Jeremías temachtia ipan on ueyitiopan
7
ToTEKO okinots Jeremías, niman okijlij: 2 "Xmotelketsa ikalakiyan on iueyitiopan toTEKO niman ijkin xteijli: 'Nochimej yejuan nenchantij nikan Judá, yejuan nenkalakij ipan in tsakuijlotl para nenkimauistilia toTEKO, xkakikan itlajtoltsin. 3 ToTEKO yejuan nochi ueli kichiua, yejuan iDios Israel, ijkin mechijlia: Xpatlakan nenmonemilis niman on tlen nenkichiua, niman nejua sanken nemechkauilis xchantikan ipan in tlajli. 4 Maka xkinneltokakan on yejuan mechkajkayauaj, on yejuan ijkin sa chika mechijliaj ika nikan xitlaj nenmopan nochiuas tlen xkuajli pampa nikan onkaj iueyitiopan toTEKO.5 'Tla nenkipatlaj nenmonemilis niman on tlinon nenkichiuaj, niman tla nenkinchiuiliaj tlen melajki oksekimej, 6 tla xinka nemauiltiaj on yejuan xchanenkej, on yejuan iknomej niman on kakaualtsitsimej, niman nenkajkauaj ika nenkinmiktiaj on yejuan xkipiyaj tlajtlakojli, niman xok nenkinmauistiliaj oksekimej dioses, yejuan ika nenmochiuiliaj on tlen xkuajli, 7 nejua sanken nemechkauilis xchantikan nikan, ipan in tlajli yejuan onikinmakak nenmoachtojtajuan para nochipa.
8 'Nemejuamej nenkitlaliaj nenmoyojlo ipan on tlajtojli yejuan xmelauak, yejuan xitlaj ika mechpaleuiya. 9 Nentlachtekij, nentemiktia, nentlapapapatlaj, nenmotlajtolmakaj xikan nemoyojlo, nenkitlapopochuiliaj Baal, nenkinmauistiliaj on dioses yejuan nemejuamej xnenkinmixmatij. 10 Niman kemaj nenuajlauij nixpan ipan in ueyitiopan yejuan kitlatiochijkatlaliaj san para nejua niman nenkinemilia ika nikan xitlaj xkuajli nenmopan nochiuas. Nenkinemiliaj ika kuajli sanken nenkichiuaskej on tlajtlamach yejuan nejua xnikxikoua. 11 ¿Tlen nenkinemilia ika in ueyitiopan yejuan kitlatiochijkatlaliaj san para nejua, yejua sen teostotl kampa niyanaj on tlachtekej? Nejua yonikitak nochi in tlen nenkichiuaj. Nejua, nemoTEKO ijki nikijtoua.
12 'Xuiyan ipan noyektiopan Silo, kampa achto oniktlapejpenij para nichantis, niman xkitakan tlinon yonikchiuilij ipampa intlajtlakoluan nokoneuan israelitas. 13 Niman maski miyekpa yonemechijlij ika xkuajli ken nenmouikaj, nemejuamej xnenkinekij nenechtlakamatiskej. Niman nion xonennechnankilijkej ijkuak onemechnots. Nejua nemoTEKO ijki nikijtoua. 14 Yejua ika, ijkon ken onikchiuilij on yektiopan Silo, no ijki nikchiuilis in ueyitiopan yejuan kitlatiochijkatlaliaj san para nejua, yejuan nejua onemechmakak niman onikinmakak nemoachtojtauan niman yejuan itech nenkitlaliaj nemoyojlo. 15 Nejua nemechejkuanis nixpan ijkon ken onikinkixtij nemokniuan, on teuejkakoneuan itech Efraín, on yejuan ochantikej ne Israel.'
Israel kitlalkauiya toTEKO
16 'Tejua Jeremías, maka xmoueyikatsajtsili impampa in tlakamej; maka xnechiknotlajtlanili impampa yejuamej. Maka más xnechtlajtlanili impampa yejuamej, pampa nejua xnimitskakis. 17 ¿Xtikita tlinon yejuamej kichiuaj ipan iuejueyikalpanuan Judá niman ipan ikalpanuan Jerusalén? 18 On tekoneuan kisentlaliaj kojtli, on tatajtin tlatatiaj niman on siuamej kimaxakualoua on tixtli para kichijchiuaj memelatsimej para kiuentlaliliaj on diosa yejuan kuitiaj Reina Iluikakchanej. No ijki nechpijpinajtiaj, ika kinuentlaliliaj vino on dioses yejuan xkinmixmatij. 19 Pero ika on tlen kichiuaj xnejua más nechpinajtiaj, yej sano yejuamej nopijpinajtiaj. Nejua nemoTEKO ijki nikijtoua. 20 Yejua ika, nejua nemoTEKO, melauak nemechijlia ika ninotlauelkixtis ipan in tlajli, in tlakamej, impan yolkej, ipan on kojyoj niman ipan on tlen otlak. Yes ken ijkuak tlajchinaui niman xueli kiseuiyaj on tlitl."
