11
Xtlajkali motlaxkal ipan atl; niman más sankin oksejpa tiknextis. 2 Xkinxexelouili oksekimej san kech tiuelis on tlen tikpiya. pampa xtikmati tlinon xkuajli uelis ipan nochiuas in país.3 Tla sanoyej yoâyouak on moxtli, uajxini ken kiautli ipan tlajli. Tla on kojtli* uetsi tlakpakopa noso uetsi tlatsintlankopa, ne kampa uetsi on kojtli ompa nokaua tlajkaltok.
4 Yejuan kimojkaita on ajakatl, xkisa ontôka, niman yejuan kimojkaita on moxtli, xkisa onpixka.
5 Ijkon ken xtikmati kanika yau on ajakatl, niman kenijki nochiua sen konetsintli ijtik inanaj, no ijki xitlaj* tikmati on tlen Dios kichiua, yejua akin tlachijchijketl de nochi tlen onkaj.
6 Xtôka on xinachtli ijkuak kualkan, niman no xtôka ijkuak tiotlatl, pampa xkaman tikmati katlejua más kuajli yes, tla yejuan más saniman otiktôkak noso on yejuan sankin, noso tla yej on omej kuajli tlakis.
7 Sanoyej kuajli tla mitspaktia on tlauijli. 8 Pero maski sen tlakatl nemis miyek xipan niman nochipa pakanemis, no noneki xkelkauas ika on mikilistli sanoyej uejkauis, niman ika nochi on tlen xe nochiua no san tlaixkajkayaua.
Kinchikajkanotsaj on telpokamej niman ichpokamej
9 Xmopakti aman chika tichikajtikaj titelpochtli, niman xmopakti aman ika on tlen kuajli chika tiueli. Xmokauili ma mitsyekana moyojlo ika on tlen ueli tikita, pero xkelnamiki ika de nochi on tlen tikchiuas, nochi mitsyolkuitis Dios.
10 Xkejkuani ipan moyojlo on tlen tekualanij, niman xkixti ipan monemilis nochi tlen xkuajli, pampa on telpokayotl niman iselika nemilis san tlaixkajkayaua.