Itlauelikniuan Jerusalén kiyejyeualoskej
6
ToTEKO kijtoua: "Tlakamej chanejkej ipan iueyitlalpan Benjamín, ¡amanaman xtejtemokan kanon nenmomanauiskej niman xkisakan Jerusalén! Xpitsakan trompeta ipan on ueyikalpan Tecoa. Xtlalikan sen señal ne Bet-haqueren pampa on tlen xkuajli, on temojtij tlaxoxotonilistli, ualeuas neka norte. 2 Ijkon xchiuakan pampa amantsin nikxoxoxtonis on sanoyej kualtetsin Jerusalén yejuan nesi ken itlaj sakayoj. 3 Ompa yekoskej reyes inuan iminsoldados niman nochachantiskej auiskan, iyeualkan Jerusalén. 4 Yejuamej kijtouaj: '¡Tiauij tikonuijsokij! ¡Xualakan ma tikuisokikan chika tlakualipan! Pero lástima. Aman sanoyej ye tiotlak para peuas titlauijsokiskej pampa ye uajlau on tlayouajlotl. 5 Yejua ika, ma tikchakan niman tikuijsokiskej ijkuak tlayoua. Tla ijkon, ma tikxoxotonikan itorres.'6 'ToTEKO akin nochi ueli kichiua, ijkin yotlanauatij: '¡Xkintsontekikan kojtin niman xkinchijchiuakan kampa nentlejkoskej ipan on ueyi tepantli yejuan ika yeualtsakutikaj on ueyikalpan para nenkuijsokiskej Jerusalén!' On ueyikalpan ika onkaj kixoxotoniskej, pampa ompa sanoyej tetlajyouiltiaj. 7 Ipan on ueyikalpan Jerusalén kisa sanoyej miyek xompayejyejualistli ken itlaj on amejli kampa meya miyek atl. Ompa san kakisti ika onkaj miyek tlauejli niman tlaxoxotonilistli. Ompa san nikita kualolistli niman kokolistli. 8 Xmoyolkuepa, Jerusalén, pampa tla xtikchiuas, nejua timitstlauelkauas. Timitskauas ken itlaj on xalpatlajkan, kampa xok yakaj chantis.”
Judá niman Israel kiselis castigo
9 ToTEKO akin nochi ueli kichiua, kijtoua: “On israelitas yejuan nokauaskej kintejtemoskej hasta okpa, para tlamis kinmiktiskej, ijkon ken kinotijtixuiyaj sen uva ipan imatsitsiuan on uvajkuamekatl hasta kaman nion sen uvaj xitlaj nokaua.”
10 Kemaj nejua Jeremías oniktlajtoltij toTEKO: “¿Akinon nechkakis, tla nikinmijlis in tlajtojli? Nonakastsajtsakuaj, niman xkinekij kakiskej motlajtoltsin. Yej san kipijpinauiyaj on tlen tinechijlia ma nikinmijli. Yejuamej xkuelkakij. 11 Nitentikaj sanoyej ikan motlauel noTEKO, niman xok nikxikoua.”
Kemaj toTEKO onechijlij: "Impan xmotlauelkixti on kokonej yejuan nemij ipan on ueyikalpan ojtli de Jerusalén, niman on telpokamej yejuan san sekan kichijtinemij tlen xkuajli. Xmotlauelkixti impan on tlakamej niman insiuauan niman no impan on yejuan ueuentsitsimej. 12 Iminkaluan, intlaluan niman iminsiuauan kinoyaxkatiskej oksekimej. Ijkon nochiuas pampa nejua niketsteuas noma para nikincastigaros on yejuan chatij ipan in país. Nejua, nemoTEKO nikijtoua."
13 'Nochi tlakatl, uejueyimej niman pipitikej, san kinemilijtokej kenijki kichtakatlaniskej miyek tomin; on tiotlajtojkej niman on tiopixkej nochimej yejuamej tlachtekij. 14 Nochi kuejkuektlaliaj san achijtsin on tlen kinajmana nokoneuan; kijtouaj kitl nochi kuajli onkaj, ijkuak xitlaj kuajli onkaj. 15 ¡Onkaj miyek tline nenpinauaskiaj pampa nenkichiuaj tlen sanoyej xkuajli yejuan nejua xok nikxikoua! Pero ka. Xok nenkipiyaj pinauaualistli, nion xok nenkimatij tlinonon pinaualistli. Yejua ika, ijkuak nejua nemechcastigaros, nenuetsiskej ken ouetskej on oksekimej. Nejua nemoTEKO ijki nikijtoua.”
