29
Yejuan miyekpa xkineki kakis ijkuak kajuaj, kipopoloskej niman xkaman uelis kualtias.2 Ijkuak tlamandarouaj on yolmelajkej nochi tlakatl paki, pero ijkuak tlamandarouaj on xompayejyeuamej nochi tlakatl xpaki.
3 Sen tekoneu yejuan tlamatki* kipaktia itataj, pero sen tekoneu yejuan kistinemi iminuan on siuaauilnenkej kinempoloua tomin.
4 On rey yejuan kuajli tlayekana niman kichiua itekiu melajki, kichiua para ipaís más kajsi poder. Pero sen rey yejuan san kuelita kitekixtilia sanoyej miyek impuestos, kitlajkali ipaís.
5 Yejuan tenojnotsa ikan kualtsin tlajtojli, kitlalia sen tlatlalijli para sa no yejua ipan uetsis.
6 Sen tlakatl xompayejyeua sano yejua notlatlalilia ika itlajtlakoluan, pero sen tlakatl yolmelajki nemi ikan miyek paktli.
7 Sen tlakatl yolmelajki kineki para ma kiselikan tlen kuajli on mayankej. Pero on tlen kuajli kiseliskiaj on mayankej, xitlaj* kijtosneki para sen tlakatl xompayejyeua.
8 Tlakamej yejuan kuelita tekauetskaj kinajkomana on chanejkej ipan sen ueyikalpan, pero yejuan tlamatkej* kinyolseuiyaj on chanejkej.
9 Tla sen tlakatl tlamatki* iuan noteixpanuiya sen tlakatl tonto, on tonto sanenkaj kualanis niman tekauetskas, pero xitlaj* kuektlalis iuan.
10 On tlakamej temiktianimej, kitlauelitaj niman hasta kinekiskiaj ma kimiktikan sen tlakatl yejuan kuajli nouika.
11 Sen tlakatl tonto xpinaua teixpan kualani ken yejua kineki, pero sen tlakatl tlamatki* ueli kiteltia itlauel.
12 Tla sen ueyi tekiuaj kuelita kajkaki tlakajkayaualistli, nochimej iueyitekitkauan nochiuaskej xompayejyejkej.
13 Sen mayanki niman yejuan tetlajyouilitia san nochijkej tlachichijtin, pampa toTEKO okinmakak nochimej on omemej iminixtolouan ijkuak okinchijchiu.
14 Sen rey yejuan kuajli kinmanauiya on mayankej, uelis nochipa yejua tlamandaros.
15 Ijkuak sen konetl kajuaj niman kitlajtlatsuitekij, kiselia tlamatkilistli. Pero sen konetl yejuan xkajuaj, kipinajtia inanaj.
16 Ijkuak on tlakamej xompayejyeuamej miyekiyaj, on tlajtlakojli no miyekiya. Pero on tlakamej yejuan kuajli nouikaj, kitaskej kenijki uetsiskej on xompayejyeuamej.
17 Maka xkauili mokoneu ma kichiua tlen xkuajli, niman tikpiyas yolseuilistli, niman mitsmakas miyek pakilistli.
18 Kampa xtoTEKO tlayekana, xitlaj* onkaj melajki. ¡On tlakamej pakij ijkuak kitlakaitaj ileyes Dios!
19 On esclavo xueli kiyektlaliaj san ikan tlajtojli. Maski ueli kajsikamati tlinon kijliaj, xtetlakamati.
20 Itech sen tonto, más uelis tikselis itlaj tlen kuajli, xken itech se yejuan san tlajtojtetsi niman nion xkinemilia tlinon kijtoua.
21 Tla sen esclavo konetl san kauiliaj ma kichiua tlen xkuajli niman ma kipiya nochi tlen kineki desde ijkuak konetl, ijkuak tlakatias kitemakas amantli.
22 Sen tlakatl yejuan niman kualani, kichiua para ma nouijsokilo, niman kichiua miyek tlajtlakojli.
23 Sen tlakatl yejuan noueyimati más sakin* kipijpinajtiaj, pero yejuan xnoueyimati más sakin* uej kiueyiteneuaj.
24 Tla iminuan timoneloua on yejuan tlachtekij, kijtosneki sano tejua xtimotlajsojtla. On juez mitscastigaros tla tikmokuitia on tlen xkuajli otikchiu, niman Dios mitscastigaros tla xtikmokuitia.
25 Ijkuak timomojtia itlaj mitschiuiliskej on tlakamej, on mojkayotl ken sen tlatlalistli para tejua. Pero tla itech toTEKO tiktlalia moyojlo, yejua mitsmanauis.
26 Miyekej yauij itech sen tekiuaj para ma kimpaleui, pero on melajkilistli san kitemaka toTEKO.
27 On kuajkualtin tlakamej xkinuelitaj on xompayejyeuamej, niman on xompayejyeuamej xkinuelitaj on kuajkualtin tlakamej.