28
On tlakatl xompayejyeua, ontlaksa maski xakaj kitojtoka, pero on tlakamej yolmelajkej yolchikajkej nemij ken sen león.2 Ijkuak on tlakamej ipan sen país xkuajli nouikaj, on país kimpiyas miyekej tekiuajkej yejuan sa nopatlatiaskej. Pero sen tlayekanki yejuan tlakajsikamati niman tlamatki*, ueli kinteltlalia nochimej on tlakamej para xok najkomanaj.
3 Sen tekiuaj xompayejyeua yejuan kintlajyouiltia on mayankej, ken itlaj ajakakiautli yejuan kajkotoktia on tlatoktli.
4 Yejuan xkitlakaitaj iley toTEKO kimpakaitaj on tlakamej xompayejyeuamej. Pero yejuan kitlakamati on ley, kintsakuilia on tlakamej xompayejyeuamej.
5 On xompayejyeuamej xkajsikamatij on melajkilistli, pero yejuan kitejtemouaj toTEKO nochi kajsikamatij.
6 Más kuajli tla se mayanki niman kipiya tlakaitalistli, xken sen rico niman xkipiya tlakaitalistli.
7 Yejuan kitlakamati iley toTEKO yejua sen tekoneu tlamachilisyej, pero sen tekoneu yejuan iminuan noneloua yejuan tlakuatemej, kimpinajtia itajuan.
8 Yejuan kimiyekilia iriquezas ika itlanka on tomin yejuan kitetlanejtia, on riquezas xpara yejua, yej imak ajsis okse tlakatl yejuan kinmiknelia on mayankej.
9 Yejuan xkinekis kitlakamatis ileyes Dios, Dios no xkinekis kakis iueyikatsajtsilis.
10 Yejuan kichiua para ma tlajtlakokan on kuajkualtin tlakamej, sano yejua notlatlalilia ika on tlen xkuajli kichiua. Pero on tlakamej yejuan kuajli nouikaj impan nochiuas nochi tlen kuajli.
11 Sen rico sano yejua noteneua sanoyej tlamatki*, pero sen mayanki yejuan tlamatki ueli kita ika xitlaj kimati.
12 Ijkuak tlamandarouaj on yolchipajkej, hasta nochiua iluitl, pero ijkuak tlamandarouaj on xompayejyeuamej, on tlakamej niyanaj.
13 Yejuan xkinokuitia itlajtlakol, xkaman kiselis tlen kuajli, pero yejuan noyolkuitia niman xok kichiua on tlajtlakojli, kitlapojpoluiyaj.
14 Sanoyej pakis yejuan nochipa kitlakaitas toTEKO, pero yejuan yoltechikauak uetsis ipan tlen xkuajli.
15 Sen xkuajli tekiuaj yejuan kinmandaroua on mayankej, ueli tekokoua ken sen león nanalkaketl noso ken itlaj oso yejuan san kitejtemoua tlinon kikuas.
16 Sen tekiuaj yejuan tonto kintlajyouiltia on mayankej, pero sen tekiuaj yejuan xkineki san tepalricojtis, kipiyas ueyi nemilistli.
17 Sen tlakatl yejuan temiktia xkaman kipiyas yolseuilistli hasta ijki mikis. ¡Maka yakaj kinekis kipaleuis!
18 Sen kuajli tlakatl, xitlaj* ipan nochiuas, pero yejuan xnouika kuajli, itlaj xkuajli amanaman ipan nochiuas.
19 Yejuan kitlatȏkilia itlal, xkaman kipolos tlen kikuas. Pero on yejuan xtekiti, nochipa mayanki yes.
20 Sen tlakatl yejuan kipiya tlakaitalistli kiselis iueyitlaxtlauil, pero yejuan sanoyej kineki ricojtis kiselis icastigo.
21 Xkuajli para titechichikoitas, pero sekimej hasta ika se pitetsin pan, tlajtlakouaj.
22 Yejuan sanoyej tsotsokatl, kineki nimantsin ricojtis, pero xkimati ika nimantsin ipan uajlas mayantli.
23 Más sakin*, nochimej kitaj ika más kuajli yejuan teajua, xken yejuan xteajua niman yej tenotsa ikan tlajtojli yemanki.
24 Yejuan kintlachtekilia itajuan niman kijtoua ika xtlajtlakoua, no ijki nouika kenon xompayejyeuamej.
25 Yejuan nexikolej, kichiua para ma onya tlauejli. Pero yejuan kitlalia iyojlo itech toTEKO, kiselis tlen kuajli.
26 Sen tlakatl yejuan tonto kitlalia iyojlo ipan itlamachilis. Yejua ika xmouika ken kijtouaj on tlakamej yejuan más tlamatkej* xken tejua niman ijkon tikmokixtilis on tlen ueli tekokoua.
27 Yejuan kipaleuiya sen mayanki, xitlaj* poliuis ipan ichan. Pero yejuan xitlaj* ika kipaleuiya sen mayanki, sanoyej kuijuikaltiskej.
28 Ijkuak tlamandarouaj on xompayejyeuamej, on tlakamej nijiyanaj. Pero ijkuak uetsij on xompayejyeuamej, on yejuan yolmelajkej nokuiteuaj niman yejuamej oksepa tlamandarouaj.