8
¡Ah, sanoyej kuajli yeskia tla tinokniu yeskia, tla nonanaj tikchichiskia! Tla ijki yeskia, ijkuak nimitsnamikiskia* ipan calle, ueliskia nimitstejtenkuaskia* niman ijki xakaj kijtoskia xkuajli tlen nikchiua.2 Niman nimitsonkalaktiskia ichan nonanaj, para ompa tinechititiskia on sesekneka ken niuelis nimitsnekis. Niman nimitsmakaskia para tikonis on más kuajli vino niman iyayo nogranadas.
3 ¡Ma kitlali iopochma itsintlan notsontekon, niman ika iyekma, ma nechnapalo!
On ika chikuasen kuikatl
On telpochtli
4 Siuamej de Jerusalén, xnechprometerouilikan, ika xnentechpajsoloskej chika tinemij ipan nejnekilistli!
Ika chikuasen kuikatl
On ichpokamej de Jerusalén
5 ¿Akin siuatl on nepa uajlau ipan on xalpatlajkan, yejuan ualonotiu ikechpan on itlajsojkatsin?
On telpochtli
Tlasintlan de sen manzanajkojtli onimitstlachaltij: kampa monanaj onokokoj ijkuak omitstlakatilij.
Ichpochtli
6 Xkijkuilo notoka ken itlaj sello ipan moyojlo, niman no, xtlali ken itlaj marca ipan moma. On sanoyej ueyi nekilistli xakaj niman xitlaj uelis kipopolos. Nion mikilistli noso on tlalkontli xuelis kipopoloskej. ¡On sanoyej ueyi nekilistli ken itlaj tlitl, tlitl yejuan itech toTEKO oitsmolin! 7 Nochi on atl yejuan onkaj ipan mares xuelis kipopolos on ueyi nekilistli; nion on ríos xueliskej kiseuiskej. Tla yakaj kinekiskia kitemakas nochi tlen kipiya para on nekilistli, yej san kipijpinauiskej.
On ichpokamej de Jerusalén
8 In toknijtsin siuatl. Sanken semi konetl, nion ichichiualuan xe kimpiya. ¿Tlinon tikchiuaskej ijkuak sen telpochtli kuajtlajtlanis para kinosiuatis? 9 Tla iyelpan yeskia ken sen tepantli patlauak, iyeualkan tiktsakuaskiaj ikan tlatsakuyotl de plata para sanoyej kualtsin nesiskia. Pero tla yejua yeskia ken sen tsakuijlotl, tikomepantiliskiaj ikan tablas de cedro para kimanauiskia.
On ichpochtli
10 Nejua nikatka ken itlaj nitepanchinantli, pero aman nochichiualuan ken itlaj on torres. Yejua ika, ixpan on notlajsojkatsin, yoniknextij pakilistli.
11 Salomón kipiyaya sen uvasyoj ne Baal-hamón, niman ompa okinkau tlajpixkej para ma kitekitikan. Ijkuak kitekiyaj on uvas, cada tlajpixki kuajkuiliaya Salomón se mil platajtomin. 12 On se mil platajtomin para tejua Salomón, niman on ome ciento para on tekitkej. ¡Nouvasyoj sano nejua nicuidaroua!
On telpochtli
13 Xnechkauili ma nimitskaki ijkuak titlajtoua, tejua reina de on miyek xochitlan! ¡On totlajsojkaikniuan kinekij mitskakiskej!
On ichpochtli
14 Xisijkauiya notlajsojkatsin, ken sen masatl, noso ken ikoneu on yolki itoka gacela yejuan yau ipan on tepemej kampa onkaj miyek ajuiyakistli!