13
Sen tekoneu tlamatki* kinokauilia ma kajua itataj, pero sen tekoneu yejuan xipan teita xkineki kakis tlinon kijliaj.2 Cada se sa no yejua kiselia de on tlen kijtoua pero on yejuan kipatla itlajtol, kineki kinchiuilis xkuajli oksekimej.
3 Yejuan achtoj kinemilia niman kemaj tlajtlatoua, nomanauiya inemilis, pero yejuan san tlamach kijijtoua, sano yejua kinotejtemouilia tlen xkuajli.
4 Sen tlakatl tlatsijki kineki kipiyas itlaj maski xtekiti, pero sen tlakatl yejuan tekiti chikauak ueli kipiya nochi tlen kineki.
5 Sen tlakatl yolmelajki kitlauelita on tlakajkayaualistli, pero sen tlakatl xompayejyeua kipiya pinaualistli niman xakaj kitlakaita.
6 On Yolmelajkilistli kimanauiya on tlakatl yejuan xkipiya tlajtlakojli, pero on xompayejyejualistli yejuan sen tlakatl kichiua sano yejua kipopoloua.
7 Nemij yejuan nouikaj ken ricos, maski xitlaj* kipiyaj, niman nemij yejuan nochi kipiyaj pero nouikaj ken mayankej.
8 Tla sen tlakatl rico kichtekij para kitlajtlaniliaj tomin, yejua ueli nomanauiya ikan itomin para xkimiktiaj. Pero sen mayanki xkaman yakaj kijlia tla kimiktis.
9 Innemilis on kuajkualtin tlakamej ken itlaj tlauijli yejuan kintlauiluiya oksekimej, pero innemilis on xompayejyeuatlakamej ken itlaj tlauijlij yejuan sejtikaj.
10 On noueyimatilistli san ueli kichiua para ma onya tlauejli, pero on tlamatkilistli onkaj intech on yejuan kinekij kakiskej tetlakanonotsalistli.
11 On tomin yejuan kisijkamiyekiliaj no niman kitlamiyaj, pero yejuan ika yolik kisentlalijtiuij kimiyekiliaj.
12 Ijkuak sen tlakatl kicha kiselis itlaj niman xueli kiselia, sanoyej najmana. Pero ijkuak sen tlakatl kiselia tlinon sanoyej kineki kipiyas, yejua ken sen kojtlajkijlotl yejuan temaka nemilistli.
13 Yejuan xkineki kakis sen kuajli tetlakanonotsalistli ika onkaj tlajyouis, pero yejuan kineki kakis sen tetlakanonotsalistli, kiselis on tlen kuajli ken itlayokolil.
14 Itemachtil sen tlamatki* kitemaka nemilistli, niman temanauiya ipan sen mikilistli.
15 Sen tlakatl yejuan kuajli tlanemilia kitlakaitaj, pero yejuan notlajtolkuepaj yaskej ipan mikilistli.
16 Yejuan kuajli tlanemilia kichiua itlaj ikan kuajli itlamachilis, pero on tonto xkuajli tlanemilia niman kiteititia itontojyo.
17 Sen xkuajli temachistijketl mitschiuilis tlen xkuajli, pero on temachistijketl yejuan nochipa kijtoua tlen melauak, kichiuas para nochi ma kisa kuajli.
18 Sen tlakatl yejuan xkineki ma kiyektlalikan kiselis mayantli niman xakaj kitlakaitas, pero yejuan kineki ma kiyektlalikan kitlakaitaskej.
19 Ijkuak sen tlakatl kiselia tlinon kinekiya kipiyas, sanoyej paki. On tlakamej yejuan tontos xkinekij kikauaskej on tlen xkuajli.
20 Xmouika iuan sen tlamatki* niman titlamatki* yes, pero xmouika iminuan on tontos niman timixpolos.
21 On tlajtlakolejkej nochipa kintokatinemi on tlen xkuajli, pero on yolmelajkej kiseliskej tlen kuajli ken intlaxtlauil.
22 Iriqueza sen kuajli tlakatl kinkauilijteua ixuiuan, pero iminriqueza on tlajtlakolejkej intech nokauas on tlakamej yolmelajkej.
23 Kampa tôkaj on mayankej ueli sanoyej kuajli tlatlaki, pero on ricos xyolmelajkej, xkinkauiliaj ma kipiyakan on tlakyotl.
24 Yejuan xkicastigaroua ikoneu, xmelauak kitlajsojtla, pero yejuan melauak kitlajsojtla* ikoneu kimelajkatlalia.
25 Sen tlakatl yolmelajki ijkuak tlakua kuajli ixui, pero yejuan xompayejyeua xkaman kuajli ixui.