20
On tlakatl yejuan koni vino xipan teita. Nochi on tlen tetlauantij kichiua para teuijsokij. Niman san akinon yejuan tlauani xkipiya tlamatkilistli.2 Ijkuak sen rey kualani, kakisti ken sen león yejuan nanalka. Tla yakaj kikualania, uelis kimiktis.
3 On tlakatl yejuan xkuelita teuan nokamauijsoki, kitocaroua ma kitlakaitakan. Pero on tlakatl yejuan tontoj, yej kuelita tepeualtijtinemi.
4 Ijkuak tôkalo, on yejuan tlatsijki xtôka. Pero ijkuak pixkalos, yejua no kinekis pixkas, pero xkipiyas tlinon kipixkas.
5 On tlen kinemiliaj kichiuaskej on tlalnikpaktlakamej sanoyej uejkatlan ken itlaj mar. Pero on tlakatl yejuan tetlamachilismati, ueli kipannextilia tlen se kinemilia.
6 Nemij miyekej yejuan noteneuaj sanoyej notlajsojkaixmatij, pero xnemij nion akin yejuan melauak nopiyaliaj nochi inyojlo.
7 On tlakatl yejuan yolchipauak niman yolmelajki, melajkanemi ipan inemilis. !Ikoneuan kipiyaskej tlatiochiualistli pampa nouikaj ken yejua!
8 Ijkuak on rey notlalia ipan itrono para tekiuajchiua, ueli kixtlaloua tla kuajli noso xkuajli on tlen kijtoua on tlakatl.
9 ¿Akinon uelis kijtos: “Nejua niyolchipauak; xkaman nitlajtlakoua?”
10 On tlakamej yejuan kitekitiltiaj on tlatemachiualtin yejuan xajsitokej ijkuak tlanamaka, toTEKO sanoyej kualaniaj.
11 Hasta sen konetl nimantsin tikitas kenijki nouika. Tiueli tikitas tla nouika kuajli noso xkuajli.
12 ToTEKO okinchijchiu tonakasuan yejuan ika titlakakij niman tixtololojuan yejuan ika titlachaj.
13 Tla tikneki san tikochtias, timayankanemis. Pero tla titekiti, xkaman mitspolos tlen tikuas.
14 On yejuan tlakoua ijkin kijtoua: “Nion xkualtsin niman sanoyej patioj.” Pero ijkuak yokou, uej noyekteneu ika okou xpatio.
15 Más ueyi kitosneki titlajtos ikan tlamatkilistli, xken nochi on oro niman tetsitsimej kualtsitsimej yejuan onkaj ipan in tlaltikpaktli.
16 On tlakatl yejuan kipaleuiya yakaj yejuan xkixmati para ma kitlanejtikan tomin, noso itlaj, ma kuilikan itlaken, niman maka kimakauaskej hasta ijkuak on xchanej kitlaxtlauas on tlen okinotlaneuij.
17 On tlakuajli yejuan tlachtektli sanoyej uelik, pero sakin* ipan mokamak tikmatis ken temis ikan tlajli.
18 Tla yakaj kinemilia itlaj kichiuas, kuajli kisas tla achtoj tetlajtoltis tla kuajli yes. Sen nouijsokilistli ueli notlani tla achtoj kinemiliaj kenijki kichiuiliskej.
19 On yejuan istlakatki* xueli kejeua sen ichtaktlajtojli. Tla ijkon tej, maka iminuan xmosentlalijtinemi on yejuan istlakatkej.
20 Yejuan kuijuikaltia itataj noso inanaj, mikis niman yas kampa sanoyej temojtij tlayouatok. 21 On riquezas yejuan san xuejkajtika kimiyekiliaj, sakin* no xkuajli ontlamis.
22 Maka kaman xnemili titetlakuepiltis tla itlaj mitschiuiliaj tlen xkuajli. San xtlali moyojlo itech toTEKO, niman yejua mitsmanauis.
23 On tlakamej yejuan kitekitiltiaj on tlatemachiualtin yejuan xajsitokej ijkuak tlanamakaj, toTEKO sanoyej kualaniaj.
24 ToTEKO, yejua kiyekana inemilis cada se. Xakaj kimati kanon ontlamis.
25 Sanoyej xkuajli tla sen tlakatl nimantsin itlaj kiprometerouilia Dios ijkuak xe kuajli kinemilia, pampa manin sakin* kixtlajsotlas on tlinon okiprometeroj.
26 Sen rey yejuan tlamatki* kimati ken kintotoka on xompayejyeuamej, niman sanoyej kintlajyouiltia ken sen uakax kiteyinia trigo ika on tetl de molino.
Rem <Place a picture here of a cow thrashing wheat with a grind stone. >
27 Itlauil toTEKO kalaki ipan iyojlo cada tlakatl niman kipanextia nochi tlen ompa iyantika.
28 Sen rey uelis uejkauis tlamandaros tla kichiua tlen melajki niman tetlajsojtla.
29 On telpokamej kimpakaitaj pampa sanoyej kojtikej, niman on ueuentsitsimej kintlakaitaj pampa yoistayak imintson.
30 Tla sen tlakatl xompayejyeua kitlatsuitekij, kixtilia tlen xkuajli, pampa on castigo ueli nochi tlakatl kiyolpatla.