Se sanenka kitejtemoua pakilistli 2.1
2
No ijki onikijtoj san nojtikopa: "Aman nikneki nikmatis ken machisti on yejuan kuitiaj kualtsin nemilistli niman pakanemilistli." ¡Pero no ijki onikitak ika nochi on san tlaixkajkayaua! 2 Niman ijkuak otlan nikixtlaloua, onikitak ika on uetskalistli sen tontojyotl, niman on pakanemilistli san tlaixkajkayaua.3 Ika on nikuitia kuajli tlamatkilistli, oniknek nikmatis kenijki machisti nikonis vino niman nikchiuas nochi tlen xkuajli, para ijkon nikmatis tlinon kuajli noso xkuajli on tlen kichiua sen tlakatl chika kipiya iachijtsinnemilis ipan in tlaltikpaktli.
Se sanenkaj kinochijchiuilia tlaitlaj yejuan ueyi kijtosnek
4 Onikchiu niman onikchijchiu miyek uejueyi tlajtlamach. Onikinnochijchiuilij uejueyimej kaltin; niman onikpix nouvastlatôkuan. 5 Nejua onitlatôkak ipan notlalchiualuan niman ipan noxochitlaluan. Ompa onitlatôkak miyek sesekneka kojtlakijlomej. 6 Onikinchijchiu uejueyi akomoltin para onikpix miyek atl yejuan ika nikiminatekiyaya on kojtin yejuan onikintôkak. 7 Onikinkou esclavos niman esclavas; onikimpix notekichiuilijkauan yejuan otlakatkej nochan; no onikimpix uakaxtin niman borregos ken xakaj okse okimpix achtoj de nejua yejuan onen Jerusalén. 8 Oniksentlalij miyek oro niman plata, tlajtlamach* tlen patioj yejuan achtopa katka de oksekimej reyes niman de oksekimej regiones. Onikimpix yejuan nokuikatiayaj, tlakamej niman siuamej, niman no ijki onikimpix miyekej notlakpasiuauan. Onikpix nochi tlen kipaktia sen tlakatl.
9 Noueyilis sanoyej ueyi katka; xakaj okse ijki okipix de on yejuan otlamandarojkej Jerusalén. Niman notlamachilis xkaman onikpoloj. 10 Xkaman oniknonekilij tlen niknekiya; xkaman oniknonekilij tlen nikuelitaya. Sanoyej onikuelitak on tekitl yejuan onikchiu, niman on paktli yejuan onikselj ken notlaxtlauil. 11 Kemaj opeu nikixtlaloua nochi on tlen onikchiu, niman kech tekitl onikpix para ouel onikchiu, niman onikitak ika nochi on san tlaixkajkayaua, on ken yakaj kinekiskia kajsis ikan ima on ajakatl, niman ika on tlen nochiua ipan in tlaltikpaktli san tlaixkajkayaua.
12 Sakin opeu nikixtlaloua on tlamatkilistli, on tontojyotl niman on tsontekonchikaualistli: ¿Tlinon más kichiuas on tlakatl yejuan kalakis rey sakin de nejua? Yej, san on tlen nejua yonikchiu. 13 Niman onikitak ika más kuajli on tlamatkilistli xken on tontojyotl, ijkon ken más kuajli on tlauijli xken on tlayouajyotl. 14 On tlakatl yejuan tlamatki kuajli tlacha kampa nejnemi, pero on yejuan xtlamatki yej xkuajli tlacha, kistinemi kampa tlayouatok. Pero no ijki, onikitak ika on tlamatki niman on xtlamatki sa no ijki ipan nochiua. 15 Niman oniknojlij nojtikopa: "On tlen ipan nochiua yejuan xtlamatki no ijki nopan nochiuas. Yejua ika tej, xitlaj ika nechpaleuiya maski miyek tlamatkilistli nikpiya. ¡No ijki nochi on san tlaixkajkayaua! 16 Ijkon nochiuas pampa xkaman yakaj kelnamikis on yejuan tlamatki niman on yejuan xtlamatki. San xuejkajtika nochimej kinmelkauaskej, niman on tlamatkej niman on xtlamatkej sano ijki mikiskej."
17 Yejua ika, onechkualanij in nemilistli, pampa nochi tlen nochiua ipan in tlaltikpaktli xnechpaktiaya. Yej melauak, nochi san tlaixkajkayaua. ¡Nochi ken tla yakaj kinekiskia kajsis ikan ima on ajakatl!
Se sanenkaj sanoyej chikauak tekiti
18 No ijkin onechkualanij nochi on tekitl yejuan yonikchijka ipan in tlaltikpaktli, pampa nochi on nikauilijteuas okse rey yejuan tlamandaros sakin de nejua. 19 Niman on melauak: maski tla tlamatki noso xtlamatki*, yejua kinoyaxkatiskia nochi on tlen ika miyek tekitl niman tlamatkilistli oniksentlalij ipan in tlaltikpaktli. ¡Xitlaj tikijtojtokej!
20 Ijkuak onikitak nochi on tlen yonikchijka ipan in tlaltikpaktli, oninajman pampa sanenkaj onitekit. 21 Tla sen tlakatl kitlalia nochi ikajsikamatilis, itlamatkilis niman nochi tlen ueli kichiua para kimeyekilia tlajtlamach, niman nochi san para okse tlakatl itech nokauas yejuan xitlaj tekitl kichiua, ¡Nikita ika in sanoyej xkuajli niman nochi san tlaixkajkayaua! 22 ¿Tlinon kitlani sen tlakatl tla sanoyej tekiti niman sanoyej notenmati ipan in tlaltikpaktli? 23 Ipan nochi inemilis kipiya tlajyouilistli niman ajmantli , niman nion ijkuak tlayoua xnoseuiya ika tlanemilia. ¡Yejua in no ijki san tlaixkajkayaua!
Yejua ika, se ma yolpachiui niman iyolika ma nemi san ika on tlen tikpiya
24 Xitlaj onkaj okse más kuajli kichiuas on tlakatl, yej san ma tlakua niman ma tlaoni, niman ma paki ika on tlen okitlan ijkuak otekit. No yonikitak ika on no ualeua itech Dios, 25 pampa, ¿akinon uelis tlakuas, noso kuajli nemis, tla xyejua Dios kimaka? 26 Yej kemaj, Dios kimaka kajsikatilistli, tlamatkilistli niman pakilistli akin yejua kita kuajli; pero sen tlajtlakolej kichiualtia ma tekiti niman ma kimiyekili iriquezas, para kemaj Dios kimaka akin kita kuajli. ¡Yejua in no ijki san tlaixkajkayaua, niman no ijki ken kinekiskia kajsis ikan ima on ajakatl.