19
Más kuajli tla se mayanki yejuan tetlakaita, xken sen tonto yejuan tlakajkayaua.2 Xkuajli itlaj tikchiuas tla xachtoj kuajli tiknemilia. Yejuan san kisijkachiua itlaj nopopolos.
3 Itontojyo sen tlakatl kichiualtia ma kixpolo inemilis, niman kemaj kitechtia toTEKO.
4 Sen tlakatl yejuan rico miyekej kinekij iuan nouikaskej ken intlajsojkaikniu, pero sen tlakatl mayanki hasta itlajsojkaikniuan* kimpoloua.
5 Yejuan xkuajli testigo ika onkaj kiselis icastigo, niman sen tlakajkayajki no xuelis nomanauis.
6 Miyek tlakatl itech yau niman nochiuaj itlajsojkaikniuan, on tlakatl yejuan kuelita tepaleuiya niman kitetlayokolia tlen kipiya.
7 Se mayanki, hasta ikniuan xkinekij. Niman itlajsojkaixmatkauan no xkinekiskej. Maski kintejtemoua ijkuak itlaj ipan nochiua, yejuamej xkinekij kipaleuiskej.
8 On yejuan kuajli kasikamati on tlen nomachtia niman kichiua on tlen kasikamati, notlajsojtla niman kiselis tlen kuajli.
9 Yejuan xkuajli testigo ika onkaj kiselis icastigo, niman sen tlakajkayajki no ika onkaj mikis.
10 Xkinamiki para sen tlakatl tonto nemis ken sen rico. No ijki xkinamiki sen esclavo yejua kinmandaros yejuan uejueyixtokej tlakamej.
11 Yejuan tlamatki* ueli kiteltlalia itlauel. Niman kipiya tlakaitalistli ijkuak tetlapojpoluiya.
12 Ijkuak on rey kualani, nanalka ken itlaj leon. Pero itetlajsojtlalis* nochiua tlatiochiualistli ken itlaj ajuichtli yejuan teseselia ijkuak sanoyej tona.
13 Sen tekoneu tonto kimaka tlajyouilistli itataj. Sen siuatl yejuan nochipa kitenkuikui iueuentsin* sanoyej tepajsoloj ken itlaj atl yejuan xkaman noteltia ika chipintikaj.
14 Se kiselia itech itajuan sen kajli niman riquesas ken herencia, pero sen tesiuau yejuan tlamatki* toTEKO kimaka.
15 On tlatsiuistli sanoyej tekochtlajkali, niman sen tlatsijki ipan uajlas mayajtli.
16 Yejuan kitlakamati ileyes toTEKO kimanauilis inemilis, pero yejuan xkineki kakis itlamachtil toTEKO mikis.
17 Tla tiktlanejtia itlaj sen mayanki, kijtosneki tiktlanejtia toTEKO, niman toTEKO yejua mitskuepilis.
18 Xmelajkatlali mokoneu chika sanken konetl niman yejua uelis nouikas kuajli, pampa tikpiyas tlajtlakojli tla xtikmelajkatlalis, niman yej mikis ipampa on tlen xkuajli kichiuas.
19 Yejuan sanoyej tlauelej, ika onkaj kiselis icastigo. Tla xcastigaroskej xkaman kajkauas ika tlauelej.
20 Xmokauili ma mitstlakanonotsankan niman ma mitsajuakan, para ijkon timochiuas tlamatki*.
21 Sen tlakatl kinemilia miyek kichiuas ipan inemilis, pero san nochiuas on ken toTEKO kineki.
22 Nochi tlakatl kinekiskia ma kipiyalikan kuajli inyojlo oksekimej. Más kuajli sen tlakatl mayanki xken sen tlaixpachojketl.
23 On yejuan kitlakaita toTEKO uejkauis nemis. Tla se kitlakaita toTEKO, ueli nemi ikan paktli niman xitlaj* ipan nochiua.
24 Nemij sekimej yejuan sanoyej tlatsijkej. Mayauij ipan iminkax, pero tlatsiuij hasta para kiktiskej intlakual ipan inkamak.
25 On yejuan tonto peua kuajli nouika ijkuak kita ika castigarouaj on yejuan xipan teita. Niman se yejuan tlamatki* kuajli nouika maski san kichikajkanotsaj.
26 Tla sen tekoneu xkuajli kichiuilia itataj niman kuajkixtia inanaj ichan, on sanoyej tepinajtij, niman xakaj kitlakaita.
27 Nokoneu, tla xtikneki tikakis niman tiktlakamatis tlen mitsijliaj, xkaman titlamatki* yes.
28 Sen xkuajli testigo ika uetska on tekiuaj. Sen xompayejyeua ikan ikamak kijtoua tlauijuikaltilistli.
29 Ye onkaj listo on tlakotl para kitlakouiskej on yejuan tekauetska. Ye onkaj nochi listo para kitlakapanuijuitekiskej on yejuan tonto.