Ika ome nechikojli de on uejueyitlajtoltin yejuan Salomón okijtoj
25
In uejueyitlajtoltina no yejua Salomón okijtoj yejuan itlajkuilojkauan on rey Ezequías okiokpaijkuilojkej: 2 Dios kiselia tlakaitalistli ijkuak itlaj techiyanilia, niman sen rey kiselia tlakaitalistli ijkuak kinextia niman techpantlantilia tlinon kijtosneki on tlen Dios techiyanilia.3 Xtikmatij keski metro onkaj ika uejkapan on cielo niman keski metro onkaj ika tlatsintlan on mar ipan in tlaltikpaktli. No ijki xakaj kimati tlinon kinemilia sen rey.
4 Achtoj xchipaua on plata, niman kemaj on platero uelis kichijchiuas sen kualtetsin copa. 5 Niman no ijki, xkinmejkuani on xompayejyeuamej yejuan nemij itech on rey, niman ijkin itekiuajyo kichiuas ikan melajkilistli.
6 Ijkuak tias ixpan on rey, maka timoueyiteneuas, nion maka timopouas iminuan on yejuan uejueyixtokej. 7 Más kuajli tla mitsijliskej xuajla nikan kampa nemi on rey, xken tla mitsijliskej xmejkuani ompa on para on yejuan más ueyixtika ma noseui, niman ijkon mitspinajtiskej.
8 Maka niman xkuika yakaj itech on tekiuajkej para tikteixpanuis, pampa yakaj uelis kijtos ika xnejli tlinon tikijtoua, niman ijkon, mitspinajtiskej.
9 Kuajli achtoj iuan xtlajtoj on yejuan itlaj mitstechtia, pero maka tikteijlis on tlen mitsijlis pampa on maluijli. 10 Maka ijkon xchiua pampa tla tikamaijneuas on tlen maluijli, uelis yakaj mitskakis niman mitspinajtis, niman nochipa mitsteneuaskej ken sen chakua tlakatl.
11 Tla yakaj tlajtoua ijkuak kitocaroua tlajtos, on nochiua ken sen manzana de oro yejuan kitemakaj ipan sen kajxitl de plata.
12 Para yejuan kinokauilia ma kajua sen tlakatl tlamatki*, más kuajli xken kiselia itlaj anillo noso koskatl yejuan más kuajli oro.
13 Sen temachistijketl yejuan nochipa kichiua on tlen iteko kineki, sanoyej ueyi kijtosneki para on yejuan kititlani, niman kiyoltlalia ken itlaj atl yejuan teseselia ijkuak sanoyej tona.
14 Yejuan itlaj kiprometeroua kitemakas niman xkitemaka, nochiua ken itlaj moxtli niman ajakatl yejuan xkipiya atl.
15 On yolseuilistli kiseselia sen tlauejli, niman sen yemanka tlajtojli ueli kiyoltlalia yejuan teixnamiki.
16 Tla tiknextia nekutli maka sanoyej tiktekikuas, pampa tla sanoyej tikuas mitsisotlaltis.
17 Tla tikuelita tiau ichan monisiuchanejkau, maka sanoyej xuiya, pampa uelis tikyolajxitis, niman kualanis motechkopa.
18 Yejuan ipampa istlakati itlajsojkaikniu noso inisiuchanejkau ixpan sen tekiuaj, nochiua ken itlaj martillo, espada noso sen tlaminajli yejuan ueli tekokoua.
19 Tla tiktlalis moyojlo ijkuak tikpiya problema itech sen tlakatl yejuan tepan nokuepa, on ken titlakuechoskia ikan motlan kexanki, noso tla tinejnemiskia ikan mokxi tepostekki.
20 Tla yakaj yejuan najmana kuikatlaliskej ikan kualtsin kuikatl, kimatis ken kitekiliskiaj vinagre kampa texipejki, noso ken tla kixtiliskiaj itlaken ijkuak sanoyej seua.
21 Tla motlauelikniu apismiki, xtlakualti, niman tla amiki, xkatliti, 22 pampa ijkon pinauas, niman toTEKO mitstiochiuas.
23 Ijkon kenon ajakatl yejuan ualeua Norte kuajuika kiautli, no ijki on chakuatilistli kuajuika tlauejli.
24 Más kuajli se chantis iselti ipan sen kalmatli, xken chantis ipan sen ueyi kajli iuan sen siuatl yejuan nochipa kitenkuikui.
25 Ijkon ken ikopak sen tlakatl yejuan sanoyej apismiki kuelilia on atl yejuan sesek, no ijki se kuelita kiselia on kuajli noticias yejuan uejka ualeua.
26 Ikuak sen kuajli tlakatl nouika iuan sen tlakatl xompayejyeua, ijtlakaui ken itlaj ayajtok noso amejli yejuan ijtik konxiniaj tlasojli.
27 Xkuajli tla yakaj sanoyej miyek kikua nekutli. No ijki xkuajli para sen tlakatl sanoyej kinekis para oksekimej kiueyiteneuaskej.
28 Ikon ken sen ueyikalpan yejuan xyeualtsakutikaj ikan tepanchinantli para ika nomanauiya, noijki kenon yejuan xueli kiteltia itlauel.