Se noneki nouikas kuajli
4
Nemeuamej nokoneuan, kuajli xkakikan niman xtlakamatikan tlinon nejua nemotataj nemechijlia, para nenkipiyaskej kuajli kajsikamatilistli. 2 Nejua nemechmaka kuajli temachtijli, yejua ika tej, maka yej xnenkichiuaskej tlen yonemechmachtij. 3 Nejua no nikonetl katka, san nikanochi katka ikoneu nonanaj. Nonanaj sanoyej nechmaluiyaya ikan tetlajsojtlalistli*, 4 niman notataj ijkin nechmachtiaya: “Xtlali niman xkejeua ipan motlamachilis in tlajtojli yejuan nimitsijlia. Xchiua tlen nimitsnauatia, niman ijkon uejkauis tinemis. 5 Xpiya tlamatkilistli niman kajsikamatilistli. Maka tikelkauas tlen timitsijlia. 6 Nochipa xtlajsojtla* on tlamatkilistli. Maka kaman tiktlalkauis, niman yejua nochipa mitsmanauis. 7 Maka achtoj itlaj okse tiktejtemos. Yej achtoj xtejtemo tlamatkilistli niman kajsikamatilistli. 8 Xtlajsojtla on tlamatkilistli niman yejua kichiuas para más tiueyixtias. Xtlakamati, niman yejua kichiuas para más mitstlakaitaskej. 9 ¡Yejua mitskualtsintilis ikan sen kualtsin kuaxochitl! ¡Mitspakaitaskej ika on motlamatkilis*!”
10 ¡Nokoneu, tejua xtlakamati tlinon nimitsijlia niman uejkauis tinemis! 11 Nejua nimitsuikas ipan on ojtli kampa onkaj tlamatkilistli. Nimitsuikas ipan on kuajli ojtli, 12 ipan on ojtli kampa xitlaj* ika tonteliuis, kampa xitlaj* ika timantikisas ijkuak timotlalos. 13 Xkelnamiki nochipa in tlen nimitsmachtia, niman maka kaman tikauas pampa yejua mitsmakas nemilistli. 14 Maka tias ipan iminojui on xkuajkualtin tlakamej, nion maka timouikas ijkon ken yejuamej nouikaj. 15 Maka tipanos kampaka yejuamej nojuitiaj. Xkintlalkaui niman xnejnemi ipan moojui. 16 On xkuajkualtin tlakamej xolpachiuij hasta tla yokichijkej tlen xkuajli. Niman yejuamej xkochij hasta tla yakaj yokichiuelikej tlen xkuajli. 17 On tlen xkuajli kichiuaj, ken yejua intlakual yeskia, niman ken yejua invino yeskia.
18 Iminnemilis on kuajkualtin tlakamej, ken itlaj on tlanexyotl de sen yejkuik tonajli, yejuan peua ika yolik uajnestiu, hasta kaman kualtsin tona. 19 Pero iminnemilis on xkuajkualtin tlakamej, ken sen tlayouajlotl, ¡hasta xkimatij tlinon ika najantikisaj!
20 Tejua nokoneu, xkaki tlinon nimitsijlia. Xtlakamati notlajtol. 21 Maka kaman tikixkauas notlajtol. !Xkelnamiki niman kuajli xkeua ipan motlamachilis! 22 Notlajtol yejua kitemaka nemilistli. Yejua nochiua ken sen pajtli ipan nochi itlalnakayo on yejuan kinextia. 23 Más xkejeua moyojloa, xken nochi on tlajtlamach* yejuan tiktlajsojtla, pampa ompa ualeua nochi monemilis. 24 Maka san tlamach xkijijto yejuan xkuajli tlajtoltin, nion maka tikijtos tlajtlamach* yejuan tlakajkayaualistli. 25 Tejua nochipa xtlachixtiu melajki moyakapan. Maka xkixkaua on tlen onkaj moyakapan. 26 Kuajli xkita kanon ticholojtias, niman ijkon xkaman tiuetsis. 27 Maka tiktlalkauis moojui, yej xtlalkaui on tlen xkuajli.