Achtoj kuajli xkita akinon tikpaleuis
6
Nokoneu, tla yajkaj motlajsojkaikniu mitstlajtlanilia para tikpaleuis ma kitlanejtikan tomin, noso yajkaj ticuentaixtlauas, sano tejua timotlatlalilia, 2 noso sano tejua timotlatlalilia ika on motlajtol yejuan tiktemaka. 3 Nokoneu, para tikmokixtilis ika otimokau ipan ima okse tlakatl, ijkin nimantsin xchiua: Xkiknotlajtlanili ma mitskixtili on tlen otikprometeroj. 4 ¡Xchiua aman! Maka xkochi, nion maka xmoseui. 5 Xmokixtili amanaman ken sen masatl cholojteua itech on masatemojketl, noso ijkon ken sen tototl cholojteua itech on matlatl.Kintlachikauiliaj on yejuan tlatsijkej
6 Tejua yejuan titlatsiui, xkinta on tsikamej ken tekitij, niman no ijki xchiua niman xpiya tlamatkilistli ken yejuamej. 7 On tsikamej xkipiyaj akinon kinyekana, nion imintekitlayakankau, nion akinon kinmandaroua. 8 Ijkuak xopantlaj, kisentlaliaj imintlakual. Nochi kejeuaj ijkuak pixkatlaj. 9 Man tejua tlatsijkau: ¿Uej hasta kamanon paon tonos? ¿Hasta kamanon timokuiteuas? 10 On yejuan tlatsiui ijkin kinojlia: “Ma niuajnoseui achijtsin. Ma nikochi achitsin más. Niman ma ninomanepano achijtzin para ninoseuis”. 11 Pero on mayantli mopan yejkotetsis ken yakaj ichteki, niman nochi mitskuilis.
Ijkin nouika sen xompayejyeua
12 Sen tlakatl yejuan xompayejyeua, san ika nokaua tlakajkayajtinemi. 13 Para tlakajkayaua, teixtekochilia, kitechiuilia itlaj señas ikan ima noso ikan ikxi. 14 Itlamachilis sanoyej xkuajli, san kinejnemilijtikaj kichiuas tlen xkuajli, niman san kipeualtijtinemi tlauejli. 15 Yejua ika mikis amanaman, niman xkipiyas tlinon ika nomanauis.
On tlen toTEKO kikualania
16 Onkaj chikuasen, niman hasta chikome, on tlen toTEKO sanoyej kikualania yejuan kichiuaj sekimej.
17 Sanoyej kikualaniaj on yejuan: ikan iminixtololojuan kipanextiaj ika noueyimatij,
ikan iminnepil sanoyej tlakajkayauaj,
ikan iminmauan kinmiktiaj yakamej maski yejuan xkipiyaj tlajtlakojli,
18 ikan iminyojlo kinemiliaj on tlen xkuajli kichiuaj,
ikan iminikxiuan yauij konchiuaj tlen xkuajli,
19 ikan iminten tepan istlakatij ijkuak testigojkisaj
niman kichiuaj para ma nokualanikan familias.
On tlen ipan nochiua yejuan auilnemi
20 Nokoneu, xkintlakamati itlanauatiluan motataj, niman maka xkintlalkaui itemachtiluan monanaj. 21 Xkinpiya nisiu ipan moyojlo, niman nochipa xkinmejeua ken sen siuatl kejeua ikoskau ikechtlan. 22 On tlanauatiltin mitsyekanaskej ipan moojui ijkuak tinejnemi, mitsejeuaskej ijkuak tikochi, niman mitsnakastemaskej ikan kuajli tlajtoltin, ijkuak titlachas. 23 Imintlanauatiluan motajuan ken sen lámpara; imintemachtiluan ken sen tlauijli; no ijki on inmelajkatlalilis niman on tetlakanonotsalistli yejua mitsuikas ipan monemilis. 24 Imintlanauatiluan motajuan mitsmanauiskej para maka mitskakayauas ikan kualtsin tlajtoltin sen tesiuau yejuan auilnemi. 25 Maka peuas tikeleuis pampa tla kualtetsin tlajtlacha. ¡Maka tikmokauilis mitstlanis tla mitsixkajkayauasneki ikan ixtololojuan! 26 Sen siuaauilnenki yejuan xkipiya iueuentsin san kitejtemoua tlakuajli, pero sen siuaauilnenki yejuan kipiya iueuentsin kitejtemoua inemilis sen kuajli tlakatl.
27 Xakaj uelis kitlalis tlixochtli iyelpan, niman xkitlatilis itlaken. 28 Xakaj uelis nejnemis ipan tlixochtli niman xnotlajtlatis ipan ikxiuan. 29 No ijki tej, on yejuan noteka iuan sen tesiuau; ika onkaj kiselis icastigo.
30 Xakaj kinemilia kitlauelitas on yejuan tlachteki tla tlachteki san para napisseuiya. 31 Pero tla okajsikej kichiualtiskej, kitlaxtlauas chikomepa ichkich on tlen okichtek, niman hasta kitemakas nochi tlen kipiya.
32 Pero sanoyej tontoj on tlakatl yejuan iuan noteka sen tesiuau, pampa sano yejua nixpoloua. 33 Kimajmailiskej niman nopijpinajtis, niman xuelis kelkauas on ipinaualis, 34 pampa on teueuentsin yejuan sanoyej chauakon, temojtij ken kualani, niman xueli tetlapojpoluiya. 35 Yejua xkineki ma kitlaxtlauilikan, nion xitlaj* ika noyoltlalia, maski miyek tlajtlamach* kitlayokoliaj.