Okseki tlajtoltin de tlamatilistli
10
Ijkon ken sen sayolin yejuan miki molonia niman kimolonaltia on ajuiyalistli, no ijki se achijtsin tontojyotl kijtlakoua on tlakatl tlamatki yejuan kitlaitaj.2 Iyojlo sen tlamatki kiyekana para nouika kuajli, pero iyojlo sen tonto kiyekana para nouika xkuajli. 3 Nochi tlen kichiua sen tlakatl tonto, kiteititia ika xitlaj kimati, niman kampaka yau oksekimej kimijlia ika xitlaj kimaki.
4 Tla on yejuan mitsmandaroua kualani mouan, maka tikauas motekiu. Para tikuektlalis on tlen xkuajli kichiua, noneki tikxikos niman tipiyas yolseuilistli.
5 No onikitak on tlen xkuajli nochiua ipan in tlaltikpaktli, niman in sano kisa intech on yejuan tlamandarouaj: 6 ika se yejuan tonto kimakaj sen ueyi tekitl, niman on yejuan ricos kimakaj tekitl yejuan xmás ueyi kijtosneki. 7 No onikintak on yejuan esclavos kistinemij ipan caballos niman on tlayekankej nejnentinemij ken esclavos yeskiaj.
8 Yejuan kichkua sen tlaltekontli sano yejua ijtik onuetsi. Yejuan kitlajkali sen tepantli uelis kinextis sen kouatl niman on kouatl kikuas on tlakatl. 9 Yejuan kinxima temej, uelis sano yejua nokokos. Yejuan kojtlajtlapana, uelis sano yejua notsontekis. 10 Tla sen hacha xok tlateki niman xkitentiaj, noneki más chikauak kitlajkalij para tlatsonteki. Más kuajli tla itlaj tikchiuas kuajli niman ikan tlamatkilistli. 11 Xnoneki sen tlatsotsonketl ixpan sen kouatl ijkuak yotekuaj. 12 Itlajtol sen tlamatki nochimej kuelkakij, pero itlajtol sen tonto sano yejua kichiuilia tlen xkuajli. 13 Ijkuak peua tlajtlajtoua, nochi tontojyotl kijijtoua, niman tlami kijijtoua nochi tlen xitlaj kijtosneki. 14 ¡Sen tlakatl tonto sanoyej tlajtolmiyek!
¿Akinon uelis kijtos tlinon nochiuas uajmostla, tla xakaj kimati on tlen nochiuas más sakin*?
15 Sanoyej notekimiktia on tlakatl tonto, hasta xok kimati katlejua ojtli kajsis ipan on ueyikalpan.
16 ¡Lástima de on país yejuan irey sen telpochtli, niman yejuan itlayekankauan san ika nokauaj tlaluichiuaj niman tlakuaj hasta tlanextiliaj! 17 ¡Sanoyej tlatiochijtli on país yejuan kipiya ken rey sen kuajli tlayekanki, niman kampa on tlayekankej tlakuaj ijkuak kitocaroua, para chikajkanemij niman xpara tlauaniskej!
18 Ijkuak sen tlakatl sanoyej tlatsiui, niman xkineki kuektlalis ikuapachol ikal, uetsis on ikuapachol, niman kemaj nochi ikal uetsis.
19 On iluitlakuajli para kueliliaj, niman on vino para tiyolpakis ipan monemilis; pero para on noneki tikpiyas tomin.
20 Maka xkijtouili tlen xkuajli sen rey, nion siquiera ipan motatlamachilis. Maka xkijtouili tlen xkuajli sen rico, maski tinemi san moselti, pampa on totomej patlanij niman yejuamej uelis konmachistiskej tlen otikjtoj san ichtaka.