14
Sen siuatl yejuan tlamatki kuajli kiyekana ifamilia, pero sen siuatl yejuan xtlamatki xkuajli kiyekana ifamilia yej kixoxotonia.2 Sen tlakatl yejuan kuajli nouika kitlakaita toTEKO, pero yejuan xkuajli nouika xipan kita toTEKO.
3 Sen tlakatl yejuan tontoj kiselis castigo ipampa on tlen kijtoua, pero sen tlakatl yejuan tlamatki* sano itlajtol kimanauiya.
4 Ijkuak xnemij uakaxtin on kueskomatl xitlaj* kipiya trigo, pero ikan itekiu on kojtik uakax, miyek trigo tlaki.
5 Sen tlakatl yejuan kuajli testigo, nochipa kiteijlia tlen melauak, pero yejuan xkuajli testigo kiteijlia istlakatilistli.
6 Sen tlakatl yejuan tepijpinauiya, kitejtemoua tlamatkilistli niman xkinextia, pero yejuan tlakajsikamati, saniman ueli kinextia on tlamatikilistli.
7 Xtlalkaui sen tlakatl yejuan tonto pampa yejua xitlaj kipiya tlen kuajli para mitsititis.
8 Itech sen tlakatl tlamatki* niman nesi ika kuajli kinemilia on tlen kichiua, pero sen tontoj san kinemilia ika kuajli tlanemilia, maski xmelauak.
9 On yejuan tontos xkitetlajtlaniliaj ma kintlapojpoluikan ijkuak itlaj xkuajli kitechiuiliaj, pero yejuan yolmelajkej kinekij Dios ma kintlapojpolui.
10 Xakaj kimati tlinon mitsajmana niman tlinon mitspaktia. Yej, san tejua tikmati.
11 Ikal sen tlakatl yejuan xompayejyeua xoxotonis, pero ikal sen kuajli tlakatl, kuajli nokauas kojtik.
12 Onkaj ojtli yejuan nesi kuajli, pero on ojtli teuika ipan mikilistli.
13 Kamanian, maski yakaj uetska ipan iyojlo, kipiya ajamantli. Nimanijkuak tlami ika uetska, nokaua on najmana.
14 Yejuan kichiuaj tlen xkuajli kiseliskej castigo, pero yejuan kichiuaj tlen kuajli kiseliskej intlayokolil.
15 On tlakatl yejuan tonto nochi kineltoka tlen kijliaj, pero on tlakatl yejuan tlamatki* achtoj kinemilia tlinon kichiuas.
16 Sen tlakatl tlamatki* kimakajsi kichiuas on tlen xkuajli niman kitlalkauiya, pero sen tlakatl yejuan tonto xkuajli nonemilia, niman san kichijtetsi tlen xkuajli.
17 Yejuan niman kualani san kichijtetsi itlaj tontonyotl, pero yejuan tlamatki* ueli noteltia niman xkichiuaa.
18 On tlakamej yejuan tontos kiseliskej intlaxtlauil de on tlen xkuajli kichiuaj, pero on tlakamej yejuan tlamatkej* kiseliskej intlaxtlauil de on tlaixmatkilistli.
19 On xkuajkualtin tlakamej notlakuantelketsaskej intech on kuajkualtin tlakamej, niman on xompayejyeuamej notlakuantelketsaskej intech intsakuijlouan on yolmelajkej tlakamej para kiseliskej itlaj iknelilistli.
20 Sen tlakatl mayanki, hasta itlajsojkaikniuan* xipan kitaj, pero sen tlakatl rico uej miyekej kinekij iuan nouikaskej.
21 Yejuan xipan kita inisiuchanejkau kichiua tlajtlakojli, pero ¡kiselis miyek tlatiochiualistli yejuan kiknelia sen mayanki!
22 Yejuan san kinektokej kichiuaskej tlen xkuajli, nopopolouaj ipan inojui, pero yejuan kichiuaj kanika para kichiuaj on tlen kuajli, kiseliskej miyek tlakaitalistli niman tetlajsojtlalistli.
23 Tla tichikajkatekiti tikpiyas tlajtlamach* on tlen tikneki, pero tla san titlajtlajtoua, xitlaj* tikpiyas.
24 Sen tlakatl yejuan tlamatki* iriqueza nochiua on tlamatkilistli, pero on tlakatl yejuan tonto iriqueza nochiua, uej on itontoyoj.
25 Sen tlakatl yejuan kuajli testigo, yakaj kimanauiya, pero yejuan xkuajli testigo san ipampa yakaj kimiktiaj.
26 Yejuan kitlakaita toTEKO kipiyas sen ueyi temanauijketl para yejua niman ikoneuan.
27 ToTEKO kinmaka nemilistli yejuan kitlakaitaj niman kinmanauiya ipan sen mikilistli.
28 Sen rey kiselia sanoyej ueyi tetlakaitalistli ijkuak kimandaroua sen ueyi nación, pero kiselia sen ueyi pinaualistli ijkuak kimandaroua sen pitetsin nación.
29 Yejuan xniman kualani kiteititia ika kipiya miyek tlamachilistli, pero yejuan niman kualani kiteititia ika xnejli kimati
30 Yejuan xitlaj* kipajsoloua itlamachilis, itlalnakayo kipiya chikaualistli, pero on yejuan kipiya nexikojli hasta on iomiyouan palanij.
31 Yejuan kipijpinauiya sen mayanki, on ken kuijuikaltiskia Dios, on yejuan itemachijchijkau; pero ijkuak sen tlakatl kiknelia sen mayanki, Dios kitlakaita.
32 Ipampa on tlen xkuajli kichiua, sen xompayejyeua uetsi, pero sen tlakatl yolmelajki kimanauiya sano yejua iyolmelajkilis.
33 Ipan itlamachilis sen tlakatl tlamatki* onkaj tlamatkilistli, pero sen tonto nion xkimati tlinonon tlamatkilistli.
34 On melajkilistli kichiua para sen nación kitlakaitaj, pero on tlajtlakojli uej kipinajtia on nación.
35 Sen tekitketl yejuan listo, on rey kixtlajsojtla, pero yejuan xlisto, on rey kikualania.