Proverbios
On tlamatkitlajtojli techijlia ken titouikaskej
1
In yejua tlamatkitlajtoltin de Salomón, rey de Israel, ikoneu David.2 In tlamatkitlajtoltin kiteititiaj kenijki se tlamatki* yes, kenijki kuajli nouikas, kenijki kajsikamatis on tlamatkitlajtoltin, 3 kenijki kiselis temachtijli ika tlamatkilistli, kenijki yolmelajki yes, niman kenijki xtechikopiyas. 4 Para on telpokamej yejuan xe ixtojtomij, ma tlaixmatkej, niman kuajli ma kinemilikan on tlen kichiuaj. 5 On yejuan tlamatkej* niman tlamachilisyejkej, ma kuajli kakikan niman yejuamej más kiseliskej tlamatkilistli niman kajsikamatilistli ken kuajli nouikaskej . 6 para kajsikamatiskej on tlamatkitlajtoltin, intlajtoluan on tlamatkej* niman on sasaniltlajtoltina.
7 Para se kipiyas tlamatkilistli, achtoj noneki kitlakaitas toTEKO. Pero on yejuan tontos xkitlakaitaj on tlamatkilistli, niman xkinekij kiseliskej temachtilistli.
Tetlakanonotsalistin para on telpokamej
8 Nokoneu, xkaki niman xtlakamati motataj. Niman maka xtlalkaui on tlen mitsmachtia monanaj. 9 Ijkon xchiua pampa yejuan tetlakamati, nochi tlakatl kuajli kita, no ijki ken itlaj koskatl noso kuaxochitl kikualnextia yejuan kinotlaliltia.
10 Tla on tlajtlakolejkej mitstlatlataj para tikchiuas tlen xkuajli, maka tikinkakis. 11 Manin mitsijliskej: “Xuajla touan. Tikontlatlaliliaj yakaj maski xitlaj* techchiuilia, niman ijkuak panos, tikmiktiskej. 12 Maski kuajli nemij niman chijchikajtokej, ma tikinmiktikan niman yejuamej yaskej ne miktlan. 13 Tiricojtiaskej ika on tlajtlamach* yejuan tikinkuiliaj. ¡Tiktemiltiskej tokal ika on tlajtlamach* yejuan tikichtekiskej! 14 ¡Xuajla touan, niman tiktoxelouiliskej nochi on tlen tiktekuiliskej!” 15 ¡Pero tejua nokoneu, maka iminuan tias! Yej xmejkuani ipan on xkuajli iminojui, 16 pampa yejuamej sa kinektokej kichiuaskej tlen xkuajli. ¡Sa kinektokej temiktiskej!
17 Sanenkaj kitlaliskej sen tlatlalijli tla on totomej konitstokej, pampa yejuamej xok ompaka yaskej itech. 18 Pero on xkuajkualtin tlakamej yej sano yejuamej notlatlaliliaj kampa mikiskej. 19 Ijkon mikij on tlakamej yejuan ricojtisnekij ikan tlachtekyotl.
On tlamatkilistli kinnotsa on telpokamej
20 On tlamatkilistli tenotsa ne ipan on kalpanojtli, niman chikauak tenotsa ne ipan on tiankisko*. 21 Tenotsa ipan iplaza on kalpan, niman nochiuiyan kampa tojlan nosentlaliaj ipan on ueyikalpan.
22 “Nemejuamej telpokamej yejuan xe nenixtojtomij, yejuan sanoyej nentepijpinauiyaj niman yejuan tontos, ¿hasta kamanon ijkon nennemiskej? ¿Hasta kamanon tlamis nenkipijpinauiskej on tlamatkilistli? ¿Hasta kamanon nenkiseliskej on tlamatilistli? 23 Xkakikan niman xnechtlakamatikan ijkuak nemechchikajkanotsa, niman nenmechmakas miyek tlamatkilistli, niman nemechmachistis tlinon nejua niknemilia. 24 Nejua onemechtekuitlan para xuajlakan, pero nemejuamej xonenkinekej onenuajlajkej. 25 Yej xonenkinekej onenkakkej tlinon onemechijlij, niman xonenkiselikej notlajtol ijkuak onemechchikajkanots. 26 Pero ajsis tonajli ijkuak nemopan uajlas tlamach tlen xkaujli, niman ijkuakon, nemechuejuetskilis. Nemoka niuetskas ijkuak nikitas sanoyej yonenmojkamikkej. 27 Nemopan uajlas tlen temojtij, tlen tepajsoloj, tlen temojkamiktij niman tlen teajman. Nochi in uajlas ken itlaj ajkomalakotl yejuan nochi kixoxotonia.
28 On tonajli nennechiknotlajtlaniliskej para nemechpaleuis, pero nejua xnemechnankilis. Nennechtejtemoskej, pero xnennechnextiskej. 29 Nemejuamej xnenkinekij nenkakiskej tlen kuajli nion xonenkinekkej onenkitlakaitakej toTEKO. 30 Xonenkinekkej onenkakkej tlinon nemechijliaya, niman maski yonemechchikajkanots, xonennechkakkej. 31 ¡Yejua ika tej, nenkiseliskej nemotlaxtlauil! ¡Niman sanoyej mechyolajxitis on tlajyouilistli pampa nemejuamej onenkichijkej on tlen xkuajli! 32 On yejuan xe ixtojtomij, mikij pampa xkimatij kenijki noyekanaskej. Niman on yejuan tontos popoliuij pampa xkinekij kakiskej tlen kuajli. 33 Pero on yejuan kinekis nechkakis, nochipa iyolika nemis niman xnemis ikan nemojtijli.