12
Xkelnamiki moDios akin omitschijchiu, aman chika sanken* titelpochtli niman chika xe yejko on tonaltin ijkuak tiueuejtis niman titlajyouis; pampa yejkos on tonajli ijkuak tikijtos: "Xnechpaktia tla ninemis miyek xipan." 2 Xkelnamiki aman, chika xe seui itlauil on tonaltsintli, on metstli niman on sitlalimej, chika oksejpa moxtemi ijkuak yokiau. 3 Ijkuakon on momauan yejuan aman ika timomanauiya, kuetlaxiuiskej, niman on mokxiuan yejuan aman kojtikej, yemankakuekuetlakaskej. Motlauan xok miyek tikimpiyas para ika tikuechos motlakual, niman mixtololojuan xok mas tlachaskej. 4 No ijki, monakasuan xok tlakakiskej, xok tikakis on tlen kakisti ipan on kalpan ojtli, nion on temej yejuan kuechouaj trigo. No xok tikinkakis ken nokuikatiaj on siuamej, pero on totomej uelis mitstlachaltiskej ijkuak tsajtsij uejka kualkan, pampa xok uelis tikochis. 5 Ijkuakon tikmakajsis on kampa tlakpak, niman tikmakajsis timokxitechakuanis itlaj ika ipan ojtli. Motson nochi istayas, nokauas kenon ixochiyo on kojtli itoka almendro. Tejua xok tiuelis tinejnemis, yej sa timotejchiuilantias ken itlaj chapolin. Ijkuakon xok tiknekis tinemis. Kemaj tias ipan motlalkon kampa tinemis para nochipa. On mochanejkauan nosentlaliskej ipan ojtli niman najmanaskej chika mitsuikaskej mitsontôkaskej camposanto.6 Xkelnamiki moDios akin omitschijchiu, aman chika xe tlami monemilis, no ijki ken ijkuak xe kotoni on mekatl de plata niman xe tlapani on kontli de oro. No ijki ken ijkuak xe tlapani on tsotsokojli itenko on ameyajli niman ijkuak xe posteki on malakachkojtli yejuan ika kixtiaj atl ipan on atlaltekontli. 7 Pampa ijkuak nochi in yonochiu, on tlalnakayotl de tlalkuechtli oksejpa nokuepas tlajli, kampa okis, niman on espíritu nokuepas itech Dios, yejuan okimakak.
8 Nejua, niTemachtijketl, oksejpa nikijtoua: ¡San tlaixkajkayaualistli, san tlaixkajkayaualistli! ¡Nochi san tlaixkajkayaualistli!
ON SA IKA NOCHI TLAJTOLTIN: XTLAKAITAKAN DIOS NIMAN XCHIUAKAN ON TLEN MECHNAUATIA (12.9 - 14)
9 Ijkuak más tlamatki onochiu on Temachtijketl, más tlamachilistli okinmachtij on tlakamej. No ijki más onomachtij miyek sesekneka tlamatkitlajtoltin niman kuajli okintekpankatlalij. 10 Okichiu kanika para kinextis on más kuajli tlajtoltin, para kuajli kijkuilos on melauak tlamatkitlajtoltin.
11 Intlajtol on tlamatkej nochiua ken clavos yejuan tlateki niman ken itlaj estacas sanoyej tlatekej yejuan on tlajpixkej kitekitiltiaj para ika kinyekanaj imborregos. Sen temachtijketl kitekitiltia para kinyoleua inomachtijkauan ma kichiuakan niman ma uelikan on tlen melauak más ueyi kijtosneki. Nochi on Dios itech ualeua, on totetlajpixkau, para techyekana tinochimej.
12 Aman nokoneu, ¡xpiya cuidado! On yejuan kijkuiloua miyek amamoxtin* xkaman tlamis, niman tla se sanoyej nomachtia no sanoyej tesiauitij.
13 Nochi tlen niknekiya nikijtos yonikijtoj. Nikan onkaj nochi tlen noneki se kichiuas: Xtlakaita Dios niman xchiua on tlen mitsnauatia, pampa on san yejua kitocaroua kichiuas sen tlakatl 14 pampa Dios techyolkuitis de nochi on tlen otikchijkej, yejuan kuajli niman on tlen xkuajli, niman maski tla otikchijkej san ichtaka.