Tlanauatijli para maka yakaj ma nokajkayaua iuan sen tesiuau
5
Nokoneu, xtlakamati on tlamatkilistli yejuan nimitsmachtia, niman xkaki kuajli tlen nimitsnauatia ika nokajsikamatilis. 2 Ijkon uelis timouikas kuajli, niman uelis titlajtos ken sen ixtlamatki*. 3 Kas yakaj tesiuau kinekis mitskajkayauas ikan kualtsin tlajtojli, ikan tlajtojli yemanki yejuan tsopelik ken nekutli; 4 pero sakin*, on itlajtol más sanoyej chichik xken on ichichiyalis on pajtli itoka ajenjo, niman no sanoyej tlateki ken itlaj espada yejuan okan tlateki. 5 On yejuan iuan nokajkayaua kenon siuatl, kinextia mikilistli. Iojui melajki yau hasta ipan tlalkontli. 6 Kenon siuatl xkitlajsojkaita on kuajli ojtli yejuan teuika ipan nemilistli. Yejua yau ipan on xkuajli ojtli, maski xkimati kanon yau on ojtli.7 Nokoneu, yejua ika kuajli xnechkaki; maka tiktlalkauis on tlen nimitsmachtia. 8 Xtlalkaui on siuatl yejuan kipiya iueuentsin, nion achijtsin maka xnisiui ichan. 9 Tla ijkon tikchiuas, tikpolos mochikaualisa, niman yej, oksekimej intech nokauas nochi tlen tikpiya. 10 Niman ijki oksekimej ricojtiaskej ika on tlen tikpiya. On tlen ikan chikauak tekitl otiktlan, yej okse itech nokauas. 11 Niman kemaj ijkuak xok tikojtik yes niman xok tikpiyas mochikaualis, timejeltis pampa mochikaualis tlantias ika yolik. 12 Niman ijkin tikijtos: “¿Hasta tline* xoniknek onikak on tetlakanonotsalistli? ¿Hasta tline xoniknek onikak ijkuak nechajuayaj? 13 ¡Xoniknek onikinkak yejuan nechmachtiayaj, on yejuan nechchikajkanotsayaj! 14 Aman nisiu para nikpolos nochi, niman yoninopinatij ixpan nochi tlakatl."
15 Tla tikneki tikpiyas paktli yakaj iuan, san mosiuau iuan xmopakti. 16 ¡San yejua xneki! ¡ Maka yakaj okse siuatl tiknekisb! 17 Maka san akinon iuan timotekas para tikpiyas paktlic. 18 ¡Ueyi tlatiochiualistli xpiya iuan mosiuau, on yejuan iuan otimonamiktij ijkuak titelpochtli katka, 19 on siuatl yejuan ken sen kualtsin masakonetl! ¡Xmokauili nochipa ma mitspakti itlajsotlalis! ¡Xmokauili nochipa ma mitstlajsotla! 20 Nokoneu. ¿Tline iuan timokajkayauas on siuatl yejuan kipiya iueuentsin? ¿Tline timotemakas ipan imauan kenon siuatl? 21 ToTEKO nochi kita niman kimati tlinon kichiua sen tlakatl. Yejua xkaman kixkaua ken nouika sen tlakatl. 22 Itlajtlakoluan on xompayejyeua sa no yejua ika notlatlalilia. On itlajtlakol sano yejua kajsi, niman xok ueli kinokixtilia. 23 Ika xkineki ma kichikajkanotsakan, yau melajki ipan mikilistli. Yejua nopopoloua, ipampa sano yejua iueyitontojyo.