-6-
23
Ijkuak yakaj tlakatl yejuan ueyixtikaj mitsnotsas para tontlakuas ichan, xkita kuajli akinon ixpan tinemis. 2 Maski sanoyej tapismiki maka sanoyej titlakuas. 3 Maka tikeleuis on tlakuajli yejuan nesi sanoyej uelik, pampa uelis yej itlaj ika mitskajkayauasnekis. -7-
4 Maka sanoyej xmotekimaka chikauak para tiricojtis. Makasa yejua xkonnemilijtia. 5 Yej kuajli xkita ika on ricojyotl san panotikisa, kenon itlaj kuaktli amanaman patlanteua niman san uajnopoloua.
-8-
6 Maka timotlalis titlakuas iuan se yejuan sanoyej tsotsokatl, nion maka tikeleuis tikuas nochi itlakual yejuan nesi sanoyej uelik, 7 pampa maski mitsnotsas para más xtlakuati niman xtlaoniti ichan, xikan iyojlo mitsnotsas pampa yejua san kinemilitikaj on kech ika patioj on tlakuajli. 8 Kemaj tikisotlas on tlen otikuaj, niman sanenkaj tikmakas tlaxtlauijli ipampa on tlakuajli yejuan otikuaj.
-9-
9 Maka itlaj kuajli tetlakanonotsalistli xkijli sen tonto, pampa maski tikijlis tlen kuajli, san mitsuejuetskilis.
-10-
10 Maka kaman tikpatlas on neskayotl kampa teuan timotlalnamiki, yejuan okitlalijkej moachtojtajuan, nion maka tikintlalkuilis yejuan iknomej, 11 pampa yejuamej kipiyaj iminTemanauijkau yejuan kipiya ueyi poder, niman uajlas ken sen juez para kiminmanauis de motech.
-11-
12 Motlamachilis niman motlakakilis xtekitilti para nochipa tikselis kuajli temachtijli niman tetlakanonotsalistli.
-12-
13 Maka xkauili mokoneu ma kichiua tlen xkuajli. Ika on keski tlatsuitekilistli xmikis. 14 Xtlatsuiteki, niman ijkon tikmanauis para xyas miktlan.
-13-
15 Nokoneu, tla timochiuas tlamatki* nejua sanoyej nipakis. 16 Sanoyej niyolpakis ijkuak nikakis titlajtoua ika tlamatki*tlajtoltin.
-14-
17 Maka timoxikos inka on xompayejyeuamej, yej nochipa xtlakaita toTEKO. 18 Tla ijkon tikchiuas, kuajli ontlamis monemilis, niman on motlamachalis yejuan tikpiya xkaman tikpolos.
-15-
19 Nokoneu, kuajli xkaki tlinon nimitsijlia, niman xmochiua tlamatki*. Xchiua kanika para tiktokas on kuajli ojtli. 20 Maka xmouika iminuan on tlauankej, nion iminuan yejuan sanoyej tlakuatemej, 21 pampa on yejuan tlauankej niman yejuan tlakuatemej nochiuaskej mayankej. Ijkuak yejuamej tlauanij niman sanoyej tekitlakuaj, kinmajsi kochistli, niman saniman kinotlaliltiaj tlakensosoltin.
-16-
22 Xkaki tlinon mitsijlia motataj yejuan san ipampa tikpiya nemilistli. Niman maka tiktlalkauis monanaj ijkuak lamajtsin yes. 23 Xtejtemo tlen melauak. Xpiya tlamatkilistli, tlamachtijli niman kajsikamatilistli, ¡Niman maka kaman itlaj ika tikimpatlas! 24 Sen tajtli yejuan ikoneu yolmelajki niman tlamatki*, kipiya miyek paktli niman sanoyej noueyiteneua. 25 ¡Xchiua para motataj niman monanaj ma pakikan. Niman ma yolpaki on monanaj yejuan omitsnemitij!
-17-
26 Nokoneu, xnechkaki ikan nochi moyojlo, niman xtoka on kuajli ojtli yejuan nejua niktoka. 27 Xmati ika sen siuaauilnenki, sen tlakapapatlaketl ken sen tlaltekontli yejuan sanoyej uejkatlan niman tlapitsko ijtik ken se tlatlalijli kampa kintlatlaliliaj yolkamej. 28 Yejua tepijpiya ken sen ichteki, niman kichiua para miyekej tlakamej ma tlajtlakokan.
-18-
29 ¿Akinon tlajyouiya?
¿Akinon nokokoua?
¿Akinon tlauijsoktinemi?
¿Akinon najmana?
¿Akinon san kinenuiyaj pampa kimajmailiaj?
¿Akinonon ixchijchichiltik?
30 Yejuan xkajkaua ika tlauantinemi, niman sa kistinemi kitejtemoua okse yenkuik tlaonijli. 31 Maka xkauili on tlaonijli ma mitsyolmatoka, tla kualtetsin ken chichiltik niman kualtetsin ken petlani ipan on copa, nion tla machisti uelic ijkuak tikoni. 32 On tlaonijli sakin*, nokuepa ken itlaj kouatl yejuan tekua niman tepajuiya. 33 On tlaonijli kichiuas para timijixkuepas. Kichiuas para tiknemilis niman tikijijtos tlajtlamach* tojtonyotl. 34 No kichiuas para tiixkuaixiuintis ken tinemiskia ipan mar ipan sen barco yejuan sanoyej nolinia chika ajakakiaui, ken tla teuatiaskia ikuapan ikojyo on barco kampa más tlakpak. 35 Kemaj ijkin tikijtos: “Onechmailijkej, pero xonechkokoj. Onechuijuitekej, niman xonikmat kamanon. Pero yej kemaj, ijkuak nitlachas, oksejpa nikontejtemos on tlaonijli yejuan tetlauantij.”