Uejueyitlajtoltin yejuan okijtoj Agur
30
Uejueyitlajtoltin yejuan okijtoj Agur, itelpoch Jaqué, yejuan chanej* Masa. Agur ijkin okijlij Itiel niman Ukal:2 "Nejua nimas ueyitonto ipan in tlaltikpaktli. Xniueli ninouika ikan tlamatkilistli, nion xitlaj* nikajsikamati ken oksejkimej tlakamej. 3 Hasta aman xniueli ninochiua nitlamatki*. Nion xitlaj* nikmati de on Dios yejuan Yektli.
4 ¿Akinon yotlejkotoya ipan iluikak kampa Dios nemi
niman sejpa otemoko para ueli techijlia ken nemi?
¿Akinon uelis kimapichos niman kipiyas ajakal ipan imakpal?
¿Akinon uelis kitepayolsalos on mar ipan sen capa?
¿Akinon okitlalilij itlajtlankan on tlaltikpaktli?
¿Ken itoka, niman ken itoka ikoneu?
5 "Nochi ipromesas toTEKO ajsitikaj*. Yejua ken se tepostlatsakuilijli, yejuan kimejeua yejuan kitlaliaj inyojlo itech yejua. 6 Yejua ika, maka tiknekis tikalaktis ipan itlajtol Dios itlaj yejuan san tejua tiknemilia, pampa yejua mitsajuas niman kipannextis ika titlakajkayaua. 7 NoTEKO, nejua san ome nikpiya tlinon timitstlajtlanilia. Xnechmaka chika xe nimiki: 8 Xkixti ipan noyojlo omexayakalistli niman tlakajkayaualistli. Niman maka tinechmakas riquezas nion mayantli, yej san xnechmaka on tlen nikuas mojmostla. 9 Ijkon xchiua pampa tla tinechmakas riquezas uelis timitsnenekis niman nikijtos xtimitsixmati, niman tla xnikpiyas tlen nikuas, uelis yej nitlachtekis niman nikijtlakos moYektokatsin.
10 "Maka tikteixpanuis sen esclavo itech iteko, pampa on esclavo uelis mitstlauelis, niman itlaj mopan nochiuas yejuan xkuajli.
11 "Nemij sekimej yejuan kuijuikaltiaj imintataj niman xkitlajsotla iminnanaj. 12 Nemij sekimej yejuan noteneuaj sanoyej chipajkej ixpan Dios, pero iminyojlo kipiyaj tentika ikan tlajtlakojli. 13 Nemij sekimej yejuan noteneuaj sanoyej uejueyixtokej, niman kinta oksekimej ikan noueyimatilistli. 14 Nemij sekimej yejuan kimpiyaj imintlanuan ken itlaj espadas niman imintlankochuan ken itlaj cuchillos, para ika kintlayouiltia, on mayankej niman kintlachtekiliaj yejuan xitlaj* kipiyaj ipan in tlaltikpaktli.
15 "Sen akoyachin kipiya ome ikoneu, se itoka “Xnechmaka ” niman okse itoka "Xnechmaka más". Onkaj yeyi tlajtlamach*, noso hasta naui, yejuan xkaman yolpachiuij:
16 on tlalkontli,
sen siuatetsakatl,
sen tlajli uatsaltik yejuan kineki kiautli
niman on tlitl yejuan kineki más kitlatis kojtli.
17 "Yejuan kitlauelita itataj niman kipijpinauiya inanaj lamajtsin, ma kixkojkopinakan on kakalomej niman ma kikuakan on tsojpilomej.
18 "Onkaj yeyi, noso hasta naui on tlen sanoyej ouijtikaj* yejuan nechtlatlachaltia niman xueli nikajsikamati:
19 ¿Kanon onojuitij sen kuaktli ne ipan cielo?
¿Kanon onojuitij on kouatl ne ipan on temej?
¿Kanon onojuitij sen barco ne ipan mar?
¿Niman kenijki sen tlakatl kitlapololtia sen ichpochtli para isiuau?
20 No ijki nechtlatlachaltia niman xueli nikajsikamati ken sen tesiuau yejuan auilnemi ijkin kichiua: Ijkuak yonotekak iuan sen tlakatl, naltia, niman kijtoua: 'Nejua xitlaj* nikchiua tlen xkuajli.'
21 "Onkaj yeyi tlajtlamach* tlen nochiua, noso hasta naui, yejuan on tlaltikpaktli xueli kixikoua:
22 Sen esclavo yejuan tlejkotiu hasta ajsi rey,
sen tlakatl tonto yejuan hasta kisobraroua tlen kikua,
23 sen siuatl yejuan sanoyej tetlaueltik, pero ueli kinextia iueuentsin,
niman sen esclava yejuan kitlakakuilia isiuateko.
24 Nemij nauimej yolkatsitsimej ipan in tlaltikpaktli yejuan nesi ken más tlamatkej* xken on tlamatkej* tlakamej:
25 On tsikamej, maski pipitikej niman xkojtikej, kisentlaliaj intlakual ijkuak tonalko,
26 on pepesojmeja yejuan nion xkojtikej pero uelij kichijchiuaj inchan intsajlan on temej,
27 on chapolimej, maski xkipiyaj iminrey, ijkuak nejnemij notekpantiuij ken soldados,
28 on tlalkonetl, maski uelis tikmaajsis, chanti ipan ipalacio sen rey.
29 Nemij yeyimej noso hasta nauimej yejuan kualtsin melajkanejnemij:
30 On leones yejuan yolkej más temojtijkej niman xitlaj* okse yolki kimakajsij,
31 on kaxtil* noueyimatki yejuan ikuatsitsikil kualtsin chichiltik,
no ijki sen tepechivo melajkanejnemi,
niman on rey yejuan melajkanejnemi ijkuak kinyekana isoldados.
32 Tla ika motontojyo tiknemilia ika sanoyej tiueyixtikaj, niman tiknemilia tiktechiuilis itlaj xkuajli, xmotelti niman xmonemili.
33 Tla tikneneloua leche, nochiua mantequilla, niman tla chikauak timijtsomiya, tiyakayeskisa. No ijki tla yakaj tikpajsoloua, teuan tikpiyas tlauejli."