16
On tlakamej kuajli kinejnemiliaj tlinon kichiuaskej, pero toTEKO yejua kijtoua tla uelis kichiuaskej noso ka.2 Sen tlakatl kita nochi kuajli tlen kichiua, pero toTEKO yejua kixtlaloua tline on tlakatl ijkon okichiu.
3 Xtlali ipan imauan toTEKO nochi tlinon tikneki tikchiuas, niman on tlen tikchiuas kisas kuajli.
4 Nochi tlen toTEKO okichijchiu kipiya kanon kitekitiltis, hasta sen tlakatl xompayejyeua no okichijchiu para ipan on tonajli ijkuak kicastigaros.
5 ToTEKO xkinmijyouiya on yejuan noueyimatij; melauak toTEKO kincastigaros.
6 Ikan tetlajsojtlalistli* niman ika on tlen melauak notlapojpoluiya on tlajtlakojli. Tla se kitlakaita toTEKO, kajkaua tlen xkuajli.
7 Ijkuak toTEKO kuelita ken nouika sen tlakatl, hasta itlauelikniuan on tlakatl kinyoltlalia para xok kitlauelitaj.
8 Más kuajli tla sen tlakatl kitlanis achijtsin pero ikan chipajkatekitl, xken tla miyek kitlanis niman san kiteixpachouilis.
9 Sen tlakatl kuajli kinejnemilia tlinon kichiuas ipan inemilis, pero toTEKO yejua kiyekana para ueli kichiua.
10 Sen rey kitlalia leyes ikan on tekiuajyotl yejuan Dios kimaka, niman on leyes kisaj melajkej.
11 ToTEKO tlanauatia para nochi on tlen kinamakaj ma kitemachiuakan ken kitocaroua.
12 On reyes kualanij intechkopa on xompayejyeuamej, pampa ijkuak on tlakamej nouikaj ken kitocaroua, on rey más kuajli tlamandaroua.
13 Sen rey nochipa kuelita ijkuak on tlakamej kijtouaj on tlen melauak.
14 Ijkuak on rey kualani, ueli tlanauatia yakaj ma kimiktikan, pero sen tlamatki* kimati ken kiyoltlalia.
15 Ijkuak on rey ixuetska nesi ika xtlanauatis yakaj ma kimiktikan, yej kitemakas nemilistli, niman iteiknelilis* ken itlaj kiautli ipan atliuetskatlaj* yejuan kichiua ma noskalti on tlatoktli.
16 Más ueyi kijtosneki titlamatki* yes xken tla tikpiyas miyek oro. Más ueyi kijtosneki tikajsikamatis xken tla tikpiyas miyek plata.
17 On kuajkualtin tlakamej kichiuaj kanika para kinokixtiliaj on tlen xkuajli. Tla se kipiya cuidado ken nouika, sano yejua kinomaka nemilistli.
18 Yejuan noueyimati nimantsin nopopoloua. Yejuan texixikoltia nimantsin uetsi.
19 Más kuajli timochiuas yolyemanki* iminuan yejuan mayankej, xken tikpiyas riquezas inuan on noueyimatij..
20 Yejuan kineki kuajli kakis on temachtijli, kiselis tlen kuajli. ¡Ma kiseli miyek paktli yejuan kitlalia nochi iyojlo itech toTEKO!
21 On tlakamej niman kitaj ika yejuan tlamatki* kuajli tlanemilia. Sen tlajtojli yemanki niman kualtsin más ueli tetlapololtia.
22 Yejuan kuajli tlakajsikamati, on itlamatkilis* kimaka nemilistli, pero sanenkaj kichikajkanotsaj on yejuan tontos.
23 Yejuan tlanemilia ikan tlamatkilistli achtoj kuajli kinemilia tlinon kijtoua, niman on tlen kijtoua más ueli tetlapololtia.
24 Sen yemankatlajtojli ken itlaj nekutli. Nochimej kiseliaj ikan paktli, niman kitemaka chikaualistli.
25 Onkaj se ojtli yejuan nesi kuajli , pero on ojtli teuika ipan mikilistli
26 Tla sen tekichijketl apismiki, on apistli kichiualtia más ma tekiti pampa kineki kitlanis tomin para kouas tlakuajli.
27 Sen tlakatl yejuan xompayejyeua, iyojlo ken itlaj horno yejuan tentikaj ika tlen xkuajli, hasta on tlen kijtoua tetlatia ken itlaj tlitl.
28 Sen xkuajli tlakatl kichiua para ma nokualaniua. Sen istlakatki* kipejpeualtia tlauejli niman kinxexeloua on tlajsojkaiknijtin.
29 Yejuan sanoyej tlauelej kajkayaua itlajsojkaikniu* niman kuika ipan xkuajli ojtli.
30 Tla yakaj ixtekochi, kijtosneki itlaj xkuajli kineki kichiuas. Niman tla yakaj notentepitskua, kijtosneki itlaj xkuajli yokichiu.
31 Ikuaistal sen tlakatl nochiua ken itlaj kuaxochitl de ueyi tlakaitalistli. Kitlayokoliaj pampa kuajli okiyekan inemilis.
32 Más ueyi kitosneki yejuan xniman kualani xken sen tlakatl yejuan noteneua xmojki. Más kuajli tla se sano yejua noteltlalia xken tla kinoyaxkatia sen ueyikalpan.
33 On tlakamej kichiuaj suertes para kimatij tlinon kuajli kichiuaskej, pero toTEKO san yejua kijtoua tlinon nochiuas.