8
ToTEKO kimelajkaijtoua: "Ipan on tonaltin kinkixtiskej ipan imintlalkon iminomiyouan, on reyes on uejueyitlayekankakej Judá, on tiopixkej, on tiotlajtojkej niman on yejuan ochantikej Jerusalén. 2 Niman kinkauaskej kiauak sempantlan kampa impan tonas, impan metstonas niman impan sitlaltonas pampa yejuamej okintlasojtlakaj, okintekipanojkaj, okintokakaj, okintlajtoltijkaj niman ikinmauistiliskaj. Niman xakaj kinketsteuas para kintôkas. Ompa xintoskej ken itlaj xixalistli. 3 Yejuan sanken nemiskej de on sanoyej xkuajkualtin tlakamej, san kanon kampa yejuamej nemiskej ijkuak nejua yonikinseseman, yejuamej más kinekiskiaj ma miktetsikan niman maka sa ma nemikan. Nejua, nemoTEKO akin nochi ueli nikchiua, ijki nikijtoua.Itlajtlakol niman icastigo Israel
4 'Tejua Jeremías, xkinmijli on tlakamej in tlajtojli yejuan timitsijlis: 'Ijkuak yakaj uetsi, oksejpa nokuiteua; ijkuak kipoloua iojui, oksejpa kinextia. 5 ¿Tla ijkon, tejua Israel, ¿Tline otinechtlalkauij? ¿Tline tejua Jerusalén, yej nochipa tinechneneki? ¿Tline yej nochipa xtikneki tinechtlakamatis, niman xtikneki timokuepas notech? 6 Nejua nikchixtikaj yakaj ma nechnotsa, pero xakaj nikaki tla nechijlia ika najmana pampa okichiu tlen xkuajli. Noso xakaj nikaki nechjlia: ¿Tlinonon xkuajli onikchiu? Yej nochimej notlalouaj niman kichiuaj tlen kinekij maski xkuajli, kenon caballos yejuan notlalouaj ipan nouisokilistli. 7 Hasta on tototl cigüeña kimati kamanon nokuepas para ichan. On kokotetsin, on tlapayautototl niman on tototl grulla kimatij kamanon yauij oksekan. Pero nemejuamej nokoneuan, uej xnenkimixmatij notlanauatiluan de on tlen noneki nenkitlakamatiskej. 8 ¿Kenijki ueli nenkijtouaj ika nenkipiyaj niman nenkimatij iley toTEKO ijkuak on tlajkuilojkej kijtlakouaj notlanauatiluan? 9 Pero on yejuan noteneuaj tlamatkej nopijpinajtiskej, niman sanoyej nomojtiskej, ken on yolkej yejuan onxinij ipan tlatlalijli. ¿Kanon onkaj intlamatkilis, tla yejuamej xkiseliaj notlajtol? 10 Yejua ika, insiuauan nikinmakas oksekimej tlakamej, niman intlaluan oksekimej nikinyaxkatis. Ijkon nikchiuas pampa nochimej, uejueyimej niman pipitikej, sa kinemilijtokej kenijki kixpachoskej tomin para ricojtiskej. Hasta on tiotlajtojkej niman on tiopixkej nochimej yejuamej tetlachtekiliaj. 11 Nochi kuejkuektlaliaj san achijtsin on tlen kinajmana nokoneuan; kijtouaj kitl nochi kuajli onkaj, ijkuak xitlaj kuajli onkaj. 12 ¡Onkaj miyek tline nenpinauaskiaj pampa nenkichiuaj tlen sanoyej xkuajli yejuan nejua xok nikxikoua! Pero ka, xok nenkipiyaj pinauaualistli. ¡Nion xok nenkimatij tlinonon pinaualistli! Yejua ika, ijkuak nejua nemechcastigaros, nenuetsiskej ken ouetskej on oksekimej. Nejua nemoTEKO ijki nikijtoua.”
13 ToTEKO kijtoua: "Ijkon ken kitekij on trigo, no ijki nikinchiuilis nokoneuan. Ipan on uvajkuamekatl xnokauas nion sen uva, nion sen higo xnokauas ipan on higojkotli. Yej san nokauas ixojyo yejuan pilinki. Nejua tej, nikinkuilis on tlen onikinmakaka."
14 Niman on tlakamej ijkin kijtoskej: "¿Man tline tejuamej titokauaj nikan? ¡Tiaui tinochimej ipan on uejueyikalpamej yejuan kuajli yeualtsaktokej ikan tlakpak tepantli para ma timikikan ompa! ToTEKO Dios, yejua otechtlajtlakoltij para timikiskej; on atl yejuan techmaka para ma tikonikan kipiya veneno, pampa tejuamej otitlajtlakojkej ixpan. 15 Tikchayaj tikseliskej yoltlalilistli ipan topaís, pero xitlaj yoltlalilistli otikselijkej. Tikchayaj chikaualistli, pero yej otikselijkej nemojtijli. 16 ¡Ye uajlauij on totlauelikniuan! ¡Ye uajkakisti desde nepa Dan ken tlajtsomiyaj imincaballos! Ijkuak tsajtsij on caballos, uiuixka nochi tlaltikpaktli. Uajlauij para kuajxoxotoniskej in país niman nochi tlen onkaj nikan, on uejueyikalpanmej niman on chanejkej."
17 ToTEKO kijtoua: "Nemechinuajtitlanilis nemotlauelikniuan. Yejuamej ken kouamej yejuan sanoyej veneno para mechkuajkuaskej. Niman tla omechkuajkuajkej nion ikan magia xuelis nempajtiskej."
Jeremías najmana ipampa ichanejkauan
18 Pampa sanoyej ninokokoua, machisti noyojlo seuisneki. 19 Inajmankatsajtsilis nokoneuan onkakisti imanian in país. Yejuamej ijkin notlajtoltiaj: "¿Xok nemi toTEKO nikan Jerusalén? ¿Xok touan nemi torey?" Niman toTEKO okiminnankilij: "¿Tline onenkichijkej on tlen sanoyej nechkualania? ¿Tline onenkinmauistilijkej on ídolos, on dioses yejuan xnejli dioses yejuan xnenkimixmatij? " 20 Yopanok on xopantlaj, aman yotlan pixkalo, niman tejuamej uej sanken xtechmakistiaj.