On telpochtli
7
¡Mokxiuan sanoyej kualtsitsimej nesij ikan mokakuan, tejua kualtetsin ikoneu rey! Mometskojyouan hasta kualtsin nojnoltikej. Nesij kenon kualnesyotl tlachijchijtli ikan oro yejuan más kuajli, yejuan okichijchiu sen kuajli tlamachijchijketl. 2 Moxiktsin kualtsin yeualtik. Nesi ken sen copa yejuan nochipa tentikaj ikan tsopelik vino. Maxixtekontsin nesi ken olochojli de trigo yejuan okixochotijkej iyeualkan ikan askalxochitl. 3 Mochichiualtsitsiuan nesij kenon ome masakokonej gacelas yejuan kouatsitsimej. 4 Mokechkojyotsin nesi kenon kualtetsin torre tlachijchijtli ikan on marfil. Mixtololojtsitsiuan nesij petlantokej kenon ameltsitsimej yejuan onokej ipan on ueyikalpan Hesbón, nisiu on tsakuijlotl itoka Bat-rabim. Moyaktsin nesi ken on torre yejuan onkaj Líbano yejuan ontlachixtikaj kampaka onkaj on ueyikalpan Damasco. 5 On motsontekon ipan motlalnakayo nesi ken ikuapan on tepetl Carmelo. Motson nesi ken ikpatl yejuan tlapajloj tekojkoltik. ¡Ijkon ken kualtsin nesi motson, san katlejua rey xuelis nomanauis de motech!6 Tejua notlajsojkatsin sanoyej tikualtetsin, ¡niman sanoyej tinechyoleua! 7 Motlalnakayo kualtetsin pampa tiueyisiuatl, niman tinesi ken sen palmera. Mochichiualualtsitsiuan sanoyej kualtsin nesij. Nesij kenon uvas yejuan tejtematstik. 8 Nejua onikijtoj: "Nitlejkos ipan on palmera niman niktekis para nejua on itlakyo." Xmokauili tej, on mochichiualtsitsiuan ma nochiuakan kenon uvas tejtematstik, niman mokamak ma ijnekuisti ajuiyak kenon uelki manzana. 9 On motentsin, nochiua ken itlaj vino tsopelik yejuan sanoyej nikuelilia ijkuak nikoni, niman nikuelmati ijkuak panoua nokamak.
On ichpochtli
10 Nejua niiyaxka on notlajsojkatsin, niman inekilis kichiualtia para nechtejtemoua. 11 ¡Xuajla notlajsojkatsin, ma tiuiyan neka ipan campo! Ompa titokauaskej in tlayoua, ijtik on xochiyoj de on ajuiyak xochitl itoka alheña. 12 San uajtlanesi tiaskej kampa onkaj on tlatoktli de uvas, para tikontaskej tla ye itsmolintikaj, tla ye xochiyouatikaj, niman tla yoxochiyouak on granadoskojtin. ¡Ompa nimitsititis ken sanoyej nimitsneki! 13 On xojtli mandrágoras kichayaua iajuiyalis. Tokiauatempan onkaj miyek sesekneka uelik fruta, yejuan tetsoltik niman yejuan kemach okitejtekej, yejuan tejua, notlajsojkatsin, onimitseuilij.