On tlamatkilistli niman on tontojyotl
9
On tlamatkilistli okichijchiu ikal. Okitlalilij chikome pilares para okualnextij. 2 Kemaj okinmiktij yolkej para otlaluichiu, okinelo tlajtlamach* yejuan ajuiyak iuan vino yejuan más kuajli, niman okitlalij tlakuajli ipan on mesa. 3 Niman kemaj okintitlan isiuatekichiuilijkauan hasta kampa más tlakpak de on ueyikalpan para ma tetsajtsilitij, niman ijkin ma kiteijlikan: 4 “¡Xuajlakan nikan, telpokamej yejuan xe nenmixtojtomij!” No ijki, on yejuan san tontojtikej okinmijlij: 5 “Xuajlakan, xkuakij notlakual, niman xkonikij vino yejuan yonikchijchiu. 6 Xkauakan on xkuajli ojtli, niman ijkon xnenmikiskej. Xmouikakan ken yejuan tlamatkej*.”7 Tla tikajuas on yejuan tekauetska, yejua mitsuijuikaltis. Tla tikchikajkanotsas on yejuan xompayejyeua, yejua mitschiuilis itlaj xkuajli. 8 Tla tikchikajkanotsas on yejuan tekauetska, mitstlauelitas. Pero tla tikchikajkanotsas on yejuan tlamatki*, uej mitstlakaitas. 9 Xmachti on yejuan tlamatki* niman más tlamatki* yes. Xmachti on yolmelajkatlakatl niman más tlamatki* yes.
10 Tla tikitlakaitas toTEKO nesis ika melauak titlamatki*. Tla tikixmati on Dios Yektitikaj, kijtosneki tikpiya kajsikamatilistli. 11 Ipampa on tlamatkilistli, tikpiyas ueyi nemilistli. Yejua kichiuas para miyek xipan xpiya monemilis. 12 Tla tikpiya tlamatkilistli, tikselis nochi tlen kuajli. Tla xipan titeita, sano tejua tikmochiuilis tlen xkuajli.
13 On siuatlapa, xitlaj* kimati. Sanoyej tontaj niman sa kenijki nouika ipan pinaualistli. 14 Notlalia ipan isieta ne ixpan ikal, ne kampa más tlakpak de on ueyikalpan. 15 Niman komintsajtsilia on tlakamej yejuan kuajli nouikaj, yejuan ompaka panouaj. 16 On telpokamej yejuan xe ixtojtomij, kimijlia: “¡Xuajlakan nikan!” No ijki on yejuan tontojtikej okinmijlij: 17 “On atl yejuan san tikichtekis más uelik; on pan yejuan tikichtakakuas, más tikuelilis.” 18 Pero yejuamej in telpokamej, xkimatij ika ne kalijtik ichan on siuatl onkaj mikilistli. Xkimatij ika on tlakamej yejuan onkalakij ipan ichan, onxinij miktlan.