26
On yejuan tonto xkinamiki kitlakaitaskej, ijkon kenon nieve xkinamiki xinis ijkuak tonalko, nion xkinamiki kiauis ijkuak pixkatlaj.2 Ijkon ken sen tototl yejuan xkipiya kanon notlalis noso ken sen tlapayautototl yejuan xkipiya itepajsol, no ijki on tlauelijli xuelis kipajsolos yakaj tla xkipiya tline.
3 Xtlatsuiteki on caballo para tikmachtis, on poloko xkamapacholti tepotstli para tikteltis niman on tlakatl yejuan tonto xmaili ikan kojtli itlakapan.
4 Tla tiknankilia sen tonto ika itontojyo, tejua no ijki timochiuas ken yejua. 5 Yej xnankili ken kitocaroua para ma kimati ika xkuajli tlinon okijtoj.
6 Tla tiktlajtlanilia sen tonto para ma kiteijliti itlaj maluijli, on kijtosneki ken timokxitsojtsontekiskia niman timokalaktiskia sano tejua ipan problemas.
7 Ijkon ken ikxiuan sen uilatsin xitlaj* ika kipaleuiyaj pampa xkojtikej, no ijki iueyitlajtol sen tonto xitlaj* kijtosneki.
8 Ijkon ken xkinamiki kisalouaj sen tetl ipan sen tematlatl, no ijki xkinamiki para sen tonto kiselis tetlakaitalistli.
9 Ijkon kenon tlauanki xkimati tla kipiya uitstli ipan ima, on tonto no xkimati tlinon kijtosneki sen tlamatki* tlajtojli.
10 Yejuan kimaka tekitl sen tonto noso san akinon, nochiua ken sen arcojtlamotlaketl yejuan sa kenijki tlamotla. 11 Ijkon ken sen chichi* oksejpa konkua isotlal, no ijki sen tonto yejuan oksejpa kichiua itontojyo.
12 Hasta uelis más kuajli kijtos itlaj sen tonto, xken sen noueyimatki tlakatl yejuan noteneua tlamatki* niman xnejli tlamatki.
13 Sen tlakatl yejuan tlatsijki san para xontekitis, ika notlamiya kitl nemi sen león yejuan kikuasneki ne ipan ojtli.
14 Ijkon kenon tsakuijlotl nopalakachoua ipan ibisagra, no ijki nemi on tlakatl yejuan tlatsijki nokuejkueptok ipan itlapech.
15 Sen tlakatl yejuan sanoyej tlatsijki, mayaui ipan ikax, pero tlatsiui kiktis itlakual hasta ikamak.
16 On tlatsijki, kinemilia ika yejua más tlamatki* xken chikome tlakatl yejuan kimatij ken tlanankiliaj.
17 Yejuan nokalaktia ipan sen nokamauijsokilistli kampa xkitocaroua, on ken sen tlakatl kajsiskia sen chichi* ipan inakasuan.
18 Ijkon ken sen loco tlajtlamotla san kanon ikan tlaminajli tliyoj sen loco tlajtlamotla san kanon ikan tlaminajli tliyoj, 19 no ijki sen tlakatl yejuan kajkayaua itlajsojkaikniu, niman kemaj sakin* kijlia ika san kamanaloua.
20 Tla on tlatilkojtli tlami, seui on tlitl, niman tla xnemi sen tlakatl yejuan chakua, tlami on tlauejli.
21 Para tiktlalis tlixochtli, noneki tekojli. Para tiktlalis tlitl noneki kojtli. Niman para onyas nokamauijsokilistli noneki se yejuan san tepeualtijtinemi.
22 Ijkuak sen chakua tlamach tetlajtlajtouilia, sanoyej kuelkakij, pero ika on chakuayotl tlamach nochiua tlen sanoyej xkuajli ipan iyojlo se tlakatl.
23 Ijkon kenon plata kalauiliaj sen kontli de tlajli, no ijki kenon tlajtoli kualtsin niman yejmanki yejuan ika tetlapololtiaj para tekajkayauaj.
24 Yejuan tetlauelita, ueli kiyana ikan itlajtol on tlauejli, pampa tenotsa ikan yemankatlajtojli. Pero ijtikopa kinemilijtikaj tlinon xkuajli kitechiuilis. 25 Maka xneltoka tlen mitsijlia ika on yemankatlajtojli, pampa ipan itlamachilis onkaj nochi tlen sanoyej xkuajli. 26 Maski kichiuas kanika para kiyanas ika sanoyej kualani, nochimej kitaskej ixompayejyeualis.
27 Yejuan kichijchiua sen pozo para oksekimej ma uetsiti ijtik, sano yejuan ompa onuetsi, niman yejuan kimimiloua sen ueyi tetl para kinpaxoua oksekimej, on tetl sano yejua ipan onuetsi.
28 Sen tlakajkayajketl kitlajyouiltia on yejuan okajkayau. Sen tekajkayajketl kichiuilia daño okse tlakatl yejuan kitlauelita. On ikualtsin tlajtol sanoyej tlaxoxotonia.