Tlanauatijli para akin kinekis tlamatki* yes
3
Nokoneu, maka tikelkauas tlen nimitsmachtia. Xkejeua notlanauatiluan ipan motlamachilis, 2 niman ijkon uejkauis tinemis, niman tikselis tlen kuajli. 3 Maka kaman tikauas on titetlajsojtlas niman on tlen melauak. Xpiya ken itlaj kualtsin koskatl mokechtlan niman xkijkuilo ipan moyojlo. 4 Tla ijkon tikchiuas, Dios niman on tlakamej mitstlajsojtlaskej, niman sanoyej kuajli mitsteneuaskej.5 Xtlali nochi moyojlo itech toTEKO. Maka xtlali moyojlo itech on tlen tejua tiknemilia ika kuajli. 6 Nochipa xtejtemo on tlen toTEKO kineki, niman yejua mitsijlis on tlen kuajli para tikchiuas. 7 Maka xnemili ika sanoyej titlamatki*. Xtlakaita toTEKO niman xtlalkaui on tlen xkuajli. 8 ¡On yejua mitspaleuis para tikpiyas chikaualistli ipan motlalnakayo niman kojtikkej yeskej moomiyouan!
9 Xmaka toTEKO sen ofrenda de on tlen tikipiya niman on tlen achtoj tlaki ipan motlatok, niman ijkon tikititis ika tiktlakaita. 10 Tla ijkon tikchiuas, toTEKO kichiuas para temiskej mokueskomauan, niman on kampa tikejeua movino.
11 Tejua nokoneu, maka xtlauêlmati ijkuak toTEKO mitschikajkanotsa, nion maka xkualani ijkuak mitscastigaroua, 12 pampa toTEKO castigaroua yejuan kitlajsojtla, ijkon ken sen tajtli castigaroua itlajsojkakoneu.
13 Kipiyas pakilistli on yejuan kinextia tlamatkilistli niman kajsikamatilistli, 14 pampa on más ueyi kijtosneki xken tla kipiyas plata, niman más pajtio xken oro. 15 On tlamatkilistli más ueyi kijtosneki xken on tetsitsimej yejuan kualtsitsimej niman patiojkej. ¡Más ueyi kijtosneki xken itlaj okse yejuan se kinekiskia kipiyas! 16 Ikan iyekma on tlamatkilistli kitemaka ueyi nemilistli, niman ikan iopoch kitemaka tetlakaitalistli niman riquezas. 17 Yejuan nouikas ipan on tlamatkilistli, sanoyej iyolika nemis. Yejuan yas ipan iojui, kipiyas yolseuilistli. 18 On tlamatkilistli kenon kojtli* yejuan itlakyo temaka nemilistli. ¡Kipiyaskej pakilistli on yejuan uelij kinextiaj on tlamatkilistli!
19 Ikan tlamatkilistli niman ikan kajsikamatilistli, toTEKO okichijchiu on cielo niman in tlaltikpaktli. 20 Ikan tlamatkilistli okichiu para ma noxelo on mar yejuan sanoyej uejkatlan, niman okichiu para on moxtli ma nochiua ajuichtli niman xini ipan on tlaltikpaktli.
21 Nokoneu, nochipa xkejeua mokuajlitlamachilis niman mokajsikamatilis. Niman maka kaman tikimpolos. 22 On mitspaleuis para más uejkauis tinemis, niman mitskualnextis ken itlaj kualtsin koskatl. 23 Kemaj Uelis moyolika tikistinemis ipan moojui, niman xkaman timokxitechakuanis. 24 Ijkuak timotekas tikochis, xtimomojtis yej, moyolika tikochis. 25 Xtimomojtis tla itlaj temojtij amanaman nochiua, nion tikmakajsis on ken xkuajli nochiuas impan on xkuajkualtin tlakamej. 26 Ijkon nochiuas pampa toTEKO kichiuas para tiktlalis nochi moyojlo yejua itech. niman yejua mitspaleuis para maka itlaj ika mitstlatlaliliskej.
27 Maka kaman timonenekis tikpaleuis yejuan itlaj kipoloua, ijkuak tikpiyas tlinon ika tiuelis tikpaleuis. 28 Maka kaman tikauas para uajmostla tla aman uelis yakaj tikpaleuis. 29 Maka kaman tiknemilis tikchiuilis itlaj xkuajli yakaj yejuan motech kitlalia iyojlo. 30 Maka timokamauisokis iuan yakaj yejuan xitlaj* mitschiuilia. 31 Maka timoxikos itechkopa sen tetlaueltlakatl, nion maka tiknekis no ijki timouikas ken yejua nouika, 32 pampa toTEKO sanoyej kikualaniaj on xompayejyeuamej, pero kimpiyalia kuajli iyojlo on tlakamej yejuan yolchipajkej. 33 ToTEKO kitlauelia ifamiliaj sen tlakatl yejuan xompayejyeua, pero kitiochiua ifamiliaj sen tlakatl yejuan yolchipauak. 34 ToTEKO kimpijpinajtia on yejuan tekauetskaj, pero kintlajsojtla on yejuan yolyemankej. 35 On tlakamej yejuan tlamatkej* kiseliskej tlakaitalistli, pero on yejuan tontos kiseliskej pinaualistli.