Itlaixkajkayaualis on tesiuau yejuan auilnenki
7
Nokoneu, xtlakamati tlen nimitsijlia. Nochipa xpiya ipan motlamachilis notlanauatiluan. 2 Xkintlakamati notlanauatiluan niman notemachtiluan. Xkinmalui ken tikinmaluiskia mixtlilijkayotsitsiuan, niman ijkon tipiyas ueyi nemilistli ikan pakilistli. 3 Xkinmijkuilo ipan momajpiluan; xkimpiya ipan motlamachilis. 4 On tlamatkilistli* xpiya ken mokniu siuatl yeskia, niman on kajsikamatilistli xpiya ken motlajsojkaikniu yeskia 5 On tlamatkilistli niman kajsikamatilistli mitsmanauiskej de sen tesiuau yejuan auilnenki. Mitsmanauiskej de on siuatl yejuan mitskakayauas ikan kualtzin tlajtoltin.6 Se tonajli ijkuak niuajtlachixtikatka itsajlan itsatsasyo noventana, 7 onikinualitak keskimej telpokamej yejuan xe ixtojtomij, niman intsajlan nemiya se yejuan semi xitlajtlamachilis. 8 Oyaj ipan on kalpanojtli nisiu on equina kampa on siuaauilnenki chanti, 9 ijkuak semi ye tiotlak katka. Casi ye peuaya tlayouatitiaya. 10 Kemaj, sa onikitak on siuatl okinamiktetsiko. Uajlaya tlakemej ken sen siuatl yejuan kitlapolotia sen telpochtli para iuan noteka. 11 Yejua nemiya ken sen siuatlapa yejuan kichiua tlen yejua kineki, niman xkaman kineki nemi ichan. 12 San kistinemi ipan kalpanojtin, ipan plazas niman ipan esquinas para kipijpiya san akinon yejuan achtoj panos para kajsis. 13 On siuatl okinapaloj, niman okitenkua* on telpochtli. Niman nion xpinajkayoj ijkin okijli: 14 “Nejua onikprometerojka miyek uentli de yoltlalilistli, niman aman yoniktemakak on uentli. Amantsin uelis tiaskej nochan niman tikuaskej on nakatl yejuan onikinuentlalilij nodioses. 15 Yejua ika, onikis nochan para nimitsnextis. Onimitstejtemoko niman yonimitsnextij. 16 Ipan notlapech yoniksou sen kualtetsin tela de lino yejuan ualeua Egipto. 17 Yonikajuiyalij ika iajuiyalis on mirra, áloe niman canela. 18 Xuajla, xmoteka nouan niman ma tiyolpachiuikan. Ma titopaktikan hasta kualkan. 19 Noueuentsin xnikan nemi. Yejua oyaj uejka. 20 Okiktik sen bolsa tentiu ikan tomin, niman uajlas hasta kanaj ipan ome semana.”
21 Ikan in kualtsitsimej tlajtoltin, on siuatl okajkayau on telpochtli niman okitlapololtij. Ikan in kualtsitsimej tlajtoltin, on siuatl okinonots on telpochtli niman ijki ouel okajkayau. 22 Kemaj, amanaman on telpochtli okitokak on siuatl, ken sen uakax yejuan kuikaj kampa tlamiktiua. Okitokak ken sen masatl yejuan yau kampa okitlatlalilijkej, 23 niman on masatemojketl ompa kiyoltitlantsopinia ikan itlaminal. Okitokak ken sen tototl yejuan onuetsi ipan on matlatl, niman nion xkimatiya ika ompa mikis.
24 Ijkon tej, nokoneu, aman xnechkaki. Kuajli xkaki niman xtlakamati notlajtol yejuan timitsijlia. 25 Maka xtlali moyojlo itech on siuatl. Maka xmokauili ma mitsyekana ipan on xkuajli iojui, 26 pampa san yejua ipampa miyekkej yonopojpolokej. ¡Sanoyej miyekej ipampa yomikkej! 27 San akinon yejuan yau ichan ompa konextia mikilistli.