27
Maka xtexixikolti ijkuak tikijtoua on tlinon tikchiuas mostla, pampa xtikmati tlinon nochiuas mostla.2 Maka sano tejua xmoueyiteneua, yej xkinkauili oksekimej ma mitsueyiteneuakan.
3 On tetl niman xajli yetik, pero más yetik on tlauejli yejuan sen tonto kinchiuilia oksekimej.
4 On kualanilistli kichiua xkuajli, niman on tlauejli tlaxoxotonia, pero on chauatilistli, ¿akinon uelis kixikos?
5 Más kuajli se ixkotian tikajuas, xken tla yakaj yejuan tiktlajsotla, niman xtikijlis.
6 Ijkuak mitsajua sen motlajsojkaikniu, más kuajli xken sen motlauelikniu yejuan mitskajkayaua ijkuak mitstenkua.
7 Yejuan ixuitikaj, hasta on nekutli xkiselia para kikuas, pero yejuan apismiki, hasta on tlen chichik kimati tsopelik.
8 Sen tlakatl yejuan kistinemi uejka de ichan, ken itlaj tototl yejuan kistinemi uejka de itepajsol.
9 Ijkon ken sen ajuiyalistli yejuan patioj kiyolpaktia yakaj, no ijki kipaktia ialmatsin ijkuak itlajsojkaikniuan* kimakaj kualtsin tetlakanonotsalistli.
10 Maka kaman tikauas motlajsojkaikniu, niman itlajsojkaikniuan* motataj. No ijki maka xkikti moproblema ichan mokniu. Más kuajli tla tikiktis moproblema ichan monisiuchanejkau yejuan chanti nisiu xken mokniu yejuan uejka chanti.
11 Nokoneu, xpiya tlamatkilistli, niman on nechpaktis. Ijkon uelis nikinnankilis yejuan nechijijtouaj.
12 Sen tlakatl yejuan kuajli tlanemilia, ijkuak kita itlaj xkuajli nochiua, nejkuania. Pero sen yejuan xkuajli tlanemilia, yej más yau, niman ijkon itlaj ipan nochiua.
13 On tlakatl yejuan kipaleuiya yakaj yejuan xkixmati para ma kitlanejtikan tomin, ma kuilikan itlaken, niman maka kimakaskej hasta ijkuak on xchanej kitlaxtlauas on tlen okinotlaneuij.
14 Hasta sen kualtsin tetlajpalojli, tekualanij sano ijki ken sen tlauijuikaltilistli, tla se kitlajpalouaj chikauak ijkuak uejka kualkan.
15 Sen siuatl yejuan nochipa tekamauijsoki, tepajsoloj ken itlaj atl yejuan xkaman noteltia ika chipintikaj ijkuak xopantla. 16 Tla yakaj kinekis kitlakaualtis on siuatl, on ken kinekiskia kiteltis on ajakatl, noso ken ipan ima kinekiskia kitekaskia aceite.
17 Ijkon ken sen tlakatl kitekitiltia sen tepostli para kitentia okse tepostli, no ijki sen tlakatl kiueliltia itlaj okse yakaj tlakatl.
18 Yejuan cuidaroua sen higuerajkojtli, sano yejua kikua itlakyo. Niman yejuan kuajli kitlacuidarouilia iteko, on iteko kitlakaita.
19 Ipan on atl, sen tlakatl nesi kenemej ixko, niman on ken yejua nouika, ompa nesi kenemej iyojlo.
20 On mikilistli, on tlalkontli, niman on xkuajli ieleuilis* on tlakatl, xkaman yolpachiuij.
21 Ijkon ken sen tlakatl kitlatia on oro niman plata para kita tla chipauak, no ijki sen tlakatl kitlatlataj ika on kualtsin tlajtoltin yejuan kijliaj.
22 Sen tonto xkaman kaua itontojyo maski tiktijsis ken tikijsij tlayojli, niman maski hasta okpa tiktisis.
23 Kuajli xkintlajpiya moborregos niman mochivos; hasta kampa tiuelis sanoyej kuajli xkincuidaro, 24 pampa ye tikmatstokej ika nion on riquezas, nion on naciones xnochipa onyaskej. 25 Ijkuak uajkisas on sakatl, niman tlaxoxouiyas, niman kisentlaliskej on xojtli, 26 on moborregos mitsmakaskej intsojmiyo para tikchijchiuas motlaken, niman on mochivitos tikinnamakas para tikouas motlaluan ika on tomin. 27 Niman on oksekimej yejuan siuachivos tikimpatskas para tikintlakualtis mofamilias niman nochimej on yejuan mitstekichiuiliaj.