15
Tla se teyemankanankilia, kitlauelseuiya yakaj, pero tla tetlauelnankilia, kichiua para se más ma kualani.2 Ipan imintlajtol on tlamatkej* kisa tlamatkilistli, pero ipan imintlajtol on yejuan tontos kisa tontojyotl.
3 ToTEKO nouiyan tlachixtikaj. Kinmitstikaj yejuan kuajli nouikaj niman yejuan xkuajli nouikaj.
4 Sen tlajtojli yejuan teyoltlalia, ken sen kojtli* yejuan itlakyo kitemaka nemilistli. Pero sen xkuajli tlajtojli sanoyej kipajsoloua sen tlakatl ipan ialma.
5 Sen tekoneu yejuan tontoj xkiselia itetlakanonotsalis itataj. Pero yejuan kiselia itetlakanonotsalis itataj, kiteititia ika kipiya kuajli itlamachilis.
6 Ichan sen tlakatl yejuan yolmelajki onkaj miyek tlajtlamach riquezas, pero on yejuan xompayejyeua san kipiya pajsolouilistli de nochi on tlen kitlani.
7 On tlamatkej* nochiuiyan kiteijliaj intlamatkilis*, pero yejuan tontos xueli itlaj kiteijlaj.
8 Iminuen on yejuan xompayejyeuamej xkipaktia toTEKO, pero iminorciones on yejuan yolmelajkej uej kipaktiaj.
9 ToTEKO sanoyej kualania ken nouikaj on xompayejyeuamej, pero sanoyej kintlajsojtla yejuan kinekij yolchipajkanemiskej.
10 Yejuan kisa ipan on kuajli ojtli, chikauak kicastigaroskej, niman yejuan xkiselia tetlakanonotsalistli, kitejtemoua mikilistli.
11 Tla toTEKO ueli kinta on yejuan yomikkej niman on yejuan nemij ne miktlan, ¡tla ijkon, más ueli kuajli kita iminyojlo on tlaltikpaktlakamej!
12 On yejuan xtetlakaitani kualani tla kajuaj, niman xkineki nosentlalis iminuan yejuan tlamatkej* para kiselis tetlakanonotsalistli.
13 Ijkuak se iyolika nemi, niman nesi ixko ika paktikaj, pero ijkuak se najmana, ixko nesi ken sanoyej kualo.
14 Yejuan kipiya kuajli kajsikamatilistli, kineki más tlamatki* yes, pero yejuan tonto kineki kimatis tlinon xitlaj* kijtosneki.
15 Para yejuan chanti ikan ajmantli, xonkaj tonajli yejuan kuajli, niman yejuan iyolika nemi, kimati ken nochipa iluitl.
16 Más kuajli tla timayanki niman nochipa tiktlakaitas toTEKO, xken tla tirico niman nochipa timojkanemis.
17 Más kuajli tikuas xojtlakuajli ikan paktli inuan on yejuan mitstlajsotlaj, xken tla tikuas on más kuajli uakaxnakatl kampa onkaj tlauejli.
18 Yejuan nimantsin kualani kipeualtia tlauejli, pero yejuan yolyemanki* ueli kiseuiya tlauejli.
19 On yejuan tlatsijki, ipan inemilis kimati ken sen ojtli yeskia kampa sanoyej uitstlaj, pero on yejuan yolchipauak, ipan inemilis kimati ken sen ojtli yeskia yejuan chipauak niman patlauak.
20 On tekoneu yejuan tlamatki* kimpaktia itajuan, pero on tekoneu yejuan tonto kimpinajtia itajuan.
21 On tlakatl yejuan tonto, kipaktia itontojyo, pero yejuan kipiya kajsikamatilistli kuajli nouika ipan inemilis.
22 Ijkuak se itlaj kichiuasneki niman xachtoj tetlajtoltia kenijki kuajli kichiuas intech miyekej tlamatkej*, xkuajli kisa. Pero tla achtoj kintlajtoltia on yejuan tlamatkej*, sanoyej kuajli kisa.
23 Sen tlakatl paki ijkuak ueli kuajli tenankilia. ¡Niman tenankilia melajki ijkuak kitocaroua tenankilis!
24 On ojtli yejuan kinuika on tlamatkej xkinuika tlatsintlan ipan mikilistli ne ipan on tlalkontli, yej kinuika tlejkotiu para tlakpak niman kinmaka nemilistli.
25 On yejuan noueyimati, toTEKO kikuilia ichan, pero itlaluan on kaualtsintli, uej kicuidarouilia.
26 ToTEKO sanoyej kualania on tlen kinemilia kichiuas on xompayejyeua, pero on tlen kijtouaj on yejuan yolchipajkej uej kipaktia.
27 Yejuan sanoyej kineki ricojtis, hasta ifamilia kixoxotonia, pero yejuan xkiselia ichtakatlaxtlauijli, uejkauis nemis.
28 On tlakatl yejuan yolmelajki, achtoj kuajli tlanemilia ijkuak tenankilia, pero ikamak sen xompayejyeua kisa on tlen xkuajli.
29 ToTEKO xkineki kintas on xompayejyeuamej, pero yejua kaki iminoración on yolmelajkej.
30 Ijkuak yakaj teita ikan paktli hasta teyolpaktia; sen kuajli tlajtojli hasta teyoleua.
31 Yejuan kinokauilia ma kajuakan ika on tlajtojli yejuan kipaleuis para nemis más kuajli, iminuan nopouas on yejuan tlamatkej*.
32 Yejuan xkineki itlaj ma kijlikan, sano yejua xnotlajsojtla. Pero yejuan kinokauilia ma kajuakan, kiselis kajsikamatilistli.
33 Yejuan kitlakaita toTEKO kiselia tlamatkilistli. Para se kitlakaitiskej, noneki yolyemanki* yes.