Eclesiastés
ACHTOJ TLAXELOJLI: SANENKAJ NEMILISTLI IJKUAK YAKAJ XNOUIKA IUAN DIOS (1.1-11)
ON TLEN SANENKAJ NOCHIUA (1.1 - 3)
1
Ijkin okijtoj ikoneu David, on Temachtijketl yejuan rey katka ne Jerusalén:2 ¡San tlaixkajkayaua! ¡Nochi on tlajtlamach* tlen onkaj san tlaixkajkayaua! 3 ¿Tlinon kitlanis sen tlakatl tla sanoyej tekiti ipan in tlaltikpaktli?
SANENKAJ EJEMPLOS YEJUAN SAN OMPA NOKUEPTOKEJ (1.4 - 11)
4 Chika sekimej tlakamej tlakatij, oksekimej mikij, pero in tlaltikpaktli xkaman nopatla. 5 On tonaltsintli kisa, on tonaltsintli kalaki, niman kemaj nimantsin oksejpa yau kampa ompeua para oksepa kisa. 6 On ajakatl tlalpitsa tlatsintlankopa; kemaj nokuepa tlakpakopa. ¡Nokuepa niman oksejpa nokuepa on ajakatl! ¡Ijkon tej, xkaman noteltia! 7 Nochimej on atepeyamej ajsij ipan mar, pero on mar xkaman temi. Kemaj on atl oksejpa tlejkoua, nokuepa moxtli niman kiaui; kemaj on atl nochiuaj atepeyamej niman oksejpa ajsij ipan mar. 8 Xakaj uelis nochi kijtos, kech ika teyolajxitij on tlajtlamach tlen nochiua. Xakaj kita itlaj noso kaki itlaj niman kijtoua aman yoniyolpachiu.
9 On tlen ye onkatka, sano yejua onyas; xitlaj okse nochiuas, on tlen yonochijka achtoj, san no yejua nochiuas. ¡Ipan in tlaltikpaktli xitlaj onkaj yenkuik! 10 Yakaj uelis kijtos: "¡In kemaj yenkuik!" Pero on no ijki ye onkatka miyek xipan ijkuak xe tinemiyaj. 11 On tlajtlamach* tlen yonochiu yokelkajkej, niman on yejuan uajnemiskej no kelkauaskej on tlen tikchiuaj aman.
SANENKAJ EJEMPLOS YEJUAN ON TLAJKUILOJKETL KINMIXMATI (1.12 – 2.24)
Se sanenkaj kichiua kanika para tlamatki yes
12 Nejua akin niTemachtijketl onitlamandaroj ken rey intech on israelitas ipan on ueyikalpan Jerusalén. 13 Niman ika oninokau oniktejtemoj niman oninomachtij ikan tlamatkilistli nochi tlen nochiua ipan in tlaltikpaktli. Onikitak ika Dios okinmakak on tlakamej sen sanoyej chikajkatekitl para kinmiknopiya. 14 Niman onikajsikamat ika nochi tlen nochiua ipan in tlaltikpaktli san tlaixkajkayaua, ijkon ken tla yakaj tlakatl kinekiskia kajsis ikan ima on ajakatl.
15 ¡No ijki, xakaj uelis kimelajkatlalis on tlen noltik, nion xuelis yakaj kipouas on tlen xonkaj!
16-17 Kemaj onikijto san nojtikopa: "Nikan nennechpiyaj, ken sen niueyixtikaj, más nitlamatki xken nochimej on yejuan otlamandarojkej achtoj ne Jerusalén, ika oninokau para nikajsikamatis on tlaixmatkilistli niman on tlamatkilistli, niman no hasta onikajsikamat tlamach tontojyotl. Pero nochi in no ijki ken tla yakaj kinekiskia kajsis ikan ima on ajakatl." 18 Tlakaj melauak, on miyek tlamatkilistli, no kuajki ueyi ajmantli; ijkuak yakaj más tlamatki, no más tlajyouiya.