17
Más kuajli tikuas tlaxkalkuepitstli kampa onkaj yolseuilistli, xken titlakuas ipan sen iluitl kampa onkaj tlauejli.2 Sen tekitketl yejuan tlamatki* ueli kimelajkatlalia on konetl tonto, yejuan ikoneu on tekimakaketl, niman ijkon teuan kiselia herencia iminuan on sekimej teikniuan.
3 On oro niman on plata kipanoltiaj ipan tlitl para kitaj tla chipauak, pero on tlen kinemilia sen tlakatl, toTEKO kitlatlata para kita tla chipauak.
4 Sen tlakatl yejuan xompayejyeua kuelita kaki tlen kjtouaj on xompayejyeuamej, niman on yejuan tlakajkayajki kuelita kaki nochi tlen kijtouaj on tlakajkayajkej.
5 Yejuan kipijpinauiya sen mayanketl, on ken kuijuikaltiskia Dios, on yejuan itemachijchijkau; on yejuan ika uetska on mayanketl ijkuak tlajyouiya, ika onkaj kiselis icastigo.
6 Iminixuiuan on ueuentsitsimej yejua inueyimatilis, niman on tekoneuan inueyimatilis, uej imintajuan.
7 Sen tlakatl yejuan tontoj xkinamiki para tlajtlajtos ikan uejueyi tlajtojli, nion sen ueyixtikaj tekiuaj xkinamiki kijtos tlakajkayaualistli.
8 Yejuan kiteichtakamaka tomin kuitia nochi ueli kichiua, pampa kita nochi kuajli kisa tlinon kichiua.
9 Yejuan kineki kipiyas itlajsojkaikniu* ika onkaj kitlapojpoluis ijkuak kichiuilia xkuajli, pero yejuan xkineki tetlapojpoluis kipolos itlajsojkaikniu.
10 Yejuan tlamachilisyej san sejpa kajuaj, niman nimantsin ueli nouika ken kitocaroua. Pero sen tonto maski kimailiaj se cientojtipan, xkaman ueli nouika ken kitocaroua.
11 Yejuan kuelita tlauejli san tepeualtijtinemi tlauijsokis, pero se tonajli konnamikis sen tlakatl yejuan más xompayejyeua niman kitlajyouiltis.
12 Sen tlakatl yejuan tontoj niman kipanextia itontojyo, más temojtij xken sen yolki osa yejuan kualani ika kinkuilisnekij ikoneuan.
13 Sen tlakatl yejuan kitekuepilia on tlen kuajli okichiuilijkej ika on tlen xkuajli, ichan nochipa onyas tlen xkuajli.
14 Ijkuak yakaj peua nokamauijsoki iuan okse, nochiua ken itlaj sen atsakualoyan ijkuak on atl kipetla, niman xok yakaj ueli kiteltia. Yejua ika más kuajli timejkuanis para maka teuan tiatokos.
15 ToTEKO sanoyej kualania ijkuak kita kimakauaj sen xompayejyeua, niman yej castigarouaj yejuan xitlaj* xkuajli kichiua.
16 ¿Tlinon ika kipaleuis itomin sen tlakatl yejuan tonto tla xkineki tlamatkilistli?
17 Sen tetlajsojkaikniu nochipa tenotski, niman ijkuak onkaj ajmantli nochiua ken sen melauak teikniu.
18 Sen tlakatl sanoyej tonto yejuan nokalaktia kitlaxtlauas kampa kiteuikilia itlajsojkaikniu.
19 Yejuan kuelita teuan nokamauisoki kuelita kichiua tlajtlakojli. Yejuan nochipa noueyiteneua sano yejua nopopoloua.
20 Yejuan iyojlo temi ika on tlen xkuajli, xkaman kiselis tlen kuajli. Yejuan tlakajkayaua kipiyas ueyi pajsoliuilistli.
21 Tla sen tajtli kipiya ikoneu sanoyej tonto, san kimaka ajamantli. Tla sen tajtli kipiya ikoneu yejuan nion xitlaj* kajsikamati, ikoneu xkaman kimakas paktli.
22 On pakilistli yejuan onkaj ipan iyojlo sen tlakatl, yejua nochiua ken sen kuajli pajtli yejuan tepajtia, pero tla ipan iyojlo yej onkaj ajmantli xitlaj kuajli nochiuas.
23 Sen xkuajli tekiuaj kiselia tomin san ichtaka, para xok kichiua itekiu ken kitocaroua.
24 Sen tlakatl tlamatki* kineki kipiyas más tlamatkilistli, pero sen tonto xkimati on tlen kineki.
25 Sen tekoneu yejuan tonto san kiminmaka itajuan sen ajmantli niman chichiyalistli.
26 Xkuajli para castigaroskej yejuan xitlaj* xkuajli kitechiuilia, nion kitlatsuitekiskej sen ueyixtikaj tlakatl yejuan nochimej kitlakaita.
27 Yejuan tlamatkej* uelij notenijmatij, niman yejuan tlamachilisyejkej xniman kualanij.
28 Hasta sen tonto ueli kitaj ken tlamatki*, niman tlakajsikamatki ijkuak ueli nokamatsakua niman xnauati.