El Cantar de los Cantares
1
In sen kualtsin xochikuikatl yejuan okijkuiloj Salomón.On Achtoj Kuikatl
On ichpochtli ijkin onokuikatij
2 "¡Xnechtejtenkuaa ika on mokamaktsin! Más nikuelita ken tinechnejneki, xken ijkuak nikoni on tsopelik vino. 3 Sanoyej ajuiyak on moajuiyalis, on motoka sano yejua ajuiyalistli, ken tiajuiyalistli yejuan ika tlajuiyaliua. ¡Yejua ika tej, miyekej ichpokamej mitsnekij! 4 ¡Xnechuika nimantsin mouan! ¡Xnechuika norey, xnechuika mochan!"
Ichpokamej ne Jerusalén
Mouan sanoyej tipakakiskej. Más tikuelitaj ken tejua titenejneki, xken ijkuak tikonij on tsopelik vino. ¡Aman tikmatij tline* sanoyej mitsnekij on siuamej!
On ichpochtli ijkin onokuikatij:
5 "Siuamej de Jerusalén, maski nejua xnixinolaj, nikualtetsin. Nejua nixtlilejkitsin, ijkon ken nesi icampamento itribu Cedar, niman nikualtetsin ken icortinas Salomón. 6 Maka xnechchichiuakan ika nixtlilejkitsin, pampa on tonaltsintli ijkon yonechixtlatij. Yejua ika nokuetlaxyo tlilejkitsin. Nokniuan okualankej nouan, niman onechchiualtijkej ma nikintlajpiya iminuvasyoj, ¡niman nejua nouvasyoj, uej xok oniktlajpix!
7 Tejua akin sanoyej nimitsneki ikan nochi noyojlo, xnechijli, ¿kanon tikintlakuajkualtia moborregos?, ¿kanon tikinseuiya ijkuak tlakualispan? ¿Tline hasta xok nikmatis kanika nimitstejtemojtinemis niman najsis intech imborregos on yejuan iminuan tikistinemi?
On tlajpixkej
8 Tla tejua xtikmati, tejua siuatl, akin más tikualtetsin de nochimej on siuamej, xtoka on ojtli kampa ikxinestokej on borregos, niman xkintlakuajkualti mochivitos intech inkajkaluan on tlajpixkej.
On telpochtli
9 Tejua notlajsojkatsin, sanoyej tikualtetsin, kenon kualtetsin siuacaballo yejuan kitilana icarro on rey de Egipto. 10 ¡On okan moxayak, sanoyej kualtsitsimej nesij ika on mopipiloluan! On mokechkojyo no kualtetsin nesi ika on mokoskauan yejuan kipiyaj on tetsitsimej perlas. 11 ¡Timitschijchiuiliskej mopipiloluan ikan oro niman tikintlajmachyotiskej ikan plata!
Ichpochtli
12 Chika on rey noseuijtikaj ipan isieta, on noajuiyalis nochayaua nochiuiyan. 13 On notlajsojkatsin, no ijki ken sen bolsita yejuan kipiya on ajuiyalistli itoka mirra, yejuan niktlalia noyelpan intsajlan nochichiualtsitsiuan. 14 On notlajsojkatsin, ken itlaj on xochitl itoka alheña yejuan onkaj ipan iuvasyoj on tlajli itoka En-gadi.
On telpochtli
15 ¡Sanoyej tikualtetsin, tejua notlajsojkatsin, melauak sanoyej tikualtetsin! ¡Mixtololojuan nesij ken omemej palomas!
On ichpochtli
16 ¡Sanoyej tikualtetsin, tejua notlajsojkatsin, melauak sanoyej tikualtetsin!
On telpochtli