22
Más kuajli nouiyan mitsixmatiskej ika kuajli timouika, xken tla miyek tikpiyas oro niman plata.2 Sen tlakatl rico niman sen mayanki nochijkej tlachijchijtin, pampa toTEKO ijki okinchijchiu.
3 Sen tlakatl yejuan kuajli nonemilia ijkuak kita itlaj xkuajli nochiua, nejkuania. Pero sen telpokatl yejua xe ixtojtomi, xkita on tlen xkuajli nochiua, niman xnejkuania. Ijkon tej, yejua uelis tlajyouis.
4 Tla sen tlakatl yejuan noknelia niman kitlakaita toTEKO, kiselia ken tetlayokolijli*, riquezas, tetlakaitlalistli niman ueyi nemilistli.
5 Iojui sen xompayejyeua tlakatl tentikaj ikan uitstli niman tlatlalilistin, pero yejuan kimaluiya inemilis kimati ken nomanauia intech tlatlalilistin.
6 Xmachti mokoneu ken kuajli nouikas aman chika konetl, niman hasta ijkuak ueuentsintias nochipa ijki nouikas.
7 Para on yejuan mayankej, sen rico ken yejua imintamoxkwieko. Para on yejuan kitlaneuij tomin, nokauaj ken esclavos itech on yejuan kintlanejtia tomin.
8 Sen tlakatl yejuan techiuilia tlen xkuajli, más sakin* ipan uajlas miyek tlajyouilistli. ¡ToTEKO kipopolos ikan nochi itlauel!
9 Yejuan kinta oksekimej ikan tetlajsojtlalistli*, Dios kitiochiuas pampa kintlayokolia tlakuajli on mayankej.
10 Xchiua para ma uiya yejuan tepijpinauijketl, niman ijkon xok tepajsolojtias, xok nokamauijsokilos niman xok yakaj teuijuikaltis.
11 On rey kitlajsojkaita yejuan yolchipauak, niman kiselia ken itlajsojkaikniu* yejuan ueli kuajli tlajtoua ikan yemankatlajtojli.
12 ToTEKO ipan tlacha niman kimanauiya on tlen melauak yejuan on tlamatkej* kijtouaj, pero xkimanauiya intlajtoluan on yejuan tlakajkayauaj.
13 Sen tlakatl yejuan tlatsijki, san para xontekitis ika notlamiya, kijtoua kitl nemi sen león ipan ojtli yejuan kikuasneki.
14 Sen siuaauilnenki yejuan tenonotsa, itlajtol ken itlaj atlaltekontli* yejuan sanoyej uejkatlan, niman ompa onxinij on tlakamej yejuan toTEKO kintlauelia.
15 Sen konetl tlakati san xompatik, yejua ika xkuajli nouika. Pero tla kitlatsuitekij kajkauas.
16 Tla yakaj san para ricojtis kitlachtekilia sen mayanki, noso tlamach kimamaka sen rico, inemilis ontlamis ken sen mayanki.
On 30 tlajtoltin yejuan ijkin okijtojkej on tlamatkej*
17 Kuajli xkaki niman nimitsijlis tlinon kijtouaj on tlamatkej*. Kuajli xchiua on tlen nimitsmachtia. 18 Kualtsin yes tla tikeuas ipan motlamachilis, niman sakin uelis tikijtos san sekan. 19 Aman nimitsmachistia para xtlali nochi moyojlo itech toTEKO. 20 Nejua yonimitsijkuilouilij 30 tlajtoltin yejuan kipiya tetlakanonotsalistli niman temachtilistli 21 para nimitsititis on tlen melauak. Kemaj uelis tiknankilis yejuan itlaj mitstlajtoltis.
-1-
22 Maka ika timauiltis sen mayanki, san pampa mayanki. Nion maka tiktlajyouiltis yejuan xueli nomanauiya imixpan on tekiuajkej yejuan teyolkuitiaj, 23 pampa toTEKO yejua kimanauis niman no kintlajyouiltis yejuan tetlajyouiltiaj.
-2-
24 Maka iminuan xmouika on tlakamej yejuan niman kualanij niman tlauelejkej, 25 para maka no ijki tikchiuas ken yejuamej kichiuaj, niman ijkon sano tejua timotlatlalilis.
-3-
26 Maka kaman timokalaktis tiktlaxtlauas tlen kiteuikilia yakaj, 27 pampa tla xtikpiya tlinon ika tiktlaxtlauas, hasta motlapech mitskuiliskej.
-4-
28 Maka kaman tikpatlas on neskayotl kampa teuan timotlalnamiki, yejuan okitlalijkej moachtojtajuan.
-5-
29 San akinon yejuan kuajli kichiua itekiu, uelis ajsis ontekitis itech sen rey. Yejua ximintech tekitis on yejuan xuejueyixtokej.