21 ToTEKO akin nochi ueli kichiua, yejuan iDios Israel, ijkin mechijlia nemejuamej nenikoneuan: "On tlakamej, seki uentli yejuan nochi tlatla nechuentlaliliaj ipan on tlaixpan niman on okseki uentli yejuamej kikuaj. Pero nejua nemoTEKO nikijtoua yej nochi xkuakan nemejuamej pampa xok nikneki más nenmouen. 22 Ijkuak nejua onikinkixtij nenmoachtojtajuan de Egipto, xitlaj onikimijlij tla ma nechmakakan uentli yejuan nochi tlatla niman on okseki uentin yejuan xnochi tlatla. 23 Yej kemaj onikinnauatij ma nechtlakamatikan, niman ijki nejua niiminDios yeskia, niman yejuamej yeskiaj nokoneuan. Niman onikimijli para ma nouikakan ken nejua onikinnauatij, para ijkon impan nochiuaskia nochi tlen kuajli. 24 Pero yejuamej yej xonechtlakamatkej nion xonechchiuilijkej cuenta. Yej onoyoltechikajkej okauilikej ma kinyekana inyojlo para okichijkej tlen xkuajli. Yejuamej xonokuepkej notech, yej onechtlalkauikej. 25 Desde ijkuak nenmoachtojtajuan okiskej Egipto hasta aman, nejua yonemechinuajtitlanilijtiaj, notekitkauan tiotlajtojkej. 26 Pero nemejuamej xonenechtlakamatkej niman xonenechchiuilijkej cuenta, yej más onenmoyoltechikajkej xken nenmoachtojtajuan.
27 'Tejua, Jeremías xkimijli nochi in tlajtlamach, maski maka ma mitschiuilikan cuenta; xkinchikajkaijli, maski maka ma mitsnankilikan. 28 Ijkin xkinmijli: 'In sen nación yejuan xkineki kitlakamatis iTEKO Dios, nion xkineki tlakakis maski kiselia on castigo. On tlen melauak xokaman uelij kijtouaj.'"
On chanejkej Jerusalén xkuajli ken kimauistiliaj toTEKO
29 "¡Jerusalén, xmotekili motson niman xchapani! Xmokuikati ajmankakuikatl ipan on tlamimiltin kampa xakaj nemi! Pampa toTEKO kualantikaj iminuan mochanejkauan, niman yokintlalkauij.
30 'ToTEKO kijtoua: 'On chanejkej Judá yokichijkej tlen sanoyej xnikuelita. Okintlalikej imintetlajyelojkej ídolos ipan on noueyitiopan yejuan kitlatiochijkatlaliaj san para nejua niman yokijtlakojkej. 31 Ipan on ixtlauatl de Ben-hinom okichijchijkej itlaixpan Tofet para ompa kintlatiaj inkoneuan yejuan tlakamej niman yejuan siuamej ken itlaj uentli, on tlen nejua xonikinnauatij niman on tlen nejua xkaman oniknemilij. 32 Yejua ika, nejua nemoTEKO, nikijtoua ika yejkos on tonajli ijkuak ompa xok kitokayotiskej Itlaixpan Tofet nion Ixtlauatl de Ben-hinom. Yej kitokayotiskej Ixtlauatemiktiloyan. Ompa kintôkaskej inmikatlakayouan sanoyej miyekej hasta xok kanaj tlaueyi yes para on miyekej tlakontin. 33 Inmikatlalnakayo on tlakamej kinkuaskej on totomej niman on tepeyolkej, niman xnemis akinon kinmomojtis. 34 Nikixtis ipan on iuejueyikalpanuan Judá niman ipan ikalpanuan Jerusalén on iluikuikatl niman on pakakuikatl, niman on kuikamej yejuan nokuikatiaj ijkuak nonamiktiua. Ipan nochi in país xok yakaj chantis. Nokauas ken xalpatlajkan.'"