Tlajtoltin yejuan okijtoj on rey Lemuel
31
In yejua on tlajtoltin yejuan okijtoj on rey Lemuel, yejuan okiselij itech inanaj.2 "Nokoneu, notlajsojkakoneu yejuan oniktlajtlanilij Dios. ¿Tlinon uelis nimitsijlis? 3 Maka tikinmakas mochikaualis on siuamej, pampa yejuamej kipiyaj tlajtlakojli ika on reyes nixpolouaj. 4 Lemuel, xkuajli para on reyes niman on yejuan uejueyixtokej koniskej vino niman nochi tlen tetlauantia, 5 pampa tla ijkon kichiuaj, tlauaniskej niman kelkauaskej on leyes, niman xkinmanauiskej on yejuan mayankej. 6 On vino niman nochi tlen tetlauantia, xkinkauili ma konikan on yejuan ye mikiskej niman on yejuan sanoyej tlajyouiyaj. 7 ¡Ma konikan para ma kelkauakan iminajmanalis, niman para makasa ma tlajyouikan!
8 'Tejua xtlajto impampa yejuan xueli tlajtouaj. ¡Niman on yejuan kinkuiliaj tlen iminyaxka, xkiminmanauili! 9 Iminpampa xtlajto, niman xchiua tlen melajki. Xkinmanaui yejuan mayankej niman yejuan xitlaj* kipiyaj!"
Ueyi tlakaitalistli kiselia on siuatl yejuan sanoyej tekimatki
10 Sen siuatl yejuan sanoyej tekimatki niman sanoyej kuajli nouika, ¿akinon uelis kinextis? !Sen siuatl kenon, más sanoyej tlajsojtli xken on tetsitsimej yejuan kualtsitsimej niman patiojkej!
11 On tlakatl kitlalia nochi iyojlo itech isiuau, niman yejua nochipa kipiyas tlajtlamach* yejuan noneki.
12 On siuatl kimaka iueuetsin nochi tlen kuajli ipan nochi inemilis niman xkaman kimaka tlen xkuajli.
13 On siuatl, yau kontejtemoua lana* niman lino, niman sanoyej kuelita kimaijtsoma tlajtlamach*.
14 Yejua, ken sen barco tlasemanketl. Ijkon tej, yau uejka konkui tlajtlamach* tlakuajli para ichan.
15 Saniman nokuiteua ijkuak xe tlanesi, niman tlakualchiua tlakuajli para kintlakualtia ikoneuan niman kintekimaka isiuatlakeualuan.
16 Yejua, yau konixtlaloua sen tlajli, niman koua. Niman ika on tomin yejuan kejtikaj, tlakoua para kitlatôkilia on tlajli ikan uvas.
17 Yejua kipiya chikaualistli niman sanoyej tekiti chikauak nochi tonajli.
18 Kipiya cuidado para on tlen kinamaka ma miyekiya, niman hasta tlayoua sanken* tekiti.
19 Sano yejua kichijchiua ikpatl niman kinochijchiuilia tela.
20 Nochipa kimpaleuiya yejuan mayankej niman yejuan xitlaj* kipiyaj.
21 Yejua, xnotenmati ipampa ifamilia ijkuak tlasekuuetsi, pampa nochi ifamilia kipiya itlaken tilauak.
22 Sano yejua kinochijchiuilia itojmiuan, niman notlakentia ikan tlakentli* tekojkoltik yejuan patioj.
23 Iueuetsin sanoyej kixmatij ipan on ueyikalpan. Niman teuan nopoua intech on tlakamej yejuan más kintlakaitaj.
24 On siuatl, kinchijchiua tlakentin ueueyakej de lino niman kinchijchiua xijlan ilpikamej. Kemaj kinnamakiltia on tlasemankej.
25 Yejua kipiya chikaualistli niman tlakaitalistli, niman xkontenmatstikaj tlinon nochiuas más sakin*.
26 Nochipa tlajtoua ikan tlamatkilistli, niman ikan tetlajsojtlalistli* temachtia.
27 Nochipa tlachixtikaj para maka itlaj ma poliui ichan, niman nochi on tlen kikua iuan ifamiliaj kixtia ipan itekiu.
28 Ikoneuan niman iueuentsin* kitlajsokamachiliaj, niman ijkin kiueyiteneuaj:
29 "Miyekej nemij kuajkualtin siuamej, pero tejua más tikuajli de nochimej."
30 Ikualtsintilis sen siuatl san panoua, niman maski nesi kuajli nouika, ueli tlaixkajkayaua. Pero sen siuatl yejuan kitlakaita toTEKO, kitocaroua ma kimakakan kualtsin ueyiteneualistli.
31 !Ma kipakilisteneuakan inmixpan nochimej! !Ma kimakakan sen tetlayokolijli pampa sanoyej kuajli tlen yokichiu!