9
¡Ojala nixtololojuan yeskiaj ken on ameyaltin, kampa kisaskia miyek nixayo, para nichokaskia nochi tonajli niman nochi tlayoua impampa nochanejkauan yejuan omikkej. 2 ¡Ojala nikpiyaskia ne xalpatlajkan sen kajli kampa nichantiskia, para uejka nikintlalkauiskia nochanejkauan! Ijkin niknekisia nikchiuaskia pampa nochimej okitlalkauijkej iminDios; yejuamej nochimej tepan nokuepaj.3 Yejuamej sa ika nokauaj tlakajkayauaj kenon yejuan tlamotlaj ikan iminarcotlaminal ipan sen nouisokilistli. Tlayekana on tlakajkayaualistli ipan in país; ye nochi ijtlakautiu. Yejua ika toTEKO ijkin kijtoua: "Yejuamej xkinekij kitaskej on tlen kuajli nikinchiuilia." 4 Aman nochi tlakatl ome tlamati itech intlajsojkaikniuan. Niman on iknijtin xok kitlaliaj iminyojlo intech, pampa on iknijtin nokajkayauaj, niman on tlajsojkaiknitin tlamach noteneuiliaj. 5 Cada se kajkayaua okse, niman xakaj kijtoua on tlen melauak. Ika nokauaj tlakajkayauaj, sanoyej xompayejyeuamej, yejuamej xuelij nopatlaj. 6 ToTEKO ijkin kijtoua: "¡Xkaman kauaj ika kinochuiliaj tlen xkuajli niman nochipa nokajkayauaj. Nokoneuan xok kinekej ipan nechitaskej. 7 Yejua ika, nejua nemoTEKO yejuan nochi ueli nikchiua, nikijtoua: "¿Tlinon más uelis nikinchiuilis nokoneuan, yej san nikinuajtitlanilis tlajyouilistli para nikitas tla ijki nokuektlaliaj? 8 Iminnenepil ken itlaj on tlaminaltin yejuan temiktiaj; kinojliaj tlen xmelauak. Maski kuajli tenotsaj niman kintlajpalouaj imintlajsojkaikniuan, yej san kinekij kintlatlaliliskej. 9 ¿Nejua xnikincastigaros ika on tlen kichiuaj? ¿Nejua xnikintlaxtlauilis ken kinmelaua kenon tlakamej yejuan ijkon nouikaj? Nejua nemoTEKO ijki nikijtoua.
10 'Xuiyan ipan tepemej. Ompaka xajmankachokatij niman xmokuikatikan ajmankakuikamej ipan on sakatlan, pampa tlauajuaktok niman nion xok yakaj panoua ompaka. Xok kakisti ken tsajtsij on uakaxtin, niman hasta on totomej niman on yolkej tekuanimej yocholojtejkej. 11 Nejua nikchiuas para Jerusalén ma nokuepa sen teolochojli, kampa niyanaskej on yolkej chacales. Nikchiuas para iuejueyikapanuan Judá nochiuaskej ken xalpatlajkan, niman xok yakaj chantis ompa."
12 Jeremías okitlajtoltij toTEKO: "¿Akinon sanoyej tlamatki yejuan uelis kajsikamatis on tlen yotikchiu? ¿Akinon tikititis in tlajtlamach, para uelis kinmijlis oksekimej tlinon kijtosneki? ¿Tline ijkin yotikxoxotonij in país, tline ijkin tlauajuaktok ken xalpatlajkan kampa xakaj panoua?"
13 ToTEKO ijkin tlanankilia: "Nochi in onochiu pampa on israelitas okintlalkauijkej on tlamachtiltin yejuan nejua onikinmakak. Xokintlakamatkej niman xokichijkej tlen onikinmachtij. 14 Yej, yejuamej yoltechikajkej niman okichijkej ken iminyojlo okinek. Okinmauistiliskej on yejuan xmelauak dioses, ijkon ken iminachtojtajuan okinmachtijkej. 15 Yejua ika, nejua nemoTEKO yejuan nochi ueli nikchiua, iDios Israel, ijkin nikijtoua: 'Nejua nikinkualtis on tlen sanoyej chichik, niman nikinmakas ma konikan atl yejuan kipiya veneno. 16 Nikinchajchayauas ipan on naciones yejuan xkinmixmatij niman nion inuejkatajuan xokixmatkej. Nikchiuas para imintlauelikniuan ma kintojtokakan ikan espadas hasta kampa nion se xnokauas.'"
Ipan Jerusalén onkaj ajmankachokistli
17 ToTEKO yejuan nochi ueli kichiua kijtoua: "¡Xnechkakikan! Xkintekuitlanikan on siuamej yejuan uelij niman san ika nokauaj tepampa chokaj. 18 ¡Nimantsin ma uajlakan niman yejuamej ma chokakan topampa. Niman ma tixtejtemikan ikan tixayo niman tixmojuan ma tentikaj ikan tixayo. 19 Desde ne Jerusalén ualeua on tsajtsilistli de on tlakamej yejuan tlajyouiyaj. Ijkin kijtouaj: '¡Tiktemakaj lástima kenijki yotixpolijkej! ¡Sanoyej tepinajti kenijki titlajyouiyaj! Noneki tiktlalkauiskej totlaluan; tokaluan yokinxoxotonijkej.'"
20 Siuamej, xkakikan itlajtoltsin toTEKO. Xkakikan tlinon yejua mechijlia. Xkintitikan nemochpochuan kenijki chokaskej niman insiuatlajsokaikniuan ijkin ma ajmankachokakan: 21 "On mikilistli okalak ipan tochan, oajsik ipan topalacio. Kinmiktia on kokonej ipan on ueyikalpanojtin niman on telpokamej ne ipan plazas. 22 Inmikatlalnakayo on tlakamej xintitemij ken itlaj on xixalistli ipan on campo, ken itlaj imiyauayo on trigo yejuan uetsi ikuitlapan on yejuan pixka niman xakaj ketsteua."
23 ToTEKO kijtoua: "Maka ma noueyimati on tlamatki ipan itlamatkilis, nion on yejuan kojtik ipan ikojtilis, nion on yejuan rico ipan on tlen kipiya. 24 Tla yakaj kineki noueyimatis, ma noueyimati ika yejua nechixmati. Ma kimati ika nejua niiTEKO, yejuan nitetlajsojtlaj, nitechiuilia tlen kuajli niman tlen melajki pampa on yejuan nechpaktia. Nejua, nemoTEKO ijki nikijtoua."
25 ToTEKO kijtoua: "Yejkos on tonajli ijkuak nejua nikincastigaros nochimej on tlakamej yejuan notlaliliaj ipan imintlalnakayo on neskayotl itoka circuncisión pero xnechtlakamatij ikan nochi iminyojlo: 26 on yejuan chantij Egipto, Judá, Edom, Amón niman Moab, niman nochimej yejuan chantij ipan on xalpatlajkan niman on yejuan nokuanakastlantexikalouaj. Ijkon nochiuas pampa nochimej on tlakamej, niman nochimej on israelitas, melauak xnechtlakamatij ikan nochi iminyojlo.