTEKO no kijtoua: "Ipan on tonaltin, maski ijkon nochiuas, xnochi kuajli nikxoxotonis. 19 Ijkuak mitstlajtoltiskej: '¿Tline toTEKO Dios ijkon otechchiuili?', Xkinnankili: 'Ijkon ken nemejuamej onenkitlalkauijkej toTEKO, niman opeu nenkintekipanoua nikan ipan nemopaís on dioses yejuan xnenkimixmatij, no ijki ika onkaj nenkintekipanoskej on tlakamej yejuan xchanejkej ipan on país uejka de nikan.'"
Dios kijlia Israel tlinon ipan nochiuas
20 Kemaj toTEKO onehchmandarou: "Xkimijlikan on ichanejkauan Israel, niman ichanejkauan Judá: 21 'Xkakikan tlinon nemechijlis tlakamej tontos niman yoltechikajkej, yejuan nenkipiyaj nemixtololojuan pero xinentlacha, nenkipiyaj nemonakasuan pero xnentlakakij. 22 ¿Tline nemejuamej xnennechmakasij? Tline nemejuamej xnenkuekuetlakaj nixpan? Nejua oniktlalij on atempan para ompa tlantias on mar, niman kampa tlantikaj on mar ompa xkaman panos. Niman on iakoxonajlis maski sanoyej kojtik noketsteuas niman kakistis, xuelis kipanauis. 23 Pero nemejuamej sanoyej nenyoltechikajkej niman xipan nenteitanij. Onennechtlalkauijkej niman onenyajkej ipan se xkuajli ojtli. 24 Xonentlanemilijkej nion xonenkijtojkej: Ma tiktlakaitakan toTEKO Dios, yejuan techajtitlanilia atsintli ijkuak kitocaroua on achtoj kiautli niman on sa ika nochi kiautli, niman yejuan techmaka on tonaltin ijkuak tipixkaj. 25 Pero nemotlajtlakoluan nochi okipatlak on ken tlaojonkaj, niman xok nenuelij nenkiselia tlatiochiualistli. 26 Nemotsajlan nemij xkuajkualtin tlakamej, yejuan tepijpiyaj kenon tlakamej yejuan kinpijpiyaj totomej, niman kintlatlaliliaj para kinmasij. 27 Kintemiltiaj inkaluan ikan on tlajtlamach yejuan kichtekij, no ijki ken kintemiltiaj on cajas ikan totomej. Ijkon yejuamej okipixkej poder niman onochijkej ricos. 28 Yejuamej kuajli tlakuaj niman melak yotojtomajkej. Inxompayeyeualis sanoyej ueyi. Xkinchiuiliaj tlen melajki on iknomej, niman xkinmakaj inderechos yejuan mayankej. 29 ¿Niman nenkuitiaj nejua xnikincastigaros pampa ijkon kichiuaj? ¿Nenkuitiaj xnikinmakas intlaxtlauil in nación yejuan ijkon kichiua? Nejua nemoTEKO nikijtoua."