Isaías
Inoteixmatilis on tiotlajtojketl Isaías niman inoteixmatilis on amamoxtli yejuan okijkuiloj
1
Isaías, ikoneu Amoz, okiselij in tlatlachalistin ken itemikpan, de on tlinon impan nochiuas on chanejkej Jerusalén niman impan nochimej on chanejkej ipan on ueyitlalpan Judá. On tlatlachalistin okinselij ipan on xiutin ijkuak Uzías, Jotam, Acaz niman Ezequías, yejuamej opanotiajkej reyes ne Judá.Sen temachistijli para on chanejkej Judá yejuan xipan kitaj Dios
2 ToTEKO okijtoj: "Tejua cielo niman tejua tlaltikpak, xkakikan tlinon nemechijlia: Nejua onikinmiskaltij nokoneuan, onikimpaleuij hasta ouejueyiyakej, pero yejuamej xipan nechitaj. 3 Sen uakax kixmati iteko niman sen poloko kixmati kampa iteko kitlakualtia, pero on notlapejpeniluan israelitas, xkipiyaj intlamachilis nion xitlaj kajsikamatij."
4 ToTEKO no okijtoj: "¡Sanoyej nentlajyouiskej nemejuamej ueyitlajtlakolejkej yejuan nenkichiuaj tlen sanoyej xkuajli, teuejkakoneuan intech on xompayejyeuamej tlakamej, tekoneuan intech on yejuan sanoyej xkuajli nouikaj! Yonenmejkuanijkej notech nejua nemoTEKO; yonenmoxelojkej notech nejua akin niDios de Israel, yejuan niYektli, niman yonennechtlalkauijkej. 5 Nemejuamej xnenkinekij nentlakakiskej, maski ipan nemotlalnakayo hasta xok onkaj kanon nemechmailis. Nochi nemotsontekon sanoyej tlakokojli, niman sanoyej yonenkuetlaxijkej. 6 Desde nemokxipalko hasta nemokuanepantlaj nochi tlakokojli; nochiuiyan nemokokouaj kampa yonemechmailij. Nochi nemotlalnakayo yonajayochpiloj, sa temalkistikaj; xakaj mechpajtilia nion mechtejkuiyalia, niman xakaj mechseuilia nemonekokol ikan aceite.
7 'Nemotlalpan yokixoxotonijkej, niman nemoueyikalpanuan sanken tlatlatokej. Nemixpan, on nemotlauelikniuan kikuaj on tlen onenkitôkakej. Nochi onokau xoxotontok, kenon ueyikalpan Sodoma ijkuak okixoxotonijkej. 8 Aman Jerusalén sa yejua yonokau, sa iselti ken sen kalmatsintli itlajkotian on uvasyoj, kenon kajkajli yejuan onkaj itlajkotian on kampa tlatokyoj ikan melón. Sa iselti yonokau kenon ueyikalpan yejuan yokiyejyeualojkej itlauelikniuan. 9 Tla nejua nomotoTEKO akin nochi ueli nikchiua xnenmechkauaskia nion nenkeskimej, aman nenyeskiaj ken sodoma niman Gomorra."
Dios xkiselia mauistilistli ken kitocaroua
10 On tiotlajtojketl Isaías ijkin okinmijlij on tlayekankej israelitas: "Nemejuamej tlayekankej ne Israel, xkuajli nemouikaj kenon yejuan chantiyaj Sodoma niman Gomorra. Yejua ika, xkakikan itlajtol toTEKO. Kuajli xkakikan on tlen toDios mechmachtis. 11 Ijkin kijtoua toTEKO: '¿Tline tej sanoyej nennechtlauentlaliliaj? Sanoyej yoniyolajsik ika on miyek uentli yejuan nochi tlatla kampa nenkintlatiaj on borregos niman inchajka on uakaxkokonej. Xok nikneki nikitas inyesyo on uakaxtin, inyesyo on borregos niman inyesyo on chivitos. 12 Nemejuamej nenuajlauij nixpan, pero ¿akinon omechtlajtlanilij para xchojcholokij ikiauak noueyitiopan? 13 Makasa xnechajkuilikan on uentin yejuan xitlaj kijtosnekij; on nemokopalpopoch sanoyej niktlajyelita. Nejua xok nikintasneki on iluimej yejuan nenkichiuaj ipan cada yenkuik metstli niman ipan on sábados, nion ijkuak on xkuajkualtin tlakamej nosentlaliaj. 14 Xok nikneki nikintas on iluimej yejuan nenkichiuaj keskipa ipan se xipan niman on ijkuak yenkuik metstli. ¡Nochi yejua in sanoyej nechkualania niman nion achijtsin xok nikneki nikintas! 15 Ijkuak nemejuamej nenkuiteuaskej nemomauan para nemoueyikatsajtsiliskej, nejua xnemechitas. Niman maski sanoyej miyekpa nenmoueyikatsajtsiliskej, nejua xnenmechkakis, pampa sanoyej yonenkinmiktijkej on yejuan xitlaj tlajtlakojli kipiyaj. 16 ¡Xmopajpakakan, xmochipauakan! ¡Xkejkuanikan nixpan on tlen xkuajli nenkichiuaj! ¡Maka sa xchiuakan on tlen xkuajli! 17 ¡Xuelikan xchiuakan on tlen kuajli. Xchiuakan kanika para xchiuakan on melajkilistli; xpaleuikan yejuan tlajyouiya; xchiuakan tlen melajki ipampa on yejuan iknotl, niman ipan xtlajtokan on siuakauajli ijkuak kinteixpanuiyaj maski xkipiya tlajtlakojli!"
