11
ToTEKO xkuelita on tlatemachiualtin yejuan xkajxitiaj tlen kitemachiuaj, pero on tlatemachiualtin yejuan kuajli kajxitiaj tlen kitemachiuaj, kemaj uej kuelita.2 Yejuan noueyimati, más sakin* nopijpinajtia, pero yejuan noknelia kipiya tlamatkilistli.
3 On tlakamej yolmelajkej kinyekana on iminyolmelajkilis para kichiuaj on tlen kuajli, pero on tlakamej omexayakyejkej kinpopolos pampa tlakajkayajtinemij.
4 Ijkuak toTEKO teyolkuitis, xitlaj* ika tepaleuis on riquezas, pero on yolmelajkilistli temakixtis.
5 Ijkuak se yolmelajki, kipaleuiya para yau ipan kuajli ojtli, pero sen xopayejyeua sano ixompayejyeualis kitlajkali.
6 On tlakamej yejuan kichihuaj tlen kuajli, kinmanauiyaj on iminyolmelajkilis, pero yejuan tlaixpachouaj, sano yejuamej notlatlaliliaj pampa kipiyaj xkuajli eleuilistli*.
7 Ijkuak on tlakatl yejuan xompayejyeua miki, on tlen kichaya kipiyas niman nochi on tlen kinemiliaya kiselis no iuan miki.
8 Yejuan nouika yolchipauak xitlaj* ipan nochiua tlen xkuajli, pero on tlakatl yejuan xkuajli nouika, kemaj, ipan nochiua on tlen xkuajli.
9 Itlajtol sen xompayejyeua tlakatl sanoyej xkuajli kinchiuilia oksekimej, pero itlamatkilis* sen tlakatl yolmelajki, kinmanauiya.
10 Ijkuak on yolchipajkej kiseliaj tlen kuajli, nochi on ueyikalpan paki, niman ijkuak on xompayejyeuamej mikij, on ueyikalpan hasta tlaluichiua.
11 Ijkuak on yolchipajkej tlakamej toTEKO kintiochiua, sen ueyikalpan no kiselia on tlatiochiualistli, pero ijkuak on xompayejyeuamej kijtouaj tlen xkuajli, on ueyikalpan xoxotoni.
12 On tlakatl yejuan xpiya kuajli tlatlamachilistli, kinchichiita oksekimej, pero on tlakatl yejuan kuajli itlamachilis, kimati kamanon nokamatsakua.
13 Ijkuak sen tlakatl yejuan nouiyan kiteijlia tetlajtolketsteualistli kipanextia inmaluiltlajtol oksekimej, pero on tlakatl yejuan nochimej kitlaliaj iminyojlo itech, xitlaj* kiteijlia on inmaluiltlajtol oksekimej.
14 Tla sen tekiuaj xkuajli kiyekana sen nación, on nación uetsi, pero miyekej kuajkualtin tetlakanonotskej, kimanauiskej on nación.
15 Tla sen tlakatl nokalaktia kitlaxtlauas on tomin yejuan okse tlakatl yejuan xkixmati kinotlaneuiya, sano yejua kinotejtemouilia tlen xkuajli. Pero yejuan xnokalaktia kipaleuis yakaj yejuan xkixmati ijkuak kitlaneui tomin, kuajli nemis.
16 Sen kuajli siuatl, nochimej kitlakaitaj, niman sen tlakatl yejuan notlajkali tekiti, ueli ricojtia.
17 Yejuan teikneliani sano yejua kinochiuilia tlen kuajli, pero yejuan xteikneliani sano yejua kinochiuilia tlen xkuajli.
18 Sen tlakatl xompayejyeua on tlen kitlani san kixkajkayaua, pero on yejuan kichiua nochi tlen kuajli, kiselis itlayokolil.
19 Tla sen tlakatl kichiua tlen kuajli, kipiyas nemilistli, pero yejuan kichiua tlen xkuajli, kipiyas mikilistli.
20 ToTEKO sanoyej kikualaniaj on yejuan xkuajli tlanemiliaj, pero kimpakaita yejuan kuajli nouikaj.
21 Melauak, on xompayejyeua ika onkaj kiselis icastigo, pero on yolchipajkej nomanauiskej de on castigo.
22 On siuatl yejuan kualtetsin pero xtlamatki*, nochiua ken sen anillo de oro yejuan kitlaliaj ipan iyak sen pitso.
23 On tlen kinekij on tlakamej yolmelajkej nochi kuajli kisa, pero on tlen xkuajli kichiuaj on tlakamej xompayejyeuamej san kuajki tlauejli.
24 Yejuan kuelitaj kitemakaj itlaj, más miyek kiseliskej, pero yejuan tsotsokamej ontlamij ipan mayantli.
25 Yejuan kuelita tepaleuis kiselis tlen kuajli, niman yejuan tepaleuiya no kipaleuiskej ijkuak nonekis.
26 Yejuan nochi kiyana itrigo pampa kineki kinamakas mas patioj, on tlakamej kitlauelita. Pero yejuan kinamaka itrigo, on tlakamej kiueyiteneuaj.
27 Yejuan kineki kuajli nouikas ipan on tlen kuajli, kipakaitaskej, pero yejuan xkuajli nouika xkuajli ontlamis.
28 Yejuan kitlalia iyojlo ipan iriquezas, inemilis uetsis ken itlaj xojtli yejuan uaki, pero on tlakamej yolmelajkej, iminnemilis yes ken ima sen kojtli* yejuan nochipa xoxouixtias.
29 On yejuan kichiuilia tlen xkuajli ifamiliaj, xitlaj* herencia kiselis. Niman sen tonto nochipa tekitis itech sen tlamatki*.
30 On yolmelajkilistli kitemaka nemilistli kenon kojtin* yejuan kitlakitiaj uelik. Pero on xompayejyeualistli kitekixtilia nemilistlia.
31 Tla sen tlakatl yejuan yolmelajki kiselia itlaxtlauil nikan tlaltikpak ika on tlen kuajli okichiu, tla ijkon tikmatij ika sen tlakatl xompayejyeua niman on tlajtlakolej más kiselis icastigo ika on tlen xkuajli okichiu.