On tlamatkilistli kitemaka on tlen kuajli
2
Nokoneu, xseli notlajtol, niman xkejeua notlanauatiluan ipan motlamachilis. 2 Xkaki notlajtol yejuan uelis mitsmakas tlamatkilistli, niman ika nochi moyojlo xseli on kajsikamatilistli. 3 Ikan nochi mochikaualis xyemankatlajtlanili kuajli tlaixmatkilistli niman kajsikamatilistli. 4 Xkintejtemo ikan nochi moyojlo ken tiktejtemoskia plata noso sen tesoro. 5 Ijkon tej, tikmatis tlinon kijtosneki ika tiktlakaita toTEKO, niman tikmatis kenijki tikixmatis Dios. 6 Ijkon xchiua pampa toTEKO yejua kitemaka on tlamatkilistli, niman ipan itlajtol kisa tlamatkilistli niman kajsikamatilistli. 7 ToTEKO kimpaleuiya niman kinmanauiya on yejuan melajkanemij niman kuajli nouikaj. 8 Kinmejejua on yejuan melajkanemij, niman kiminmanauiya on yejuan yolmelajkanemij itech. 9 No ijki tikajsikamatis on melajkanemilistli, nochi tlen kuajli, niman tikmatis kenijki xok titechikoitas*. 10 Ijkon xchiua pampa ipan motlamachilis tikpiyas tlamatkilistli, niman on tlamatkilistli mitsmakas pakilistli. 11 Motlamatkilis niman mokajsikamatilis mitsmanauiskej. 12 Mitspaleuis para nochipa tias ipan on kuajli ojtli, niman mitsmanauis imintech on tlakamej xompayejyeuamej yejuan tekajkayauaj. 13 Yejuamej kisaj ipan on kuajli ojtli para yauij ipan on ojtli kampa tlayouatok, 14 niman sanoyej kuelitaj kitechiuiliaj tlen xkuajli, hasta noueyimatij ipampa iminxompayejyeualis. 15 Yejuamej on tlakamej okiskej ipan on ojtli yejuan melajki para yauij ipan on ojtli yejuan xmelajki.16 On tlamatkilistli no mitsmanauis tla sen tesiuau mitsnomajmakasneki, niman ikan tlajtoltin kualtsitsim kineki mitsnonotsas, 17 yejuan kaua iueuentsin*, niman kelkaua tlinon okiprometeroj ixpan Dios. 18 Tla sen tlakatl kalaki ichan on siuatl, kijtosneki kajsi ojtli yejuan kuikas kampa mikis, yejuan kajxitis ne miktlan. 19 On tlakatl yejuan kalaki ichan on siuatl xok kaman uajkisa. Xok kaman nokuepa ipan on ojtli kampa onkaj nemilistli. 20 Xuiya tej, ipan on kuajli ojtli niman ijkon timouikas ken nouikaj on yejuan yolchipajkej. 21 Xchiua ijkon pampa on yejuan melajkanemij niman yolchipajkej, nochipa nemiskej ipan in tlajli yejuan toyaxka. 22 Pero on yejuan xompayejyeuamej niman yejuan tepan nokuepaj ToTEKO kinkixtis ipan in tlajli.