12
Tla yakaj kineki ma kichikajkanotsakan ijkuak kichiua xkuajli, kistosneki kineki tlamatki* yes. Pero tla se xkineki ma kajuakan, kijtosneki xkipiya itlamachilis.2 Yejuan kuajli tlakatl toTEKO kiselia kuajli, pero yejuan kinejnemilia para kichiua on tlen xkaujli, kicastigaroua.
3 On tlen xkuajli xkaman yakaj kipaleuiya, pero on tlakamej yolmelajkej nokauaskej para yeyika.
4 Sen tesiuau yejuan kuajli nouika, iueuentsin* kiselia tlakaitilistli, pero sen tesiuau xompayejyejua nochiua ken itlaj palanilistli ipan iomiyouan.
5 Itetlakanonotsalis sen yolmelajki tlakatl melajki kisa, pero ipan itetlakanonotsalis sen xompayejyeua onkaj tlakajkayaualistli.
6 Ipan itlajtol sen tlakatl xompayejyeua onkaj mikilistli, pero ipan itlajtol sen tlakatl yolkuajli onkaj temakixtilistli.
7 On xompayejyeuamej mikij niman xkimpiyaskej iminuekakoneuan, pero ifamilia sen yolmelajki tlakatl nochipa kimpiyaskej iminuekakoneuan.
8 Sen tlakatl kiueyiteneuaj ipampa on ikuajlitlamachilis, pero sen tlakatl tontoj xakaj kineki kiselis.
9 Más kuajli nemi sen tlakatl maski xueyixtikaj pero kipiya itekitkau, xken sen tlakatl yejuan ueyixtikaj pero xakaj kimaka tlen kikuas.
10 Sen tlakatl yolmelajki kintlajsojtla iyolkauan, pero sen tlakatl xompayejyeua yej kinmajmailia.
11 Yejuan kintekiti itlaluan xitlaj* kipoloua tlen kikua, pero sen tonto san tlamach ika nokajtinemi yejuan xitlaj* kitosneki.
12 On xompayejyeuamej nochiuaj esclavos de on tlen xkuajli keleuiyaj. Pero on yolmelajkej nochipa kichiuaj on tlen kuajli.
13 Sen xompayejyeua tlakatl sano yejua notlatlalilia ika on tlen kijtoua, pero sen yolmelajki tlakatl kinokixtilia on tlen xkuajli.
14 Cada se sano yejua kiselia de on tlen kuajli kijtoua, niman kiselia de on tlen kuajli kichiua.
15 Sen tonto kuitia nochi kuajli tlen kichiua, pero sen tlakatl tlamatki* kineki kakis on tetlakanonotsalistli tlen kijliaj.
16 Sen tonto niman nesi ika kualani, pero sen tlamatketl kixikoua maski yakaj kuijuikaltia.
17 Sen tlakatl yejuan kuajli testigo, kiteijlia tlen melauak, pero yejuan xkuajli testigo kiteijlia istlakatilistli.
18 On tlen se kijtoua yejuan xachtoj kinemilia, ueli tekokoua ken itlaj cuchillo, pero on tlen kijtoua, yejuan tlamatki*, teyoltlalia.
19 On tlakajkayaualistli más sakin* machiya, pero on tlen melauak xkaman nopatla
20 Onkaj tlakajkayaualistli ipan iminyojlo on xompayejyeuamej yejuan kinemiliaj kichiuaskej xkuajli, pero onkaj pakilistli ipan iminyojlo on yejuan kinekij ma onya yolseuilistli intech oksekimej.
21 Sen tlakatl yomelajki, nomanauis de itech on tlen xkuajli, pero ipan sen xompayejyeua miyek ipan nochiuas on tlen xkuajli.
22 ToTEKO xkinmineki on tlakajkayajkej, pero kimpakaita yejuan nochipa kichiuaj tlen kijtouaj.
23 Yejuan tlakajsikamati xsa kijtojtinemi nouiyan on tlen kimati, pero yejuan tontoj sa kijtojtinemi on tlen xnejli kimati.
24 Yejuan chikauak tekiti saniman kimpiyas itekitkauan, pero yejuan tlatsiui nochipa tetech tekitis ken sen esclavo.
25 Sen ueyi ajmantli xkauilia sen tlakatl ma nemi iyolika, pero ijkuak kaki sen kuajli tlajtojli, yejua noyoleua.
26 Sen tlakatl yolmelajki ueli kiyekana yakaj ipan kuajli ojtli, pero sen xkuajli tlakatl nopopoloua ipan xkuajli ojtli
27 Sen tlatemojketl tlatsijki xkajsi nion sen yolki, pero yejuan kuelita chikauak tekitis saniman ricojtia.
28 On yolmelajkalistli teuika kampa onkaj nemilistli, pero on xompayejyeualistli teuika miktlan.