18
Sen tlakatl yejuan sano yejua noneki, niman nochi kineki san para yejua, xkineki ma kitlakanonotsakan.2 Yejuan tonto xkineki kasikamatis itlaj. San kuelita kimijlia oksekimej on tlen yejua kinemilia.
3 On tlen xkuajli, kuajki tlen tepinajtij, niman on noueyimatilistli xkipiya tetlakaitalistli.
4 Itlajtol sen tlakatl yejuan tlamatki* nochiua ken itlaj atlaltekontli* kampa meya on tlamatkilistli. Meya ken itlaj atl meya kampa sanoyej uejkatlan, niman akueponi ken sen ueyi ayajtok.
5 Sanoyej xkuajli tla on jueces kimakauaj sen xompayejyeua, niman yej castigarouaj yejuan xitlaj* kichiua.
6 Ijkuak on tlakatl tonto kijtoua itlaj, kichiua para peua nokamauijsokilo. On tlen kijtoua san kichiua para ma kitlatsuitekikan.
7 Sen tlakatl tonto sano ikan itlajtol nixpoloua. Ikan ikamak sano yejua nokechmekayotia.
8 Ijkuak sen chakua tlamach tetlajtlajtouilia, sanoyej kuelkakij, pero ika on chakuayotl tlamach nochiua tlen sanoyej xkuajli ipan iyojlo se tlakatl.
9 Yejuan tlatsijkej niman on yejuan tlaxoxotoniaj, nochiuaj ken iknijtin.
10 ToTEKO ken sen torre yejuan ueyi niman kojtik yejuan itech yauij para nomanauiyaj on yolmelajkej. 11 Sen tlakatl rico kuitia ika on tlen kipiya yejua ika nomanauis, ken sen uejkapan tepanchinantli kimanauiya sen ueyikalpan.
12 Antes uetsis, se tlakatl achtoj noueyimati, niman antes kiselis tlakaitalistli, achtoj noyolemanalia.
13 Yejuan nimantsin tenankilia niman xachtoj kaki tlinon kijliaj, kichiua sen tontojyotl niman pinaualistli.
14 Ikan iyoleualis sen kokoxki uelis pajtis, pero xakaj uelis kipaleuis yejuan xkipiya yoleualistli.
15 Yejuan tlamatkej* niman tlamachilisyejkej kitlaliaj iminnekilis para kasikamatiskej más. Yejuamej kitejtemouaj kasikamatilistli.
16 San akinon yejuan kuajki tetlayokolijli*, kitlapouiliaj tsakuijlotl. Hasta on tlakatl yejuan más ueyixtikaj kuajli teselia tla kiktiliaj tetlayololijli.
17 Yejuan achtoj tlajtoua para nomanauis, nesi ken melauak tlen kijtoua. Pero ijkuak yejko on itlauelikniu, yejua kipanextia ika xmelauak tlen okijtoj.
18 ToTEKO yejua kuaki yolseuilistli kampa onkaj tlauejli, niman yejua kinxeloua yejuan nouijsokij.
19 Más ouijtikaj* tikyoltlalis yakaj yejuan itlaj ika okikualanijkej, xken tikxoxotonis itepanchinanyo sen ueyikalpan. On kualanilistli más kojtik xken on tepostsatsastli yejuan kimanauiya ichan sen rey.
20 Cada se kiselis itetlayokolil noso icastigo yejua ika on tlen okijtoj. 21 Ika on tlen kijtoua sen tlakatl, uelis kiselis nemilistli noso mikilistli. Niman on yejuan sa miyek kijtoua, ika onkaj kiselis itetlayokolil noso icastigo.
22 Sen tlakatl yejuan nonamiktia iuan sen kuajli siuatl, kiselis on tlen sanoyej kuajli, niman kiselia itetlajsojtlalis* toTEKO.
23 Sen tlakatl mayanki teyemankatlajtlanilia limosna, pero sen rico tetlauelnankilia.
24 Sekimej tlajsojkaiknijtin yejuan iminuan timouika niman mitskauaskej, pero oksekimej xkaman mitskauaskej. Yej hasta más mitsnekiskej xken mokniuan.