On tlamatkilistli tenotstikaj
8
Nochimej xkakikan: "On tlamatkilistli sanoyej chikauak tenotstikaj. On kajsikamatilistli notenkixtia para ma kakikan. 2 Kamanian tlejkoua hasta tlakpak ikuapan tepemej, niman kamanian noteltia kampa nonamikij on ouimej. 3 Kichiua para ma kakikan on yejuan nemij ipan ikalakiyan on uejueyi kalpanmej. 4 Ijkin kijtoua: "In tlajtoltin nikijtoua para nochimej nemejuamej tlaltikpatlakamej. 5 Nemejuamej telpokamej yejuan xe nenmixtojtomij niman yejuan nentontos, ¡xmouikakan ikan tlamatkilistli niman kajsikamatilistli! 6 Xnechkakikan, pampa nemechijlis tlen sanoyej kuajli para nenkimatiskej, niman xkaman nenkijtoskej xkuajli tlen nemechijlia. 7 Nejua nemechijlis tlen melauak. Xnikneki nitlakajkayauas. 8 Nochi notlajtol kijtoua tlen melajki. Nion achijtsin xitlaj* nikijtoua tlen xmelauak. 9 On yejuan kipiya kuajli kajsikamatilistli, kuajli kajsikamati notlajtol. Niman on yejuan kuajli kajsikimati, xkaman kijtoua ika xmelauak tlen nikijtoua.10 "Maka xtejtemokan plata noso oro yejuan más kuajli; yej xtejtemokan tlamachtijli niman tlaixmatkilistli. 11 On tlamatkilistli más ueyi kitosneki xken on tetsitsimej yejuan kualtsitsimej niman patiojkej. ¡On tlamatkilistli más ueyi kitosneki xken nochi on tlajtlamach* yejuan nenkeleuiya!
12 “Nejua yejuan nitlamatkilistli, iuan ninouika on kajsikamatilistli, on kuajli tlamachilistli, niman on kuajli tlanemilijli. 13 Yejuan kitlakaita toTEKO, kipiya tlauejli itech on tlen xkuajli. Nejua niktlauelita on yejuan noueyimati, niman ijkuak se teyakapanauiya. Xnikuelita ijkuak se xkuajli nouika niman ijkuak se tlakajkayaua. 14 Nejua notech kixtiaj nochi tlen kuajli tetlakanonotsalistli niman tlamatkilistli. Nejua noyaxka* on kuajli kajsikamatilistli niman on poder. 15 Nejua nikinpaleuiya on reyes para kuajli tlamandaroua. Niman notechkopa, on yejuan tekiuajkej kintlaliaj kuajkualtin leyes. 16 Notechkopa, on gobernadores uelij tlamandarouaj, niman notechkopa, on tlapaleuijkej kimatij ken tlayekanaskej. 17 Nejua nikintlajsojtla* yejuan nechtlajsojtlaj*, niman yejuan nechtejtemouaj, nechnextiaj. 18 Nejua niktemaka riquezas niman tetlakaitalistli. Niktemaka kuajli nemilistli niman tlajtlamach* yejuan nochipa onyas. 19 On tlen nejua niktemaka más kuajli xken on oro niman plata yejuan más kuajli. 20 Nejua niau ipan on melajki ojtli, on ojtli kampa onkaj yolmelajkanemilistli. 21 On yejuan nechtlajsojtlaj* nikinmaka ricojyotl. Niktemiltia iminkal ika on tlajtlamach* tlen patioj.
22 "ToTEKO, nejua achtoj onechchijchiu ijkuak xe itlaj onkatka. Onechchijchiu ijkuak xe itlaj kichichiuaya. 23 Ye uejkaui ijkuak Dios xe kichijchiuaya in tlaltikpaktli, yejua onechchijchiu. 24 Nejua achtoj onechchijchiu ijkuak xe kinchijchiuaya on uejueyimej mares, ijkuak xe onkatkaj on ríos, niman ijkuak xe kueponiyaj on ameyaltin. 25 Ijkuak toTEKO xe kinchijchiuaya on tepemej niman on tepetsitsimej, nejua yonechchijchijka. 26 Onechchijchiu ijkuak xe kichijchiuaya in tlaltikpaktli niman kampa on tlakamej tlatȏkaj, nion xe kichijchiuaya on tlalkuechtli yejuan ika okichijchiu in tlaltikpaktli. 27 Ijkuak toTEKO okichijchiu cielo yejuan onkaj tlakpak de on mares, nejua ompa ye ninemiya. 28 Ijkuak okichijchiu on moxtli ipan on cielo niman okimeyaltij atl ne itik on mar ne kampa uejkatlan; 29 ijkuak okinauatij on mar para maka nejkuanis kampa onkaj; ijkuak okichijchiu ipeuyan in tlaltikpaktli; 30 nochipa ompa ninemiya inakastlan toTEKO ken se tlamachijchijketl. Nejua nopampa, nochipa yolpakiya, niman nejua nochipa ixpan niyolpakiya. 31 Nipakiya ika in tlaltikpaktli yejuan Dios okichijchiu. ¡Nipakiya pampa Dios okinchijchiu on tlaltikpaktlakamej!
32 “Niman aman nokoneuan xnechkakikan. Xmouikakan ken nejua ninouika, para Dios mechtiochiuas. 33 Xtlakamatikan notemachtil, niman xselikan notlamatkilis*. 34 Sanoyej pakis on yejuan kinekis nechkakis niman mojmostla uajlas, sa nechchas ikalakiyan nochan. 35 Yejua pakis pampa akin nechnextia, kinextia nemilistli para ialma, niman toTEKO nochipa iuan nemis. 36 Pero akin xnechnextia sano yejua kinochiuilia tlen xkuajli. On yejuan nechtlauelita, kinotejtemouilia mikilistli."