Nochi tlen nochiua kipiya kamanon nochiuas
3
Nochi tlen nochiua ipan in tlaltikpaktli kipiya kamanon nochiuas:2 kamanon se tlakati,
kamanon se miki;
kamanon se tlatôka,
niman kamanon kuiuitlaj on tlen kitôkaj;
3 kamanon se temiktia,
niman kamanon se tepajtia;
kamanon se tlaxoxotonia,
niman kamanon se tlachijchiua;
4 kamanon se choka,
niman kamanon se uetska;
kamanon se najmana,
niman kamanon se paki;
5 kamanon se kinsemanas temej,
niman kamanon se kinsentlalia temej;
kamanon se teuan nonapalos,
niman kamanon se xteuan nonapalos;
6 kamanon se itlaj kitejtemos,
niman kamanon se xok itlaj kitejtemos;
kamanon se tlayejyeuas,
niman kamanon se xitlaj keuas;
7 kamanon se itlaj kitsayanas,
niman kamanon se itlaj kijtsomas;
kamanon se xnauatis,
niman kamanon se tlajtos;
8 kamanon se tetlajsojtlas,
niman kamanon se tetlauelitas;
kamanon onyas nouijsokilistli,
niman kamanon onyas yolseuilistli.
9 ¿Tlinon kitlanis sen tlakatl ika on tlen sanoyej notekimiktia ipan in tlaltikpaktli? 10 Yonikitak ika Dios okinmakak chikajkatekitl on tlakamej para ika kinyolyemanilia. 11 ToTEKO, ijkuak otlachijchiu, nochi okichijchiu kualtetsin; no ijki okitlalilij ipan iyojlo nochi tlakatl ika xkaman mikiskej, maski yejuamej xuelij kajsikamatij, nochi on tlen Dios yokichiu niman on tlen kichiuas. 12 Yejua ika, nejua nikmatstika ika sen tlakatl sanoyej kuajli kichiuas tla nopaktis niman kuajli nouikas ipan inemilis. 13 Tla ijkon tej, ijkuak titlakuaj niman tiatlitiuij niman tikseliaj on tlen kuajli de on totekiu, on kuajli pampa Dios yejua otechmakak.
14 Niman no nikmatstikaj ika nochi on tlen Dios yokichijchiu nochipa onyas. Xitlaj kipoloua yejuan tikajxitiliskej, nion xitlaj onkaj para yej tikixtiliskej; Dios ijki okichijchiu, para on tlakamej ma kitlakaitakan. 15 Nochi tlen aman onkaj, ye onkatka achtoj; niman on tlen onyas, aman ye onkaj. Dios kichiua para on tlen yopanok oksejpa ma nochiua.
Xonkaj melajkachiualistli ipan in tlaltikpaktli
16 No ijki ouel onikitak ika ipan in tlaltikpaktli yotlaijtlakau, niman onkaj tlen xkuajli kampa kitokaroua onyas melajkachiualistli niman yolmelaualistli. 17 Yejua ika, oniknojlij ika Dios kinyolkuitis on tlakamej yejuan kuajli nouikaj niman on yejuan xkuajli nouikaj, pampa nochi tlin se kichiua tla kuali noso tla xkuali, kipiya kamanon Dios kiyolkuitis.
18 No ijki oniknojlij: Ijkon ken nouikaj on tlakamej, Dios kintitia para ma kimatikan ika yejuamej no ijkej ken yolkej. 19 Ika tlen melauak, on tlakamej niman on yolkej sano ijki impan nochiua: on tlakamej niman on yolkej sano ijki mikij, niman no sano ijki nijyotiaj. Xitlaj kipiya on tlakatl yejuan on yolki xkipiya. Yej nochi san no ijki impan nochiua. Xitlaj tikijtojtokej. 20 Nochimej san sekan ajsij kampa nosentlaliua. Ijkon ken tlachijchijtin ikan tlajli, oksejpa nochimej nokuepaskej tlajli. 21 ¿Akinon uelis kijtos ika inespíritu on tlakamej tlejkoua ne iluikak, niman inespíritu on yolkej uej temoua ne kampa más uejkatlan de in tlaltikpaktli? 22 No yonikitak ika para sen tlakatl más kuajli ma nopakti ika on tlen kitlani ijkuak tekiti, pampa ijki kitocaroua. Ijki nikijtoua, pampa xakaj kimati tlinon nochiuas ijkuak yotimikej.