Israel xipan kita Dios
16 ToTEKO kimijlia ikoneuan: “Xmoteltikan ipan ojtli niman kuajli xkixtlalokan. Xtetlajtoltikan katlejua ojtli yeuejkaui onkaj, katlejua on ojtli yejuan más kuajli yejuan okitokakej nemoyolchipajuejkatauan. Yejua xtokakan niman nenkinextiskej neseuijli.” Pero yejuamej okijtokej: “Ka, tejuamej xtiknekij tiktokaskej.” 17 ToTEKO no okintlalij tlajpixkej, para kinmachistiskej ikoneuan: “Xnemikan listos ijkuak kipitsaskej on trompeta para mechixtlaloltis.” Pero on tlakamej okijtojkej: “Ka, tejuamej xtikakiskej.”
18 Yejua ika toTEKO okijtoj: “Xkakikan, naciones, niman xmatikan tlinon impan nochiuas nokoneuan. 19 Xkakikan tlaltikpaktlakamej. Nikuajtitlanis impan nokoneuan on tlen teajman pampa yejuamej kichiua on tlen sanoyej xkuajli; pampa xokinekkej okakej notlajtol, niman yej okinenekkej noley. 20 ¿Tline nennechajkuiliaj on kopalpopochtli yejuan ualeua Saba, niman on ajuiyakkej xojtin yejuan ualeuaj de on países uejka onokej? Nejua xnikneki on uentli yejuan nochi tlatla nion on okseki uentin yejuan kuajkij.” 21 Yejua ika, toTEKO kijtoua: “Nikchiuas para in tlakamej ma nokxitechakuanikan niman ma uetsikan. Tatajtin, tekoneuan, inchanejkauan niman intlajsokajikniuan, no ijki mikiskej.”
On nouijsokilistli ualeuas norte
22 ToTEKO kijtoua: “Desde on uejka norte sen kojtik niman ueyi nación notlatlajtlalilia para uajlas. 23 Kuajkij inteposuan, inarcos tlaminaluan niman on espadas. Yejuamej sanoyej xkuajkualtin, nion xteikneliaj. Iminsoldados uajyetiuij impan caballos, niman imintsajtsilis kakisti ken on mar kokomoka chikaua. Yejuamej ye uajlauij para kuijsokiskej Jerusalén. 24 Nikan Jerusalén on chanejkej ijkin kijtouaj: 'Yotikakej tlinon kijtouaj, niman aman xok tikojtikej pampa sanoyej titomojtiaj. Sanoyej tiajmankamikij, ken sen siuatl yejuan ye kitlakatilis ikonetsin. 25 ¡Maka xuiyan ipan campo; no maka xuiyan impan on ojtin! On totlauelikniuan uajlauij ikan miyek armas; sanoyej onkaj nemojtijli nochiuiyan!” 26 ToTEKO kijtoua: "Nokoneuan, xtlalikan nenmoajmankatlaken; xteititikan ika nentlajyouiyaj; xmotemilikan miyek tlikonextli. Xmajmanakan niman xajmankachokakan, ken ijkuak miki sen tesentekoneu, pampa totlauelikniuan yejuan techajmiktiskej xuejkajtika yejkoskej! 27 ToTEKO onechijli: “Nejua timitstlalia para xkintlatlata nokoneuan. Kuajli xkimixtlalo, para tikintas kenijki nouikaj.” 28 "NoTEKO, nochimej yejuamej xipan teitaj, sanoyej tlakajkayauaj niman xompayejyeuamej. Yejuamej yoltechikajkej, nochiuaj kenon tepostli bronce niman hierro. 29 Ijkuak yakaj kitlalia plomo ipan se horno niman on tepostlapipitsaloni chikauak kipipitsa on tlitl, on tlitl kixtia on tlen xchipauak ipan on plomo niman nokaua chipauak on plomo. Pero maski Dios sanoyej kincastigaroua ikoneuan ken yeskia itlaj tlitl, xnochiua on xelouilistli pampa xok onkaj plomo, yej san nokaua xompayejyeualistli. 30 Yejuamej kinnamiki kintokayotiskej 'plata sosojli' pampa tejua toTEKO, yotikintlajkal ipan tlajsojli."