18 ToTEKO kijtoua: "Xuajlakan, ma tikitakan ken tikchiuaskej para tikixtiskej in tlen xkuajli. Maski nemoyojlo sanoyej ijtlakauki ipampa nemotlajtlakoluan, nejua nemechchipauas niman nemechkauas istak ken itlaj nieve. Maski xueli kisa on nemotlajtlakol kenon tlapajli yejuan sanoyej tekoltik ika chichiltik yejuan sanoyej tekuik, nejua nemechistalis ken iichkayo borrego. 19 Tla nemejuamej nennechtlakamatij, nenkuaskej on tlen más kuajli kitlakitis nemotlal. 20 Pero tla nemejuamej saken xnenkinekij nennechtlakamatiskej, ika tlen melauak nemechijlia ika nenmikiskej ipan on nouijsokilistli. ¡Nejua nemoTEKO ijki yonikijtoj nikchiuas!"
Dios kichipauas Jerusalén
21 Isaías kijtoua: "¿Hasta tline ouel otajsik ken sen auilsiuatl, tejua ueyikalpan yejuan tiyolmelajki katkaj? Yeuejkaui on yejuan nikan chantiyaj, nemiyaj ikan chipajkanemilistli niman melajkanemilistli, pero aman nikan chantij san on temiktianimej. 22 Tejua tikatka ken itlaj chipauak plata, pero aman yotiteposkis; tejua tikatka kenon kuajli vino, pero aman san yotimochiu ken atl. 23 On nemotlayekankauan xipanteitanij niman inuan nouikaj yejuan tlachtekej. Nochimej kinokauiliaj ma kinkouakan ikan tomin niman kinekij tlamach ma kintlayokolikan. On iknotsitsimej ximimpan tlajtouaj, niman on kaualtsitsimej xkimpaleuiyaj.
24 'Yejua ika, toTEKO akin nochi ueli kichiua, akin kipiya nochi poder para kimpaleuiya on israelitas, ijkin kijtoua: '¡Nikan tlami! Nejua nimitstlajyouiltis, tejua akin tinotlauelikniu. Nejua nimitstlakuepiltis ipampa nochi motlajtlakoluan. 25 Nimitscastigaros tejua ueyikalpan Jerusalén, para nimitschipauas ken ijkuak kitlatiaj on plata para kixtiliaj tlen xchipauak. 26 Nejua nikchiuas para oksejpa tikimpiyas on jueces ken achtopa tikimpiyaya, niman on tetlakanonotskej ken yeuejkaui nemiyaj. Kemaj oksejpa mitstokayotiskej: 'Ueyikalpan kampa nochiua tlen melajki, Ueyikalpan yejuan xkitlalkauiya tlen kuajli.'
27 'Pampa toTEKO kichiua tlen melajki, kinmakixtis on chanejkej Jerusalén niman nochimej yejuan noyolpatlaskej. 28 Pero on yejuan xipan kitaj toTEKO, niman on tlajtlakolejkej, sanoyej kintlajyouiltis toTEKO, niman on yejuan kitlalkuiyaj toTEKO, mikiskej.
29 'Ijkuakon, nenpinauaskej de on auakojyoj, niman de on xochitlan yejuan sanoyej nenkuelitayaj, on kampa nemejuamej nenkinmauistiliayaj on ídolos. 30 Nemejuamej nenmokauaskej kenon auakojtli yejuan xojyopilini niman nochi xojyoxini, niman ken itlaj xochitlan yejuan xkipiya atl. 31 On yejuan sanoyej kojtikej yejuan nenmotsajlan nemij, nokauaskej kenon kojtli yejuan uaki, niman on tekitl yejuan kichiuaskej, yes ken sen tlimochitl. Sanken yejuamej niman on tlen xkuajli kichiuaskej, nochi kuajli tlatlaskej, niman on tlitl xakaj uelis kiseuis."