In achtoj lista de on tlamatki*tlajtoltina yejuan Salomón okijtoj
10
Itlamatki*tlajtoluan Salomón:Sen tekoneu yejuan tlamatki* kimpaktia itajuan, pero sen tekoneu yejuan xtlamatki, ipampa tlajyouiyaj itajuan.
2 On riquezas yejuan kimiyekiliaj ikan tlachtekyotl xitlaj* ika kimpaleuis on yejuan kitekuiliaj, pero sen tlakatl yejuan kichiua tlen kuajli nomanauiya de on mikilistli.
3 ToTEKO nochipa kimaka tlen kikuas on tlakatl yejuan kuajli nouika, pero on tlakatl yejuan xkuajli nouika, uej kaua ikan apistli.
4 Akin xkuelita tekiti kipiyas mayantli,
pero akin chikauak tekiti, uelis ricojtias.
5 Akin pixka ijkuak pixkatlaj tlamatki*, pero akin kochi ijkuak pixkatlaj, on sen tepinajtiani.
6 Ipan sen kuajli tlakatl miyek ipan uajlau tlatiochiualistli, pero se xkuajli tlakatl kiyana on tlen xkuajli yejuan kipiya ipan iyojlo para kijtlakoua okse tlakatl.
7 Sen kuajli tlakatl, kelnamikij ikan paktli, pero sen tlakatl xompayejyeua, uej saniman kelkauaj.
8 Yejuan tlamatki* kinokauilia ma kimandarokan, pero yejuan tlajtlatoua ikan tontojyotl, sano yejua nixpolos.
9 Yejuan melajkanemi xitlaj* kimakajsi, pero yejuan xkuajli nouika, xkuajli ontlami inemilis.
10 Yejuan teixtekochilia para tekajkayaua, kuajki miyek tlen sanoyej xkuajli, pero yejuan techikajkanotsa, tepajleuiya para se ma kipiya teyoltlalijli ipan iyojlo.
11 On tlen kijtoua sen tlakatl yejuan yolmelajki, kitemaka nemilistli, pero itlajtol sen xompayejyeua kiyana on tlen xkuajli yejuan kipiya ipan iyojlo para kijtlakoua okse tlakatl.
12 Sen tlauejli kuajki nouijsokilistli, pero on tetlajsojtlalistli* kichiua para ma onya tetlapojpoluilistli.
13 Ipan itlajtol sen tlamatki* onkaj tlamatkilistli, pero on yejuan xtlamatki*, kitlakapanuitekij ikan kojtli.
14 Yejuan tlamatkej* kejeuaj on tlen kimatij, pero ijkuak on yejuan tontos kijtouaj itlaj, nochiua itlaj tlen xkuajli.
15 Yejuan rico, ika nomanauiya on tlen kipiya, pero yejuan mayanki, ika imayanalis nomiktia.
16 On tlen kichiua on tlakatl yejuan yolchipauak, kimaka kuajli nemilistli, pero on tlen kichiua on tlakatl yejuan xompayejyeua, kuajki tlajtlakojli.
17 Yejuan kinokauilia ma kichikajkanotsakan, kinextia kuajli nemilistli, pero yejuan xkineki itlaj ma kijlikan popoliuis.
18 Yejuan kiyana itlauel, yejua sen tlakajkayajketl, niman on yejuan nouiyan kiteijlij tetlajtolketsteualistli nochiua sen tonto.
19 Yejuan sanoyej tlajtolmiyek, kamaijneua tlen xkuajli, pero yejuan tlamatki* kimati kamanon nokamatsakua.
20 Itlajtol sen tlakatl yejuan yolmelajki, sanoyej ueyi kijtosneki ken itlaj plata yejuan más kuajli, pero on tlen kinemilia sen xkuajli tlakatl, xitlaj* kitosneki.
21 Itlajtol sen tlakatl yejuan yolmelajki, kimpaleuiya miyekej, pero sen tlakatl yejuan tonto, miki pampa xkuajli tlanemilia.
22 Itlatiochiualis toTEKO yejua kitemaka riquezas, niman xitlaj* ika notenmati.
23 Sen tlakatl yejuan tonto kuelita ijkuak kichiua tlen xkuajli, pero sen tlakatl yejuan tlamatki* kuelita ika kipiya on tlamatkilistli.
24 On tlenon más kimakajsi sen tlakatl yejuan xompayejyeua, yejua ipan nochiua, pero sen tlakatl yejuan yolchipauak kiselia tlen yejua kineki.
25 Ijkuak on yejuan xompayejyeua ipan nochiua tlen xkuajli, popoliui, pero sen tlakatl yejuan yolmelajki nochipa nemis.
26 Maka kaman xtlakeua yejuan tlatsijki, pampa on yejuan tlatsijki ken itlaj vinagre yejuan mitstlanxokopetsoltis, noso ken itlaj poktli yejuan mitsixkokos.
27 Yejuan kitlakaita toTEKO kipiyas ueyi nemilistli, pero sen xompayejyeua xuejkauis nemis.
28 Intlamachalis on tlakamej yejuan yolmelajkej kuajli kinmakas pakilistli, pero intlamachalis on xompayejyeuamej xkaman kinmakas pakilistli.
29 ToTEKO kinmanauiya on yejuan kuajli nouikaj, pero kinpojpoloua on yejuan xkuajli nouikaj.
30 Yejuan yolmelajki tis xakaj uelis kixtis ipan ipaís pero sen xompayejyeua xnochipa nemis ipan itlalpan.
31 Ipan itlajtol sen tlakatl yejuan yolchipauak, kisa tlamatkilistli, pero itlajtol sen tlakatl yejuan xompayejyeua xkauiliskej ma tlajto.
32 On tlakatl yejuan yolchipauak kualtsin tlinon kijtoua, pero on tlakatl yejuan xompayejyeua san tlamach kijijtouaj tlen xkuajli.