21
ToTEKO ueli kiyekana itlamachilis sen rey ijkon ken ueli kiyakatiaj kampaka yau on atl de sen ayajtok.2 Sen tlakat ueli kinemilia ika nochi tlen kichiua sanoyej kuajli, pero toTEKO yejua kixtlaloua tlinon onkaj ipan iyojlo sen tlakatl niman kimati tline on tlakatl ijkon kichiua.
3 ToTEKO más kipaktia tla on tlakamej kichiuaj tlen melajki niman tlen kuajli, xken tla kuajkuiliaj uentli.
4 Onkaj yeyi tlajtlakojli yejuan kichiuaj on tlakamej: texixikoltilistli, noueyimatilistli niman xompayejyeualistli.
5 Ijkuak itlaj kuajli kinemiliaj ken kichiuaskej, kuajli kisa. Pero itlaj yejuan san kisijkachiuaj, xkuajli kisa.
6 On ricojyotl yejuan kimiyekiliaj ikan tlakajkayaualistli, nimantsin tlami niman kuajki mikilistli.
7 On xompayejyeuamej sano iminxompayejyeualis kinmiktis, pampa xkinekij kichiuaskej tlen melajki.
8 On xompayejyeua nouika ipan sen ojtli yejuan xmelajki, pero on yolmejlaki tlakatl nouika ipan sen ojtli yejuan melajki.
9 Más kuajli sen tlakatl chantis iselti ipan sen kalmatli, xken chantis ipan sen ueyi kajli iuan sen siuatl yejuan nochipa kitenkuikui.
10 Sen xompayejyeua san kinemilijtikaj kichiuas tlen xkuajli. Xkaman teiknelia.
11 On yejuan tonto san ueli kajsikamati ken kuajli nouika ijkuak kita ika castigarouaj on yejuan xipan teita. Pero se yejuan tlamatki* kajsikamati ken kuajli nouika ijkuak kiselia temachtijli.
12 On yolmelajki toTEKO, kimati tlinon nochiua impan iminkal on xompayejyeuamej, niman kichiua para yejuamej ma poliuikan.
13 Tla sen tlakatl xkineki kakis ijkuak itlaj kitlajtlaniliaj on mayankej, yejua no xkipaleuiskej ijkuak itlaj kitlajtlanis.
14 Tla yajkaj sanoyej otikualanij, niman tikimakas ichtaka sen tetlayokolijli*, tiuelis tikyoltlalis maski sanoyej kualantikatka.
15 Ijkuak on tekiuajyotl kichiua on tlen melajki, pakij on kuajkualtin tlakamej, pero nomojtiaj on xkuajkualtin tlakamej.
16 Yejuan xnouika ikan tlamatkilistli, ontlamis kampa nemij mikatsitsimej.
17 Yejuan san kineki kistinemis ipan iluimej, niman san tlauantinemis niman kikouas tlajtlamach* ajuiyalistin, nokauas sen mayanki.
18 Sen tlakatl omexayakyej niman xompayejyeua yejua kijyouis on tlajyouilistli yejuan kinekiliaya kijyouis on kuajli tlakatl niman yolmelajki.
19 Más kuajli tla sen tlakatl iselti chantis ipan sen xalpatlajkan, xken chantis iuan sen siuatl yejuan nochipa san kinektikaj kualanis.
20 Ichan sen tlamatki* onkaj riquezas iuan tlajtlamach* yejuan patio kenon ajuiyalistli, pero ipan ichan sen tonto xonkaj riquezas pampa san kipopoloua nochi tomin yejuan kiseliya.
21 Yejuan yolmelajki niman teiknelia, kinextis ueyi nemilistli niman tetlakaitalistli.
22 Yejuan tlamatki* ueli kinoyaxkatia sen ueyikalpan maski kuajli cuidarouaj, niman kixoxotonia on tepantli yejuan ika tsakutikaj.
23 Yejuan notejtenijmati ijkuak itlaj kijtoua, xkaman onuetsi kampa xkuajli.
24 Sen tlakatl yejuan tepijpinauiya noueyimati niman nouika ipan noueyimatilistli.
25 Sen tlakatl tlatsijki yejuan xkineki tekitis, sano yejua nomiktia. 26 Nochi tonajli san keleuitikaj itlaj. Pero sen kuajli tlakatl nochipa kineki kitemakas itlaj.
27 Toteko kualania on uentli yejuan kuajkij on xompayejyeuamej, pampa kitemakaj para teixkajkayauaj.
28 Yejuan xkuajli testigo, xkiseliskej tlen kijtoua, pero sen testigo yejuan kuajli, nochipa kakiskej tlen kijtoua.
29 Sen tlakatl xompayejyeua san kinemilia ika xitlaj ipan nochiuas, pero yejuan kuajli tlakatl kimati ika xitlaj ipan nochiuas.
30 Ixpan toTEKO xitlaj* kijtosneki on tlamatkilistli, nion tlakajsikamatilistli nion tetlakanonotsalistli yejuan kipiyaj on tlakamej.
31 Maski on soldados kinmachtiaj incaballos para kinuikaj ipan tlauijsokilistli, toTEKO yejua kichiua akinon ueli tetlani.